ദുബൈ: ഏഷ്യ കപ്പ് സൂപ്പർ ഫോറിലെ അവസാന മത്സരത്തിലും ഇന്ത്യക്ക് ജയം. ത്രില്ലർ പോരാട്ടത്തിൽ ശ്രീലങ്കയെയാണ് ഇന്ത്യയെ വീഴ്ത്തിയത്. സൂപ്പർ ഓവറിലാണ് ഇന്ത്യയുടെ വിജയം. മത്സരത്തിൽ ആദ്യം ബാറ്റ് ചെയ്ത ഇന്ത്യ അഞ്ചു വിക്കറ്റ് നഷ്ടത്തിൽ 202 റൺസാണ് നേടിയത്. വിജയലക്ഷ്യം പിന്തുടർന്നിറങ്ങിയ ശ്രീലങ്ക ആറ് വിക്കറ്റ് നഷ്ടത്തിലാണ് 202 റൺസ് നേടിയത്. ഒടുവിൽ സൂപ്പർ ഓവർ വിധിയെഴുതിയ മത്സരത്തിൽ ആദ്യം ബാറ്റ് ചെയ്ത ലങ്ക രണ്ട് റൺസാണ് നേടിയത്. സൂപ്പർ ഓവറിൽ അർഷ്ദീപ് സിങ് ഇന്ത്യക്കായി രണ്ട് വിക്കറ്റുകൾ നേടിയപ്പോൾ ശ്രീലങ്കയുടെ സ്കോർ രണ്ട് റൺസിൽ അവസാനിക്കുകയിരുന്നു. മറുപടി ബാറ്റിങ്ങിൽ ക്യാപ്റ്റൻ സൂര്യകുമാർ യാദവും ശുഭ്മൻ ഗില്ലും അനായാസം വിജയം സമ്മാനിക്കുകയായിരുന്നു. 

സെഞ്ച്വറി നേടിയ പാത്തും നിസ്സങ്കയാണ് ലങ്കൻ നിരയിലെ ടോപ് സ്‌കോറർ. 57 പന്തിൽ നിന്നും 107 റൺസാണ് താരം നേടിയത്. ഏഴു ഫോറുകളും ഒരു സിക്സുമാണ് താരം നേടിയത്. കുശാൽ മെൻഡീസ്‌ അർദ്ധ സെഞ്ച്വറി നേടിയും നിർണായകമായി. 32 പന്തിൽ എട്ട് ഫോറുകളും ഒരു സിക്‌സും അടക്കം 52 റൺസാണ് നേടിയത്. 

ALSO READ: കൊടുങ്കാറ്റായി സഞ്ജു; അടിച്ചുകയറിയത് 2009 ലോകകപ്പിൽ ധോണി നേടിയ റെക്കോർഡിനൊപ്പം

ഓപ്പണർ അഭിഷേക് ശർമയുടെ അർദ്ധ സെഞ്ച്വറി കരുത്തിലാണ് ഇന്ത്യ മികച്ച സ്കോർ നേടിയത്. 31 പന്തിൽ 61 റൺസാണ് അഭിഷേക് നേടിയത്. എട്ട് ഫോറുകളും രണ്ട് സിക്സുമാണ് അഭിഷേക് ശർമയുടെ ബാറ്റിൽ നിന്നും പിറന്നത്. തിലക് വർമ്മ 49 റൺസ് നേടി പുറത്താകാതെയും നിന്നു. 34 പന്തിൽ നാല് ഫോറുകളും ഒരു സിക്സുമാണ് താരം നേടിയത്. സഞ്ജു സാംസൺ 22 പന്തുകളിൽ നിന്നും 39 റൺസും നേടി. ഒരു ഫോറും മൂന്ന് സിക്സുകളും ആണ് സഞ്ജുവിന്റെ ബാറ്റിൽ നിന്നും പിറന്നത്. 

ഏഷ്യ കപ്പിന്റെ ഫൈനൽ പോരാട്ടം ഞായറാച്ചയാണ്‌ നടക്കുന്നത്. ദുബൈ ഇന്റർനാഷണൽ സ്റ്റേഡിയത്തിൽ നടക്കുന്ന മത്സരത്തിൽ ഇന്ത്യയും പാകിസ്താനുമാണ് നേർക്കുനേർ എത്തുന്നത്.