ദുബൈ: തങ്ങളുടെ വിമാനങ്ങളില്‍ പവര്‍ ബാങ്ക് ഉപയോഗത്തിന്‍ നിരോധനം ഏര്‍പ്പെടുത്തുമെന്ന് എമിറേറ്റ്‌സ് എയര്‍ലൈന്‍സ് നേരത്തേ തന്നെ വ്യക്തമാക്കിയിരുന്നു. ഒക്ടോബര്‍ ഒന്ന് മുതല്‍ പവര്‍ ബാങ്കുകള്‍ കൊണ്ടുപോകുന്നതിനുള്ള പുതുക്കിയ നിയന്ത്രണങ്ങള്‍ പ്രാബല്യത്തില്‍ വരുമെന്ന് എമിറേറ്റസ് അധികൃതര്‍ അറിയിച്ചു. വരുന്ന ബുധനാഴ്ച മുതൽ യാത്രക്കാര്‍ക്ക് വിമാനങ്ങളില്‍ പവര്‍ ബാങ്ക് ഉപയോഗിക്കാന്‍ അനുവാദമുണ്ടാകില്ല. 

ALSO READ: 200 മീറ്റർ ഉയരത്തിലും തീ അണയ്ക്കാൻ ‘ഷഹീൻ’: ഡ്രോൺ സാങ്കേതികവിദ്യയുടെ കരുത്തുമായി ദുബൈ 

'ഒക്ടോബര്‍ ഒന്ന് മുതല്‍ എമിറേറ്റ്‌സ് വിമാനങ്ങളില്‍ പവര്‍ ബാങ്ക് ഉപയോഗിക്കുന്നതിനോ ചാര്‍ജ് ചെയ്യുന്നതിനോ അനുവാദമുണ്ടാകില്ല, യാത്രക്കാര്‍ക്ക് ഒരു പവര്‍ ബാങ്ക് കൊണ്ടുപോകാം, പക്ഷേ അത് ക്യാബിനില്‍ ആയിരിക്കണം വെക്കേണ്ടത്, ചെക്ക്ഡ് ലഗേജില്‍ പവര്‍ ബാങ്കുകള്‍ കരുതാന്‍ പാടില്ല,' എമിറേറ്റ്‌സ് എയര്‍ലൈന്‍സിന്റെ വെബ്‌സൈറ്റില്‍ പറയുന്നു.

യാത്രക്കാര്‍ അറിയേണ്ട കാര്യങ്ങള്‍

• ഓരോ യാത്രക്കാരനും ഒരു പവര്‍ ബാങ്ക് ക്യാബിന്‍ ബാഗില്‍ കരുതാം. 
• വിമാനത്തിലിരിക്കുമ്പോള്‍ ഡിവൈസുകള്‍ ചാര്‍ജ് ചെയ്യാന്‍ പവര്‍ ബാങ്കുകള്‍ ഉപയോഗിക്കാന്‍ കഴിയില്ല.
• എല്ലാ പവര്‍ ബാങ്കുകളുടേയും കപ്പാസിറ്റി റേറ്റിംഗ് കാണിക്കണം.
• സീറ്റിനടിയിലോ സീറ്റ് പോക്കറ്റിലോ മാത്രമേ ഇത് സൂക്ഷിക്കാന്‍ പാടുള്ളൂ. ഓവര്‍ഹെഡ് ലോക്കറുകള്‍ നിരോധിച്ചിരിക്കുന്നു.
• ചെക്ക്ഡ് ഇന്‍ ലഗേജില്‍ പവര്‍ ബാങ്കുകള്‍ സൂക്ഷിക്കാന്‍ പാടില്ല.

സുരക്ഷാ അവലോകത്തിന് ശേഷമാണ് എമിറേറ്റ്‌സ് നിയമത്തില്‍ മാറ്റം വരുത്തിയത്. പവര്‍ ബാങ്കുകള്‍ക്ക് എന്തെങ്കിലും സംഭവിച്ചാല്‍ അത് വലിയ അപകടങ്ങള്‍ക്ക് കാരണമായേക്കാം. തീപിടുത്തം, സ്‌ഫോടനം, വിഷവാതകം പുറത്തുവരല്‍ തുടങ്ങിയ വലിയ അപകടങ്ങള്‍ക്ക് പവര്‍ ബാങ്ക് ലീക്ക് കാരണമാകും.

വിമാനയാത്രയില്‍ ഉണ്ടാകുന്ന അപകട സാധ്യതകള്‍ കുറയ്ക്കുന്നതിനാണ് നിയമം പുതുക്കിയതെന്ന് എമിറേറ്റ്‌സ് എയര്‍ലൈന്‍സ് അധികൃതര്‍ അറിയിച്ചു.

ALSO READ: ദുബൈ ഫൗണ്ടൻ ഒക്ടോബർ ഒന്നിന് വീണ്ടും തുറക്കും; സ്ഥിരീകരണവുമായി ഇമാർ 

വിമാനങ്ങളില്‍ പവര്‍ ബാങ്കുകള്‍ അപകടകരമാകുന്നതിന് കാരണം ഇത്

ഇലക്ട്രോഡുകള്‍ ചാര്‍ജ് ചെയ്യുമ്പോഴും ഡിസ്ചാര്‍ജ് ചെയ്യുമ്പോഴും അവയ്ക്കിടയിലുള്ള അയോണുകളുടെ പ്രവാഹം മൂലമാണ് പവര്‍ ബാങ്കുകള്‍ പ്രവര്‍ത്തിക്കുന്നത്.

'ഒരു ബാറ്ററി അമിതമായി ചാര്‍ജ്ജ് ചെയ്യപ്പെടുകയോ കേടാകുകയോ ചെയ്താല്‍, അത് 'തെര്‍മല്‍ റണ്‍അവേ'ക്ക് കാരണമാകും,' എമിറേറ്റ്‌സ് വിശദീകരിച്ചു.

ഒരു ബാറ്ററി തണുക്കുന്നതിനേക്കാള്‍ വേഗത്തില്‍ താപം ഉത്പാദിപ്പിക്കുകയും, അത് വേഗത്തിലും അനിയന്ത്രിതമായും താപനില വര്‍ദ്ധനവിന് കാരണമാവുകയും ചെയ്യുമ്പോഴാണ് തെര്‍മല്‍ റണ്‍അവേ സംഭവിക്കുന്നത്. ഇത് തീപിടുത്തം, സ്‌ഫോടനം, വിഷവാതകങ്ങള്‍ പുറത്തുവിടല്‍ എന്നിവയ്ക്ക് കാരണമാകും. ഇത് വിമാനത്തിനുള്ളില്‍ ഉപയോഗിക്കുന്നത് അപകട സാധ്യത വര്‍ധിപ്പിക്കുന്നു.

Starting October, Emirates will enforce a new regulation prohibiting passengers from carrying a specific item in their luggage. The airline has advised travelers to comply to avoid issues during travel.