കൊച്ചി: ബിജെപി പ്രവര്‍ത്തകന്‍ കണ്ണൂർ മുഴുപ്പിലങ്ങാട് സുരജ് വധക്കേസില്‍ സിപിഎം പ്രവര്‍ത്തകന്‍ പിഎം മനോരാജന്റെ ജീവപര്യന്തം ശിക്ഷ ഹൈക്കോടതി റദ്ദാക്കി. വിചാരക്കോടതിയുടെ വിധിയില്‍ പിഴവുണ്ടെന്ന് നിരീക്ഷിച്ച കോടതി കേസിലെ അഞ്ചാം പ്രതിക്ക് ഉപാധികളോടെ ജാമ്യവും അനുവദിച്ചു. 

സിപിഎം വിട്ട് ബിജെപിയില്‍ ചേര്‍ന്നതിന്റെ വൈരാഗ്യത്തില്‍ സൂരജിനെ കൊലപ്പെടുത്തിയെന്നാണ് കേസ്. 2005 ആഗസ്റ്റ് ഏഴിനായിരുന്നു സംഭവം. കേസില്‍ ആദ്യം സമര്‍പ്പിച്ച പ്രതിപ്പട്ടികയില്‍ മനോരാജിന്റെ പേരില്ലായിരുന്നു. പിന്നീട് മറ്റൊരു പ്രതിയുടെ മൊഴിയുടെ അടിസ്ഥാനത്തിലാണ് മനോരാജിനെ പ്രതിചേര്‍ത്തത്. കേസില്‍ കോടതി വീണ്ടും വാദം കേള്‍ക്കും. ശേഷമായിരിക്കും അന്തിമ ശിക്ഷാവിധി. 

സൂരജ് വധക്കേസില്‍ ആകെ 12 പ്രതികളാണ് ഉണ്ടായിരുന്നത്. ഇതില്‍ രണ്ടുമുതല്‍ 9 വരെയുള്ള പ്രതികള്‍ക്ക് ജീവപര്യന്തം ശിക്ഷയാണ് വിധിച്ചത്. തലശ്ശേരി പ്രിന്‍സിപ്പല്‍ സെഷന്‍സ് കോടതിയാണ് ശിക്ഷ വിധിച്ചത്. ഇതിനെതിരെയാണ് ഹൈക്കോടതിയില്‍ അപ്പീല്‍ നല്‍കിയത്. ഒന്ന്, 12 പ്രതികള്‍ വിചാരണക്കിടെ മരിച്ചു. പത്താം പ്രതിയെ കുറ്റക്കാരനല്ലെന്ന് കണ്ടെത്തി വെറുതെ വിട്ടിരുന്നു. 

മുഖ്യമന്ത്രിയുടെ പ്രസ് സെക്രട്ടറി പിഎം മനോജിന്റെ സഹോദരനാണ് മനോരാജ്. മാര്‍ച്ചില്‍ ശിക്ഷിക്കപ്പെട്ട മനോരാജിന്റെ ശിക്ഷ മരവിപ്പിക്കുമ്പോള്‍ പ്രതി 15 ദിവസത്തെ പരോളിലായിരുന്നു. 

ALSO READ: 'സിയാല്‍ പൊതുസ്വത്ത്'; കൊച്ചി രാജ്യാന്തര വിമാനത്താവളം വിവരാവകാശ പരിധിയില്‍ ഉള്‍പ്പെടും; എതിര്‍വാദം തള്ളി ഹൈക്കോടതി

Kerala High Court has set aside the life imprisonment awarded to CPM worker P.M. Manoranjan in the murder case of BJP activist Muzhappilangad Suraj.