വാഷിങ്ടൺ: അരനൂറ്റാണ്ടിനു ശേഷം ആദ്യമായി ചന്ദ്രനിലേക്ക് മനുഷ്യനെ അയക്കുന്ന പദ്ധതി അടുത്ത വർഷം ഫെബ്രുവരിയിൽ നടത്താൻ നാസ. ആർട്ടെമിസ് 2 ദൗത്യം ആർട്ടെമിസ് പദ്ധതിയുടെ ഭാഗമായ രണ്ടാമത്തെ വിക്ഷേപണമാണ്. ആദ്യ ദൗത്യത്തിൽ ആളില്ലാത്ത പേടമായിരുന്നു വിക്ഷേപിച്ചത്. 2022 നവംബറിലായിരുന്നു ഇത്. ചന്ദ്രനു ചുറ്റും സഞ്ചരിച്ച ശേഷം പേടകം ഭൂമിയിൽ തിരിച്ചിറങ്ങി. ആർട്ടെമിസ് രണ്ടാം ദൗത്യത്തിൽ പേടകത്തിൽ 4 സഞ്ചാരികളുമുണ്ടാകും. ഇവരുടെ സുരക്ഷ പ്രധാനമാണെന്ന് നാസ ആക്ടിങ് ഡെപ്യൂട്ടി അസോസിയേറ്റ് അഡ്മിനിസ്ട്രേറ്റർ ലകിയേഷ ഹ്വാകിൻസ് പറഞ്ഞു. നാസയിലെ റെയഡ് വൈസ്മാൻ, വിക്ടർ ഗ്ലോവർ, ക്രിസ്റ്റിന് കോച് എന്നിവരും കനേഡിയൻ സ്പേസ് ഏജൻസിയിലെ ജെറേമി ഹൻസെനുമാണ് ആർട്ടെമിസ് 2 ലെ സഞ്ചാരികൾ.

25 ദിവസം നീണ്ടതായിരുന്നു ഒന്നാം ആർട്ടെമിസ് ദൗത്യം. സഞ്ചാരികളെ ചന്ദ്രനിൽനിന്ന് ഭൂമിയിൽ തിരിച്ചെത്തിക്കാൻ ശക്തിയേറിയ റോക്കറ്റ് വേണമെന്ന് ആർട്ടെമിസ് ലോഞ്ച് ഡയരക്ടർ ചാർളി ബ്ലാക് വെൽ തോംപ്സൺ പറഞ്ഞു. ഒറിയോൺ എന്ന പേരുള്ള ക്രൂ ക്യാപ്സൂളിന്റെ ഗ്രൗണ്ട് ടെസ്റ്റ് പരിശോധനകൾ പൂർത്തിയായി. 

ALSO READ: 75 എലികളും 1500 ഈച്ചകളും; 30 ദിവസത്തെ ബഹിരാകാശ ദൗത്യം പൂർത്തിയാക്കി തിരിച്ചെത്തി

1972ൽ അപ്പോളോ 17 ദൗത്യത്തിനുശേഷം ചന്ദ്രനിലേക്ക് മനുഷ്യർ പോയിട്ടില്ല. ചന്ദ്രനുമുകളിൽ 9,200 കി.മി വരെ ആർട്ടെമിസ് 2 ലെ യാത്രികരെത്തും. ഭൂമിയിൽനിന്ന് വിക്ഷേപിച്ച്  23 മണിക്കൂറിനു ശേഷം പേടകം ചന്ദ്രന്റെ ഭ്രമണമേഖല ലക്ഷ്യമാക്കി സഞ്ചരിക്കും. 10 ദിവസം സഞ്ചാരികൾ 9 ക്യുബിക് മീറ്റർ ചുറ്റളവിലുള്ള പേടകത്തിൽ കഴിയും.