കോഴിക്കോട്: കൗമാരപ്രായത്തിൽ രണ്ടുപേരെ കൊലപ്പെടുത്തിയെന്ന മുഹമ്മദലി (54)യുടെ വെളിപ്പെടുത്തലിന് പിന്നാലെ അന്വേഷണസംഘം കൂടരഞ്ഞിയിൽ കൊല്ലപ്പെട്ടയാളുടെ രേഖാചിത്രം തയാറാക്കി. തിരുവമ്പാടി ഇൻസ്പക്ടർ കെ. പ്രജീഷിന്റെ നേതൃത്വത്തിലുള്ള സംഘം മുഹമ്മദലിയെ കസ്റ്റഡിയിൽ വാങ്ങിയ ശേഷമാണ് രേഖാചിത്രം തയാറാക്കിയത്. 

മുഹമ്മദലി നൽകിയ വിവരങ്ങളുടെ അടിസ്ഥാനത്തിലാണ് രേഖാചിത്രം തയാറാക്കിയത്. രേഖാ ചിത്രത്തിന് കൊല്ലപ്പെട്ട ആളുമായി 80 ശതമാനത്തോളം സാമ്യമുണ്ടെന്ന് മുഹമ്മദലി പറഞ്ഞതായി ഇൻസ്പക്ടർ പറഞ്ഞു. അതേസമയം മുഹമ്മദലിയുടെ മാനസികാരോഗ്യം സംബന്ധിച്ച് പൊലിസ് പരിശോധിച്ചിരുന്നു. വിഷാദരോഗത്തിനുള്ള മരുന്നകൾ കഴിച്ചതല്ലാതെ മാനസിക പ്രശ്‌നങ്ങളില്ലെന്നും പൊലിസ് വ്യക്തമാക്കി. കൂടരഞ്ഞിയിലെ തോട്ടിലേക്ക് ഒരാളെ ചവിട്ടി തള്ളിയിട്ടെന്നും പിന്നീട് മരിച്ചെന്നുമാണ് മുഹമ്മദലിയുടെ മൊഴി. മരിച്ചയാളെ തിരിച്ചറിയുന്നതിനായി വിവിധ ഭാഗങ്ങളിലായി പൊലിസ് അന്വേഷിച്ചിരുന്നു. 

1986ൽ കാണാതായവരെ കുറിച്ചുള്ള വിവരങ്ങൾ തേടി വിവിധ പൊലിസ് സ്‌റ്റേഷനുകളിലേക്ക് അറിയിപ്പും നൽകിയിരുന്നു. എന്നിട്ടും വിവരങ്ങളൊന്നും ലഭിക്കാതിരുന്നതോടെയാണ് രേഖാചിത്രം തയറാക്കിയത്.  വെള്ളയിൽ ബീച്ചിൽ 1989ൽ മറ്റൊരാളെ കൊലപ്പെടുത്തിയെന്ന വെളിപ്പെടുത്തലിനെ കുറിച്ച് കോഴിക്കോട് സിറ്റി പൊലിസ് അന്വേഷിച്ചുവരികയാണ്. കമ്മിഷണറുടെ കീഴിലുള്ള ക്രൈം സ്‌ക്വാഡാണ് പ്രാഥമിക വിവരങ്ങൾ ശേഖരിക്കുന്നത്. 

ബീച്ചിലെ കൊലപാതകത്തിന് മറ്റൊരാൾക്കും പങ്കുണ്ടെന്നാണ് മുഹമ്മദലിയുടെ മൊഴി. ബാബു എന്ന കഞ്ചാവ് ബാബുവാണ് അന്ന് ഒപ്പമുണ്ടായിരുന്നത്. എന്നാൽ കഞ്ചാവ് ബാബുവിനെ കുറിച്ചും പൊലിസിന് കൂടുതൽ വിവരങ്ങൾ ലഭിച്ചിട്ടില്ല. കഴിഞ്ഞ മാസം അഞ്ചിനാണ് മുഹമ്മദലി വേങ്ങര പൊലിസ് സ്‌റ്റേഷനിലെത്തി കുറ്റസമ്മതം നടത്തിയത്. തുടർന്ന് വേങ്ങര പൊലിസ് തിരുവമ്പാടി സ്‌റ്റേഷനിൽ വിവരമറിയിക്കുകയും മുഹമ്മദിലുടെ അറസ്റ്റ് രേഖപ്പെടുത്തിയ ശേഷം കോടതിയിൽ ഹാജരാക്കി റിമാൻഡ് ചെയ്യുകയും ചെയ്തു. പിന്നീട് കസ്റ്റഡിയിലെടുത്ത് ചോദ്യം ചെയ്തപ്പോഴാണ് വെള്ളയിൽ ബീച്ചിലെ കൊലപാതകത്തെ കുറിച്ച് വെളിപ്പെടുത്തിയത്.