ജലേശ്വർ (ഒഡിഷ): മതപരിവർത്തനം ആരോപിച്ച് മലയാളി വൈദികർക്കും കന്യാസ്ത്രീകൾക്കും നേരെ ബജ്‌റംഗ് ദൾ ആക്രമണം. ഒഡിഷയിലെ ജലേശ്വറിൽ ആണ് ക്രൂരമായ ആക്രമണം നടന്നത്. ജലേശ്വറിലെ പാരിഷ് പ്രീസ്റ്റ് ഫാ. ലിജോ നിരപ്പേൽ, ബാലസോറിലെ ജോഡാ പാരിഷിലെ ഫാ. വി. ജോജോ എന്നിവർക്കാണ് മർദനമേറ്റത്. കന്യാസ്ത്രീകൾക്ക് നേരെയും അതിക്രമം ഉണ്ടായതായി റിപ്പോർട്ട്.

ഛത്തീസ്‌ഗഢിൽ മലയാളി കന്യാസ്ത്രീകളെ മതപരിവർത്തന ആരോപണത്തിൽ ജയിലിലടച്ച സംഭവത്തിന്റെ പശ്ചാത്തലത്തിലാണ് പുതിയ ആക്രമണ വാർത്ത പുറത്ത് വന്നത്. ഇന്നലെ വൈകിട്ട് ഒരു മതവിശ്വാസിയുടെ ചരമവാർഷിക ചടങ്ങിൽ പങ്കെടുക്കാൻ എത്തിയ വൈദികരുടെയും കന്യാസ്ത്രീകളുടെയും സംഘത്തിന് നേരെയാണ് ആക്രമണം നടന്നത്. ചടങ്ങിന് ശേഷം ഭക്ഷണം കഴിച്ച് രാത്രി 9 മണിയോടെ മടങ്ങാനിരുന്ന സംഘത്തെ, ആളൊഴിഞ്ഞ പ്രദേശത്ത് 70-ലധികം ബജ്‌റംഗ് ദൾ സംഘമാണ് തടഞ്ഞ് ആക്രമണം അഴിച്ചു വിട്ടത്.

വാഹനങ്ങൾ തടഞ്ഞ് നിർത്തുകയും ശേഷം ബജ്‌റംഗ് ദൾ സംഘം വൈദികരെയും കന്യാസ്ത്രീകളെയും അസഭ്യം വിളിക്കുകയും മർദിക്കുകയും ചെയ്തു. ഇരുചക്രവാഹനത്തിൽ എത്തിയ ഒരു വൈദികനെ പ്രവർത്തകർ ക്രൂരമായി മർദിച്ചതായും പരാതിയിൽ പറയുന്നു. മതപരിവർത്തനം ആരോപിച്ചാണ് ആക്രമണം നടത്തിയത്. “ഇവിടെ ബിജെഡി അല്ല, ബിജെപിയാണ് ഭരിക്കുന്നത്. ആരേയും അമേരിക്കക്കാരാക്കാൻ നിനക്ക് കഴിയില്ല,” എന്ന് പറഞ്ഞാണ് മർദനം നടത്തിയതെന്ന് വൈദികർ വെളിപ്പെടുത്തി.

ALSO READ: ഇൻഷുറൻസ് ഇല്ലാതെ വാഹനം റോഡിലിറക്കിയാൽ പണി പാളും; പിഴ തുക മൂന്ന് മുതൽ അഞ്ചിരട്ടി വരെയായി ഉയരും

വൈദികർ മതപരിവർത്തനത്തിനല്ല വന്നതെന്ന് ഗ്രാമവാസികൾ ആവർത്തിച്ച്  വിശദീകരിച്ചെങ്കിലും ബജ്‌റംഗ് ദൾ സംഘം അത് ഗൗനിച്ചില്ല. ഏകദേശം 45 മിനിറ്റിന് ശേഷം പൊലിസ് സംഭവ സ്ഥലത്തെത്തിയപ്പോഴാണ് ബജ്‌റംഗ് ദൾ സംഘം പിരിഞ്ഞുപോയത്. സംഭവത്തിൽ പരാതി രജിസ്റ്റർ ചെയ്തതായി പൊലിസ് അറിയിച്ചു.

ALSO READ: ജൂലൈയിൽ ഏറ്റവും കൂടുതൽ വിറ്റഴിക്കപ്പെട്ട കാറുകൾ; ക്രെറ്റയെ പിന്നിലാക്കി മാരുതിയുടെ സൂപ്പർ താരം; മൈലേജ് തന്നെ മുഖ്യം

In Odisha's Jaleswar, over 70 Bajrang Dal activists attacked Malayali priests Fr. Lijo Nirappel and Fr. V. Jojo, along with nuns, alleging religious conversion. The group, returning from a memorial ceremony, faced assault and verbal abuse. Police intervened after 45 minutes, dispersing the attackers