ദമാം: സുപ്രഭാതം പത്രം 12-ാം വാർഷിക സഊദി തല പ്രചരണ കാംപയിൻ അവസാനിച്ചു. സമസ്തയുടെ ഗൾഫ് പോഷക ഘടകമായ സഊദിയിലെ സമസ്ത ഇസ്‌ലാമിക് സെന്ററിന്റെ (എസ്‌ഐസി) നേതൃത്വത്തിൽ ഒരു മാസം നീണ്ടു നിന്ന കാംപയിൻ അവസാനിച്ചതോടെ റെക്കോർഡ് വർധവ് ആണ് സഊദിയിൽ നിന്നുണ്ടായിരിക്കുന്നത്. കഴിഞ്ഞ വർഷത്തേക്കാൾ ഇരട്ടിയിൽ അധികം കോപ്പികളുടെ വർധനവ് ആണ് സഊദിയിൽ നിന്ന് ഈ വർഷമുണ്ടായത്.

സെൻട്രൽ കമ്മിറ്റികളിൽ ടാർഗറ്റ് ചെയ്ത വരിക്കാരെക്കാൾ ഇരട്ടിയിലധികം വരിക്കാരെ ചേർത്ത് ഏറ്റവും മുന്നിൽ നിൽക്കുന്നത് യാംബു സെൻട്രൽ കമ്മിറ്റിയാണ്. സഊദിയിൽ ഏറ്റവും വരിക്കാരെ ചേർത്തത് മക്ക കമ്മിറ്റിയാണ്. ടാർഗറ്റ് ചെയ്ത വരിക്കാരെക്കാൾ 150 ശതമാനമാണ് മക്കയിൽ നിന്നുള്ള വരിക്കാർ. മൂന്നാം സ്ഥാനത്തുള്ള അൽ ലൈത്, കിഴക്കൻ സഊദിയിലെ അൽ ജുബൈൽ സെൻട്രൽ കമ്മിറ്റികൾ ടാർഗറ്റ് ചെയ്ത വരിക്കാരെക്കാൾ 120 ശതമാനവും വർധനവ് രേഖപ്പെടുത്തി. 117 ശതമാനവുമായി അൽ ഖോബാർ, 107 ശതമാനവുമായി സബ്ത്തുൽ അലായ എന്നീ സെൻട്രൽ കമ്മിറ്റികളാണ് യഥാക്രമം ടാർഗറ്റ് ചെയ്തതിനേക്കാൾ വരിക്കാരെ ചേർത്തിയത്. റിയാദ്, റാബഗ്, ഖമീസ് മുശയ്ത്, ദമാം, വാദി ദവാസിർ, ജിദ്ദ, മദീന, തായിഫ്, ലൈല അഫ്ലാജ്, അൽ ഹസ എന്നീ സെൻട്രൽ കമ്മിറ്റികളാണ് ടാർഗറ്റ് ഇനത്തിൽ ആദ്യ പതിനഞ്ച് സ്ഥാനങ്ങളിൽ എത്തിയത്.

ഇക്കഴിഞ്ഞ ഓഗസ്റ്റ് 15 ന് കിഴക്കൻ സഊദിയിലെ അൽഖോബാറിൽ സഊദി തല ഉദ്ഘാടനത്തോടെയാണ് പ്രചാരണ കാംപയിന് തുടക്കമായിരുന്നത്. കുറഞ്ഞ കാലയളവ് കൊണ്ട് തന്നെ പൊതുജനങ്ങൾക്കിടയിൽ വലിയ സ്വീകാര്യത നേടിയ പത്രമായി മാറിയ സുപ്രഭാതം പ്രചാരണ കാമ്പയിൻ പൂർണ്ണ വിജയത്തിലെത്തിക്കുന്നതിനായി സഊദിയിൽ ഉടനീളമുള്ള എസ്‌ഐസി സെൻട്രൽ, യൂണിറ്റ് കമ്മിറ്റികളുടെ നേതൃത്വത്തിൽ വിവിധ പദ്ധതികളാണ് ഒരു മാസത്തിനിടെ നടപ്പിലാക്കിയിരുന്നത്. പ്രചാരണത്തിന്റെ ഭാഗമായി വിവിധ സെൻട്രൽ കമ്മിറ്റികൾ ശ്രദ്ധേയമായ പ്രഖ്യാപനങ്ങൾ നടത്തിയിരുന്നു. സമസ്ത നൂറാം വാർഷികം നടക്കുന്ന വേളയിൽ 'നൂറാം വർഷം, നൂറ് സുപ്രഭാതം' പദ്ധതിയാണ് ഇതിൽ ഏറ്റവും ശ്രദ്ധേയം. 

സെൻട്രൽ കമ്മിറ്റികൾ പദ്ധതികൾ ഏറ്റെടുത്തതോടെ ആവേശകരമായ മുന്നേറ്റമാണ് ഉണ്ടായിട്ടുള്ളത്. നിലവിൽ സെൻട്രൽ, യൂണിറ്റ് തലങ്ങളിൽ വരിക്കാരായവർക്ക് പുറമെ നിശ്ചിത തുക സ്വീകരിച്ച് വിവിധ ജില്ലകളിലേക്ക് പത്രത്തിന്റെ കോപ്പികൾ ഒരു വർഷം മുഴുവൻ നൽകുന്ന പദ്ധതി ഏറെ വിജയകരമായിരുന്നുവെന്നും ആവേശപൂർവ്വമായാണ് പ്രവർത്തകർ പദ്ധതി ഏറ്റെടുത്തതെന്നും നേതാക്കൾ പറഞ്ഞു.