പ്രകൃതിയെ ഹൃദയത്തോടെ ചേർത്ത് ജീവിക്കുന്നവരാണ് വയനാട്ടുകാർ. അതുകൊണ്ടായിരിക്കാം പ്രകൃതി വയനാട്ടുകാരെ വാരിപ്പുണർന്നത്... പക്ഷേ, അത് സ്‌നേഹകരങ്ങൾ കൊണ്ടായില്ലെന്നു മാത്രം. നാളെയുടെ പ്രതീക്ഷകളെക്കുറിച്ച്, ഏറ്റവും പ്രിയപ്പെട്ടവരെ കുറിച്ച്, സ്‌നേഹനിധിയായ മക്കളെക്കുറിച്ച്... അങ്ങനെ എന്തെല്ലാം സ്‌നേഹഭാഷണങ്ങൾ നടത്തിയാകാം ആ രാത്രി അവർ ഉറങ്ങീട്ടുണ്ടാവുക. ഒന്നിരുട്ടി വെളുത്തപ്പോഴേക്കും ഉരുൾ ഇല്ലാതാക്കിയത് മുണ്ടക്കൈ എന്ന പ്രദേശത്തെ ഒന്നാകെയാണ്. ഈ തകർന്ന സ്വപ്നങ്ങളുടെ ചിത്രങ്ങൾ പകർത്തിയാണ് മുണ്ടക്കൈയിലും ചൂരൽമലയിലും കാമറയുമായുള്ള അലച്ചിൽ തുടർന്നത്.

 

 

ഒരു പ്രദേശമൊന്നാകെ മണ്ണും വെള്ളവും വിഴുങ്ങിയപ്പോൾ ഒരാൾ പോലും അതിൽപ്പെടാതെ പോകട്ടെയെന്ന ഉള്ളുലയ്ക്കുന്ന പ്രാർഥനയായിരുന്നു മനസുനിറയെ. തകർന്നടിഞ്ഞ സൗധങ്ങളിൽ ശേഷിപ്പുകൾ തിരയുന്നവർ, ഇനിയുള്ള ജീവിതത്തിന്റെ അർഥം അന്വേഷിക്കുകയായിരുന്നു... കാമറ കാണിച്ച് തന്നതെല്ലാം വേദനക്കാഴ്ചകൾ മാത്രമായിരുന്നു. ആരും മരിച്ചിരിക്കരുതേ എന്ന് പ്രാർഥിക്കുന്നതിനു മുമ്പു തന്നെ അതൊക്കെ സംഭവിച്ചു കഴിഞ്ഞിരുന്നു. മണ്ണിൽനന്ന് ലഭിക്കുന്ന ഓരോ മൃതദേഹങ്ങളെയും രക്ഷാപ്രവർത്തകർ എടുത്തുകൊണ്ട് വന്ന് കിടത്തുന്നത് കാമറയിൽ  പകർത്തുമ്പോൾ ഇതിൽ ഒരാളെങ്കിലുമൊന്ന് ശ്വാസം അയച്ചിരുന്നെങ്കിലെന്ന് കൊതിച്ചിട്ടുണ്ട്..

 

 

 

 

 

 

 

 

 

 

 

നിധീഷ് കൃഷ്ണൻ, ഫോട്ടോഗ്രാഫർ