ബാലുശ്ശേരി: പഞ്ചായത്തിലെ കരിയാണിമല, ഉപ്പൂത്തിപ്പാറ കരിങ്കല്‍ ക്വാറിയുടെ പ്രവര്‍ത്തനം നിര്‍ത്തിവയ്ക്കാന്‍ കേരള ഹൈക്കോടതി ഉത്തരവ്. ക്വാറിയുടെ പ്രവര്‍ത്തനം ജനജീവിതം തകരാറിലാക്കുന്നുവെന്നു കാണിച്ചു പ്രദേശവാസികളായ കോളിയോട്ടുമലയില്‍ ചെക്കു, കെ.എം ബാലന്‍, പി.കെ ശ്രീജിത്ത് എന്നിവര്‍ നല്‍കിയ പരാതിയുടെ അടിസ്ഥാനത്തിലാണു ഹൈക്കോടതിയുടെ ഇടക്കാല ഉത്തരവ്. ജിയോളജിക്കല്‍ വകുപ്പിന്റെയും പരിസ്ഥിതിയുടെയും അനുമതിയില്ലാതെ കരിങ്കല്‍ ഖനനം നടത്തരുതെന്നും ഉത്തരവില്‍ പറയുന്നു.
അതേസമയം, കരിയാണി മലയില്‍ അനധികൃതമായി കരിങ്കല്‍ ഖനനം നടത്തുന്നതിനെതിരേ നന്മണ്ട ലോക്കല്‍ സി.പി.എം കമ്മിറ്റി നടത്തിവരുന്ന സമരം 20 ദിവസം പിന്നിട്ടു. ക്വാറിയുടെ പ്രവര്‍ത്തനം നന്മണ്ട പഞ്ചായത്തിലെ കോളിയോട് മലയിലെ ആദിവാസി കോളനിക്കാരുടെ ജീവിതം ദുരിതപൂര്‍ണമാക്കുന്നതായി ആക്ഷേപമുയര്‍ന്നിരുന്നു. പ്രശ്‌നം പരിഹരിക്കുന്നതിന് സി.പി.എം ശ്രമം നടത്തിയെങ്കിലും എങ്ങുമെത്തിയില്ല. കോളനിവാസികള്‍ക്ക് പാര്‍ട്ടിയോടുള്ള അകല്‍ച്ചയ്ക്ക് ഇതു കാരണമായതിനെ തുടര്‍ന്നാണ് ഇപ്പോള്‍ സി.പി.എം സമരം ഏറ്റെടുത്തത്.