നിലമ്പൂര്‍: വഴിക്കടവില്‍ അനുജനെ കുത്തിക്കൊന്ന കേസില്‍ പ്രതിയുടെ മൊഴി. തന്നെ ഡീഅഡിക്ഷന്‍ സെന്ററില്‍ എത്തിച്ചതിന്റെ വൈരാഗ്യത്തിലാണ് അനുജന്‍ വര്‍ഗീസ് (ബാബു)വിനെ കൊന്നതെന്ന് സഹോദരന്‍ രാജു മൊഴി നല്‍കി. വെള്ളിയാഴ്ച്ച രാത്രി നടന്ന കൊലപാതകത്തില്‍ പ്രതിയെ വഴിക്കടവ് പൊലിസ് അറസ്റ്റ് ചെയ്തിരുന്നു. 

അടുത്തടുത്ത വീടുകളില്‍ താമസിച്ചിരുന്നവരാണ് വര്‍ഗീസും, രാജുവും. മൂന്ന് വര്‍ഷം മുന്‍പ് രാജുവിനെ ബന്ധുക്കള്‍ ചേര്‍ന്ന് ഡീ അഡിക്ഷന്‍ സെന്ററില്‍ പ്രവേശിപ്പിച്ചിരുന്നു. അമിത മദ്യപാനി അല്ലാത്ത തന്നെ നിര്‍ബന്ധിച്ച് ഡീ അഡിക്ഷന്‍ സെന്ററില്‍ എത്തിച്ചത് വര്‍ഗീസാണെന്ന് രാജു വിശ്വസിച്ചു. ഇതേചൊല്ലി ഇരുവരും തമ്മില്‍ തര്‍ക്കവും പതിവായിരുന്നു. 

ALSO READ: ​ഇസ്റാഈലി തടവുകാരുടെ 'ഫെയർവെൽ ചിത്രം' പോസ്റ്റ് ചെയ്ത് ഹമാസ്; നി​ഗൂഢമായി 'റോൺ അരദ്' 

വെള്ളിയാഴ്ച്ച രാത്രി പത്തോടെ വര്‍ഗീസിന്റെ വീട്ടിലേക്ക് മദ്യലഹരിയില്‍ രാജു കടന്നുകയറി. വരാന്തയിലിരുന്ന് സംസാരിച്ചിരുന്ന രാജുവിന്റെയും, വര്‍ഗീസിന്റെയും മക്കള്‍ ഇയാളെ പിന്തിരിപ്പിച്ചതോടെ രാജു സ്വന്തം വീട്ടിലേക്ക് മടങ്ങി. കുറച്ച് സമയം കഴിഞ്ഞ് കത്തിയുമായി തിരികെയെത്തിയ പ്രതി അനുജനെ കുത്തുകയായിരുന്നു. സംഭവ ശേഷം കത്തി സമീപത്തെ കാട്ടിലേക്ക് വലിച്ചെറിഞ്ഞ പ്രതി ഓടി രക്ഷപ്പെട്ടു. ബഹളം കേട്ടെത്തിയ നാട്ടുകാര്‍ ഉടന്‍ തന്നെ വര്‍ഗീസിനെ എടക്കര സ്വകാര്യ ആശുപത്രിയിലേക്ക് കൊണ്ടുപോയെങ്കിലും വഴിയില്‍ വെച്ച് മരണപ്പെടുകയായിരുന്നു. സംഭവ ശേഷം വീട്ടില്‍ ഒളിച്ചിരുന്ന രാജുവിനെ പൊലിസ് എത്തിയാണ് കസ്റ്റഡിയിലെടുത്തത്. 

അതേസമയം രാജുവിന്റെ മൊഴി കുടുംബം തള്ളി. ബാങ്കിലെ കടംവീട്ടാന്‍ രാജു വര്‍ഗീസിനോട് പലതവണ പണം ആവശ്യപ്പെട്ടിരുന്നതായും, ഇത് നല്‍കാത്തതാണ് ആക്രമണത്തിന് കാരണമെന്നും ബന്ധുക്കളും ആരോപിച്ചു.