വാഷ്ംങ്ടണ്‍: വെടിനിര്‍ത്തല്‍ കരാര്‍ പ്രാബല്യത്തില്‍ വന്നതിനു ശേഷവും ആക്രമണം തുടര്‍ന്ന ഇസ്‌റാഈലിനെ രൂക്ഷമായി വിമര്‍ശിച്ച് അമേരിക്കന്‍ പ്രസിഡന്റ് ഡോണാള്‍ഡ് ട്രംപ്. ഇരു രാജ്യങ്ങളുടെയും നടപടികളില്‍ കടുത്ത അതൃപ്തി പ്രകടിപ്പിച്ച ട്രംപ്, വെടിനിര്‍ത്തല്‍ കരാറിന്റെ ലംഘനം മേഖലയിലെ സമാധാന ശ്രമങ്ങള്‍ക്ക് തിരിച്ചടിയാണെന്ന് വ്യക്തമാക്കി.

ALSO READ: യുദ്ധത്തിന് താല്‍ക്കാലിക വിരാമം?; ഇറാന്‍- ഇസ്‌റാഈല്‍ വെടിനിര്‍ത്തല്‍ നിലവില്‍ വന്നെന്ന് അല്‍ജസീറ റിപ്പോര്‍ട്ട്

ഇറാനും ഇസ്‌റാഈലും തമ്മിലുള്ള 12 ദിവസത്തെ സംഘര്‍ഷത്തിനു ശേഷം കരാര്‍ നിലവില്‍ വന്നെങ്കിലും ഇസ്‌റാഈല്‍ നടത്തിയ പുതിയ ആക്രമണങ്ങള്‍ സംഘര്‍ഷം വീണ്ടും വര്‍ധിപ്പിച്ചിരുന്നു. ട്രംപിന്റെ മധ്യസ്ഥതയില്‍ രൂപപ്പെടുത്തിയ വെടിനിര്‍ത്തല്‍, മേഖലയില്‍ സ്ഥിരത കൈവരിക്കാന്‍ ലക്ഷ്യമിട്ടിരുന്നു. എന്നാല്‍, ഇസ്‌റാഈലിന്റെ തുടര്‍ച്ചയായ ആക്രമണങ്ങള്‍ ഈ ശ്രമങ്ങളെ തകര്‍ത്തതായി ട്രംപ് ആരോപിച്ചു. ഇസ്‌റാഈലിന്റെ ആക്രമണങ്ങളില്‍ താന്‍ സന്തുഷ്ടനല്ലെന്നും ട്രംപ് കൂട്ടിച്ചേര്‍ത്തു.

'വെടിനിര്‍ത്തല്‍ കരാര്‍ ഒരു ചരിത്രപരമായ അവസരമായിരുന്നു. എന്നിട്ടും ഇസ്‌റാഈല്‍ അത് ലംഘിച്ചത് ഉത്തരവാദിത്തമില്ലായ്മയാണ്,' ട്രംപ് പറഞ്ഞു. ഇറാന്റെ പ്രതികാര നടപടികളും സ്ഥിതിഗതികള്‍ സങ്കീര്‍ണമാക്കിയതായി അദ്ദേഹം ചൂണ്ടിക്കാട്ടി. ഖത്തറിലെ അല്‍ ഉദൈദ് വ്യോമതാവളത്തിനു നേരെയുള്ള ഇറാന്റെ മിസൈല്‍ ആക്രമണത്തിനു പിന്നാലെ ഇസ്‌റാഈല്‍ വീണ്ടും അക്രമിക്കുമെന്ന ഭയം മേഖലയില്‍ ഉണ്ടായിരുന്നു.

ALSO READ: ഗത്യന്തരമില്ലാതെ നെതന്യാഹു; വെടിനിര്‍ത്തല്‍ അംഗീകരിച്ചു, നടപ്പിലായതായി സ്ഥിരീകരണം 

അന്താരാഷ്ട്ര സമൂഹം സമാധാനത്തിനായി ആഹ്വാനം ചെയ്യുമ്പോള്‍, ഇരു രാജ്യങ്ങളും സംയമനം പാലിക്കണമെന്ന് ട്രംപ് ആവശ്യപ്പെട്ടു. സമാധാന ചര്‍ച്ചകള്‍ പുനരാരംഭിക്കാന്‍ യുഎസ് ശ്രമങ്ങള്‍ തുടരുമെന്നും അദ്ദേഹം വ്യക്തമാക്കി.