ഷാര്‍ജ: എമിറേറ്റിലെ നിരവധി പേരെ കബളിപ്പിച്ച സൈബര്‍ തട്ടിപ്പ് ശൃഖലയെ തകര്‍ത്ത് ഷാര്‍ജ പൊലിസ്. സൈബര്‍ തട്ടിപ്പിന്റെ ഭാഗമായ 13 ഏഷ്യന്‍ പ്രതികളെ പൊലിസ് അറസ്റ്റു ചെയ്തു. ഓണ്‍ലൈന്‍ ലിസ്റ്റിംഗ്, മീറ്റിംഗുകള്‍, കരാറുകള്‍ എന്നിവയിലൂടെ ഉപയോക്താക്കളുടെ വിശ്വാസം നേടിയ ശേഷം പണം തട്ടുകയും ഇത് വിദേശത്തേക്ക് അയക്കുന്നതുമായിരുന്നു ഇവരുടെ രീതി.

ALSO READ: യാത്രക്കാര്‍ ഈ വസ്തു കൈയില്‍ കരുതരുത്; ഒക്ടോബര്‍ മുതല്‍ പുതിയ നിയമം പ്രാബല്യത്തില്‍ വരുമെന്ന് എമിറേറ്റ്‌സ്

പ്രധാനമായും ഏഴ് സ്ഥലങ്ങള്‍ കേന്ദ്രീകരിച്ചാണ് തട്ടിപ്പ് നടന്നിരുന്നത്. വ്യാജ വാടക പരസ്യം വഴി ആളുകളെ കബളിപ്പിക്കുന്നതായിരുന്നു തട്ടിപ്പ് രീതി. വാടക പരസ്യം കണ്ട് വിളിക്കുന്ന ആളുകളുടെ വിശ്വാസം പിടിച്ചുപറ്റുന്ന രീതിയില്‍ സംസാരിക്കുകയും തുടര്‍ന്ന് ക്യാഷ് ടോക്കണുകള്‍ ആവശ്യപ്പെടുകയും വ്യാജ കരാറുകളില്‍ ഒപ്പിടീപ്പിക്കുകയും പിന്നീട് ഇരകളുടെ പണം തട്ടി ഇവരെ ഫോണില്‍ ബ്ലോക്ക് ചെയ്ത് മുങ്ങുകയുമായിരുന്നു ഇവര്‍ ചെയ്തിരുന്നത്.

വ്യാജ റിയല്‍ എസ്‌റ്റേറ്റ് പരസ്യം കണ്ട് തട്ടിപ്പിനിരയായ ഒരു ഉപയോക്താവ് പരാതി നല്‍കിയതിനെ തുടര്‍ന്നാണ് അന്വേഷണം ആരംഭിച്ചതെന്ന് ഡയറക്ടറേറ്റ് ഓഫ് ഇന്‍വെസ്റ്റിഗേഷന്‍സ് ആന്‍ഡ് ക്രിമിനല്‍ ഇന്‍വെസ്റ്റിഗേഷന്‍സ് ഡയറക്ടര്‍ കേണല്‍ ഡോ. ഖലീഫ ബല്‍ഹായ് വ്യക്തമാക്കി. പരസ്യം കണ്ട് ഒരു അപ്പാര്‍ട്ട്‌മെന്റ് വാടകയ്ക്ക് എടുക്കാന്‍ തട്ടിപ്പുകാരെ ബന്ധപ്പെട്ട ഉപയോക്താവ് അവര്‍ പറഞ്ഞ രേഖകളില്‍ ഒപ്പ് വയ്ക്കുകയും പണം നല്‍കുകയും ചെയ്തിരുന്നു. എന്നാല്‍ തട്ടിപ്പുകാര്‍ ഇയാളെ ബ്ലോക്ക് ചെയ്ത് മുങ്ങുകയായിരുന്നു.

ഫോണ്‍ നമ്പറുകള്‍ ഇടയ്ക്കിടെ മാറ്റി തട്ടിപ്പുകാര്‍ പൊലിസിനെ കബളിപ്പിക്കാന്‍ ശ്രമിച്ചെങ്കിലും അതിവിദഗ്ധമായി ഷാര്‍ജ പൊലിസ് ഇവരെ പൂട്ടുകയായിരുന്നു. അതോറിറ്റിയുടെ ഡിജിറ്റല്‍ നിരീക്ഷണവും വൈദഗ്ധ്യവുമാണ് എല്ലാ പ്രതികളെയും പിടികൂടാന്‍ സഹായിച്ചത്. പൊതുജന സുരക്ഷ ഉറപ്പാക്കാന്‍ അത്യാധുനിക ഉപകരണങ്ങള്‍ പ്രയോജനപ്പെടുത്തിയ ഫീല്‍ഡ് ടീമിന്റെയും പൊലിസ് നേതൃത്വത്തിന്റെയും സമര്‍പ്പണത്തെയും അദ്ദേഹം പ്രശംസിച്ചു.

ALSO READ: 200 മീറ്റർ ഉയരത്തിലും തീ അണയ്ക്കാൻ ‘ഷഹീൻ’: ഡ്രോൺ സാങ്കേതികവിദ്യയുടെ കരുത്തുമായി ദുബൈ 

പണം അടയ്ക്കുന്നതിന് മുമ്പ് വെബ്‌സൈറ്റുകളിലും സോഷ്യല്‍ മീഡിയ പ്ലാറ്റ്‌ഫോമുകളിലും പോസ്റ്റ് ചെയ്യുന്ന റിയല്‍ എസ്‌റ്റേറ്റ് പരസ്യങ്ങളുടെ ആധികാരികതയും ഇടനിലക്കാരുടെ വിശ്വാസ്യതയും പരിശോധിക്കണമെന്ന് ഷാര്‍ജ പൊലിസ് താമസക്കാരോട് അഭ്യര്‍ത്ഥിച്ചു.

Sharjah Police dismantled a cyber fraud network involved in fake rental scams, arresting 13 individuals. The operation targeted criminals deceiving victims with fraudulent rental agreements, ensuring enhanced online safety.