കെയ്റോ: ഗസ്സയിൽ യു.എസിന്റെ സമാധാന പദ്ധതി സംബന്ധിച്ച് ഇസ്റാഈലും ഹമാസും തമ്മിലുള്ള പരോക്ഷ ചർച്ചകളുടെ ആദ്യദിനം പോസിറ്റീവ് ആണെന്ന് റിപ്പോർട്ട്. ഈജിപ്ത് തലസ്ഥാനമായ കെയ്റോയിൽ നടക്കുന്ന ചർച്ചയുടെ ആദ്യദിനമാണ് പ്രതീക്ഷ നൽകുന്നതാണെന്ന് വ്യക്തമാക്കിയത്. 

തിങ്കളാഴ്ച ചെങ്കടൽ റിസോർട്ട് നഗരമായ ശാം എൽ-ഷൈഖിൽ നടന്ന കൂടിക്കാഴ്ച "പോസിറ്റീവ്" ആയിരുന്നുവെന്നും നിലവിലെ ചർച്ചകൾ എങ്ങനെ തുടരുമെന്നതിനുള്ള ഒരു രൂപരേഖ തയ്യാറാക്കിയിട്ടുണ്ടെന്നും വൃത്തങ്ങൾ അറിയിച്ചു. ചർച്ച ഇന്നും തുടരും. ശാം അൽ ഷെയ്ഖിലാണ് ചർച്ച നടക്കുന്നത്. ഗസ്സയിൽ വെടിനിർത്തുക, ഇസ്റാഈൽ സൈന്യത്തെ ഗസ്സയിൽനിന്ന് പിൻവലിക്കുക, തടവുകാരെ കൈമാറുക എന്നീ ദൗത്യങ്ങളാണ് സമാധാന കരാറിന്റെ ഭാഗമായുള്ളത്.

ALSO READ: ഇസ്‌റാഈൽ തന്നെ പറയുന്നു; ഗസ്സയിൽ നടക്കുന്നത് വംശഹത്യ തന്നെ - കൊടും ക്രൂരതയുടെ രണ്ടാണ്ട്

കഴിഞ്ഞ മാസം ഖത്തറിൽ അഞ്ച് പേരുടെ മരണത്തിനിടയാക്കിയ ഇസ്രാഈലി വധശ്രമത്തിൽ നിന്ന് രക്ഷപ്പെട്ട ഹമാസ് നേതാക്കളായ ഖലീൽ അൽ-ഹയ്യ , സഹെർ ജബാരിൻ എന്നിവരാണ് ചർച്ചയിൽ ഹമാസിനെ പ്രതിനിധീകരിക്കുന്നത്. റോൺ ഡെർമറാണ് ഇസ്റാഈലിനെ പ്രതിനിധീകരിച്ച് യോഗത്തിൽ പങ്കെടുക്കുന്നത്. ഇസ്റാഈലിന്റെയും ഹമാസിന്റെയും ഉദ്യോഗസ്ഥ സംഘവും യോഗത്തിൽ സംബന്ധിക്കുന്നുണ്ട്. 

ഗസ്സയിൽ ഇസ്‌റാഈൽ തുടർച്ചയായി ബോംബാക്രമണം നടത്തുന്നത് തടവുകാരെ മോചിപ്പിക്കുന്നതിനുള്ള ചർച്ചകൾക്ക് വെല്ലുവിളി ഉയർത്തുന്നുവെന്ന് ഹമാസ് പ്രതിനിധി സംഘം മധ്യസ്ഥരോട് പറഞ്ഞതായി അൽ ജസീറ അറബിക് റിപ്പോർട്ട് ചെയ്തു. ആദ്യ ദിവസത്തെ ചർച്ചകളിൽ തടവുകാരുടെയും ബന്ദികളുടെയും കൈമാറ്റം, വെടിനിർത്തൽ, ഗസ്സയിലേക്ക് പ്രവേശിക്കുന്ന മാനുഷിക സഹായം എന്നിവ ഉൾപ്പെട്ടിരുന്നുവെന്ന് ഈജിപ്തിലെ അൽ-ഖഹേര ന്യൂസ് റിപ്പോർട്ട് ചെയ്തു.

ALSO READ: ഗസ്സയിലെ കൊടുംക്രൂരത: എസ്.കെ.എസ്.എസ്.എഫ് പ്രതിഷേധത്തെരുവ് ഇന്ന്

അതേസമയം, ഗസ്സയിൽ വെടിനിർത്തിയെന്ന് യു.എസ് അവകാശപ്പെടുമ്പോഴും ഇസ്റാഈൽ ആക്രമണം തുടരുകയുമാണ്. ഇസ്റാഈൽ ആക്രമണത്തിൽ ഇന്നലെ 24 പേർ കൊല്ലപ്പെട്ടു. വടക്കൻ ഗസ്സയിൽ സഹായ വിതരണ കേന്ദ്രത്തിന് സമീപം സഹായം സ്വീകരിക്കാനെത്തിയ നാലു പേരെ ഇസ്റാഈൽ സൈന്യം വെടിവച്ചു കൊന്നു.