ന്യൂഡൽഹി: രാജ്യം ഇന്റർമീഡിയറ്റ് റേഞ്ച് അഗ്നി-പ്രൈം മിസൈലിന്റെ (Agni-Prime Missile) പരീക്ഷണ വിക്ഷേപണം വിജയകരമായി നടത്തി. റെയിൽ അധിഷ്ഠിത മൊബൈൽ ലോഞ്ചർ സിസ്റ്റത്തിൽ നിന്നാണ് ഇന്ത്യ വ്യാഴാഴ്ച വിജയകരമായി ദൗത്യം പൂർത്തീകരിച്ചത്. ദേശീയ റെയിൽവേ ശൃംഖലയുമായി സംയോജിപ്പിച്ച് പ്രത്യേകം രൂപകൽപ്പന ചെയ്ത ഒരു പ്ലാറ്റ്‌ഫോം ഉപയോഗിച്ച് ഇത്തരമൊരു വിക്ഷേപണം നടത്തുന്നത് ഇതാദ്യമായാണ്. ഓടിക്കൊണ്ടിരിക്കുന്ന ട്രെയിനിൻറെ കോച്ചിൽ നിന്ന് മിസൈൽ പരീക്ഷണം നടത്തിയാണ് ഡിആർഡിഒ ചരിത്രത്തിൽ ഇടംപിടിച്ചത്.

പ്രതിരോധ മന്ത്രി രാജ്‌നാഥ് സിംഗ് പരീക്ഷണം വിജയകരമായിരുന്നെന്ന് എക്‌സിലെ ഒരു പ്രസ്താവനയിൽ സ്ഥിരീകരിച്ചു. ഇന്ത്യയുടെ വളർന്നുവരുന്ന തന്ത്രപരമായ പ്രതിരോധ ശേഷി പ്രകടമാക്കുന്ന 'ഇത്തരത്തിലുള്ള ആദ്യത്തെ വിക്ഷേപണം എന്നാണ് പ്രതിരോധ മന്ത്രി ദൗത്യത്തെ വിശേഷിപ്പിച്ചത്. ഡോ. എപിജെ അബ്ദുൾ കലാം ദ്വീപിൽ നിന്നാണ് മിസൈലിന്റെ നൂതന കഴിവുകൾ പ്രദർശിപ്പിച്ചുകൊണ്ട് പരീക്ഷണം നടത്തിയത്.

പ്രത്യേകം രൂപകൽപ്പന ചെയ്ത റെയിൽ അധിഷ്ഠിത മൊബൈൽ ലോഞ്ചറിൽ നിന്ന് എളുപ്പത്തിൽ മിസൈലുകൾ വിക്ഷേപിക്കാൻ സാധിക്കും. വലിയ മുന്നൊരുക്കങ്ങൾ ആവശ്യമില്ലാത്തതിനാൽ പെട്ടെന്നുള്ള ആക്രമണത്തിന് ഇത് സഹായിക്കും. റെയിൽ ശൃംഖലയിൽ സഞ്ചരിക്കാനുള്ള കഴിവുള്ളതിനാൽ രാജ്യത്തെ ഏത് കോണിലേക്കും ഇതിനെ എത്തിക്കാൻ സാധിക്കും. 

ALSO READ: അരനൂറ്റാണ്ടിനു ശേഷം മനുഷ്യൻ വീണ്ടും ചന്ദ്രനിലേക്ക് പറക്കുന്നു; നാസയുടെ ആർട്ടെമിസ് 2 ദൗത്യം ഫെബ്രുവരിയിൽ

മിസൈലിന്റെ കാനിസ്റ്ററൈസ്ഡ് ഡിസൈൻ എളുപ്പത്തിൽ കൊണ്ടുപോകാനും സംഭരിക്കാനും അനുവദിക്കുന്ന തരത്തിലാണ് ഡിസൈൻ ചെയ്തിട്ടുള്ളത്. അതിനാൽ വിക്ഷേപണ തയ്യാറെടുപ്പുകൾക്ക് ആവശ്യമായ സമയം ഗണ്യമായി കുറയും. മുൻപ് നടത്തിയ പരീക്ഷണങ്ങളിൽ അഗ്നി-പി മിസൈൽ ഉയർന്ന കൃത്യത പ്രകടിപ്പിച്ചിട്ടുണ്ട്. ഇത് ഇന്ത്യക്ക് ചുറ്റുമുള്ള ഭീഷണികൾക്കെതിരെ താക്കീതായി മാറുന്നു.

മിസൈലിന്റെ പ്രകടനവും കഴിവുകളും സാധൂകരിക്കുന്നതിനായി ഡിആർഡിഒ കൂടുതൽ പരീക്ഷണങ്ങൾ നടത്തുമെന്നാണ് റിപ്പോർട്ട്. പ്രീ-ഇൻഡക്ഷൻ പരീക്ഷണങ്ങൾ പൂർത്തിയാക്കിയ ശേഷം അഗ്നി-പി മിസൈൽ ഇന്ത്യൻ സായുധ സേനയിൽ ഉൾപ്പെടുത്തിയേക്കും.