ഇ.പി മുഹമ്മദ്

കോഴിക്കോട്: ആരോപണങ്ങളെ തുടർന്ന് പ്രതിക്കൂട്ടിലായ രാഹുൽ മാങ്കൂട്ടത്തിൽ എം.എൽ.എ യൂത്ത് കോൺഗ്രസ് അധ്യക്ഷപദവി രാജിവച്ചതിനെ തുടർന്ന് പുതിയ അധ്യക്ഷനായി ചർച്ചകൾ തകൃതി. സംഘടനാ തെരഞ്ഞെടുപ്പിലൂടെ തെരഞ്ഞെടുക്കപ്പെട്ട പ്രസിഡന്റ് രാജിവച്ചാൽ രണ്ടാമത് എത്തിയ വൈസ് പ്രസിഡന്റിന് ചുമതല നൽകണമെന്നാണ് ചട്ടം. 
വൈസ് പ്രസിഡന്റുമാരിൽ ഏറ്റവും കൂടുതൽ വോട്ട് നേടിയത് അബിൻ വർക്കിയാണ്. ഇതുപ്രകാരം അബിൻ വർക്കിക്ക് താൽക്കാലിക ചുമതല നൽകിയേക്കും.

അതേസമയം, സ്ഥിരം അധ്യക്ഷനായി അബിനെ ചുമതലപ്പെടുത്തുന്ന കാര്യത്തിൽ തീരുമാനം വൈകും. സാമുദായിക, ഗ്രൂപ്പ്  സമവാക്യങ്ങളാണ് ഇക്കാര്യത്തിൽ വിലങ്ങുതടി. കെ.പി.സി.സി പ്രസിഡന്റും കെ.എസ്.യു പ്രസിഡന്റും ക്രിസ്ത്യൻ സമുദായത്തിൽ നിന്നായതിനാൽ അതേ സമുദായത്തിൽ നിന്നുള്ളയാളെ യൂത്ത് കോൺഗ്രസ് അധ്യക്ഷനാക്കുന്നത് സാമുദായിക സന്തുലനത്തെ ബാധിക്കുമെന്ന വിലയിരുത്തലിലാണ് നേതൃത്വം. 

അതിനാൽ സംഘടനാ തെരഞ്ഞെടുപ്പിന്റെ ചട്ടങ്ങൾ പരിഗണിക്കാതെ സംസ്ഥാനത്തെ പാർട്ടിക്ക് ഗുണകരമായ രീതിയിൽ ഹൈക്കമാൻഡ് തീരുമാനം ഉണ്ടാവണമെന്നാണ് ഒരുവിഭാഗം നേതാക്കളുടെ നിലപാട്. എന്നാൽ, സാമുദായിക പ്രാതിനിധ്യം ചൂണ്ടിക്കാട്ടി അബിൻ വർക്കിക്ക് പകരം മറ്റൊരാള കൊണ്ടുവരുന്നത് അനീതിയാവുമെന്ന അഭിപ്രായവും പാർട്ടിയിൽ ശക്തമാണ്. 
സംഘടനാതലത്തിൽ രാഹുലിനൊപ്പം ഉയർന്നുവന്ന നേതാവാണ് അബിൻ. പാർട്ടി പ്രവർത്തനത്തിലും ചാനൽ ചർച്ചകളിലും മികച്ച പ്രകടനം കാഴ്ചവയ്ക്കുന്ന അബിൻ വർക്കി തന്നെയാണ് ഈ പദവിക്ക് ഏറ്റവും അനുയോജ്യനെന്നും ഇവർ ചൂണ്ടിക്കാട്ടുന്നു. 
അബിൻ വർക്കിയെ പ്രസിഡന്റാക്കുന്നതിനോടാണ് യൂത്ത് കോൺഗ്രസ് ദേശീയ നേതൃത്വത്തിന് താൽപര്യം. എ ഗ്രൂപ്പുകാരനായ രാഹുൽ രാജിവച്ച പദവി അതേ ഗ്രൂപ്പിന് തന്നെ നൽകണമെന്ന ആവശ്യവും ശക്തമാണ്. കെ.എസ്.യു മുൻ സംസ്ഥാന പ്രസിഡന്റ് കെ.എം അഭിജിത്തിനെയാണ് എ ഗ്രൂപ്പ് പ്രസിഡന്റ് സ്ഥാനത്തേക്ക് ഉയർത്തിക്കാട്ടുന്നത്. ഈയിടെ പുനഃസംഘടിപ്പിച്ച യൂത്ത് കോൺഗ്രസ് ദേശീയ കമ്മിറ്റിയിൽ അഭിജിത്തിനെ ഉൾപ്പെടുത്താത്തത് ഏറെ വിമർശനത്തിന് ഇടയാക്കിയിരുന്നു. ഈ സാഹചര്യം കൂടി പരിഗണിച്ച് അഭിജിത്തിനെ പ്രസിഡന്റാക്കണമെന്നാണ് എ വിഭാഗം ആവശ്യപ്പെടുന്നത്.

അതേസമയം, മറ്റു പേരുകളും നേതൃത്വത്തിന്റെ പരിഗണനയിലുണ്ട്. തൃശൂരിൽ നിന്നുള്ള വൈസ് പ്രസിഡന്റ് ഒ.ജെ ജനീഷ്, ഈയിടെ ദേശീയ സെക്രട്ടറിയായ ബിനു ചുള്ളിയിൽ എന്നിവർക്കൊപ്പം കെ.എസ്.യു മുൻ നേതാവ് ജെ.എസ് അഖിലിന്റെ പേരും ചർച്ചയാകുന്നുണ്ട്.