ന്യൂഡല്‍ഹി: പാകിസ്ഥാന്‍ ഇന്റലിജന്‍സ് ഏജന്‍സിയായ ഐ.എസ്.ഐക്ക് വേണ്ടി വര്‍ഷങ്ങളോളം ചാരവൃത്തി നടത്തിയ നാവികസേന ഉദ്യോഗസ്ഥന്‍ അറസ്റ്റില്‍. ന്യൂഡല്‍ഹിയിലെ നാവികസേന ആസ്ഥാനത്തെ ഉദ്യോഗസ്ഥനായ വിശാല്‍ യാദവാണ് അറസ്റ്റിലായത്. ഓപറേഷന്‍ സിന്ദൂറിനിടയിലും ഇയാള്‍ ചാരപ്പണി നടത്തിയെന്നാണ് റിപ്പോര്‍ട്ട്. രാജസ്ഥാന്‍ പൊലിസിന്റെ ഇന്റലിജന്‍സ് വിഭാഗമാണ് ഇയാളെ റസ്റ്റ് ചെയ്തിരിക്കുന്നത്. 

നാവികസേനയെയും മറ്റു പ്രതിരോധ യൂണിറ്റുകളെയും കുറിച്ചുള്ള രഹസ്യ വിവരങ്ങള്‍ വിശാല്‍ യാദവ് പാകിസ്ഥാനിലെ ഒരു സ്ത്രീക്കാണ് കെമാറിയിരുന്നതെന്നാണ് റിപ്പോര്‍ട്ടുകള്‍ പറയുന്നത്. വിവരങ്ങള്‍ക്കു പകരമായി ഇയാള്‍ പണം കൈപ്പറ്റിയിരുന്നുവെന്നും മൊബൈല്‍ ഫോണ്‍ പരിശോധനയില്‍ കണ്ടെത്തിയിട്ടുണ്ട്. ഹരിയാന സ്വദേശിയായ യാദവ് നേവല്‍ ഹെഡ് ക്വാര്‍ട്ടേഴ്‌സില്‍ ക്ലര്‍ക്ക് ആണ്. 

പാകിസ്ഥാന്‍ രഹസ്യാന്വേഷണ ഏജന്‍സികള്‍ നടത്തുന്ന ചാരപ്രവര്‍ത്തനങ്ങള്‍ രാജസ്ഥാന്‍ പൊലിസിന്റെ ഇന്റലിജന്‍സ് യൂണിറ്റ് നിരന്തരം നിരീക്ഷിച്ചുവരികയാണെന്നു മുതിര്‍ന്ന പൊലിസ് ഉദ്യോഗസ്ഥനായ വിഷ്ണുകാന്ത് ഗുപ്ത പറഞ്ഞു. നിരീക്ഷണത്തിനിടെ, പാകിസ്ഥാന്‍ രഹസ്യാന്വേഷണ ഏജന്‍സിയുടെ വനിതാ മാനേജറുമായി സോഷ്യല്‍ മീഡിയ വഴി നിരന്തരം ബന്ധപ്പെട്ടിരുന്ന യാദവിനെ ശ്രദ്ധയില്‍ പെടുകയായിരുന്നു. പ്രിയ ശര്‍മ്മ എന്ന് സ്വയം വിളിക്കുന്ന ഈ സ്ത്രീ തന്ത്രപരമായി പ്രാധാന്യമുള്ള രഹസ്യ വിവരങ്ങള്‍ ശേഖരിക്കുന്നതിനായി വിശാലിന് പണം നല്‍കിയിരുന്നു. വിശാല്‍ യാദവ് ഓണ്‍ലൈന്‍ ഗെയിമുകള്‍ക്ക് അടിമയായിരുന്നുവെന്നും അതില്‍ വരുന്ന  നഷ്ടം നികത്താന്‍ പണം ആവശ്യമായിരുന്നുവെന്നും വിഷ്ണുകാന്ത് ഗുപ്ത ചൂണ്ടിക്കാട്ടി. ചാരവൃത്തിയിലൂടെയാണ് ഇയാള്‍ പണം കണ്ടെത്തിയിരുന്നതെന്ന് പ്രാഥമിക അന്വേഷണത്തില്‍ കണ്ടെത്തിയതായും അദ്ദേഹം കൂട്ടിച്ചേര്‍ത്തു. 

ക്രിപ്റ്റോകറന്‍സി ട്രേഡിങ് അക്കൗണ്ട് വഴിയും നേരിട്ട് ബാങ്ക് അക്കൗണ്ടുകളിലേക്കും വിശാല്‍ യാദവ് പണം സ്വീകരിച്ചിരുന്നതായി അന്വേഷണ ഉദ്യോഗസ്ഥര്‍ വ്യക്തമാക്കി. 

ജയ്പൂരിലെ സെന്‍ട്രല്‍ ഇന്ററോഗേഷന്‍ സെന്ററില്‍ വിവിധ രഹസ്യാന്വേഷണ ഏജന്‍സികള്‍ വിശാല്‍ യാദവിനെ സംയുക്തമായി ചോദ്യം ചെയ്തുവരികയാണ്. ഈ റാക്കറ്റില്‍ മറ്റാരൊക്കെയാണ് ഉള്‍പ്പെട്ടിരിക്കുന്നതെന്നും എത്രത്തോളം വിവരങ്ങള്‍ ചോര്‍ത്തിയിട്ടുണ്ടെന്നും കണ്ടെത്താനാണ് അന്വേഷണ ഏജന്‍സികള്‍ ശ്രമിക്കുന്നത്.

ചാരപ്രവര്‍ത്തനങ്ങളില്‍ സോഷ്യല്‍ മീഡിയയുടെ പങ്ക് ഈ അറസ്റ്റ് വീണ്ടും അടിവരയിടുന്നു. സോഷ്യല്‍ മീഡിയയിലെ സംശയാസ്പദമായ പ്രവര്‍ത്തനങ്ങളെക്കുറിച്ച് ജാഗ്രത പാലിക്കണമെന്നും ഉടന്‍ റിപ്പോര്‍ട്ട് ചെയ്യണമെന്നും സുരക്ഷാ ഏജന്‍സികള്‍ ജനങ്ങളോട് അഭ്യര്‍ത്ഥിച്ചു.

Vishal Yadav, a Navy clerk posted at the Naval HQ in New Delhi, has been arrested for leaking classified military information to Pakistan’s ISI. He was allegedly in contact with a woman posing as an ISI handler and received money in return for sensitive defense data.