സാവോ പോളോ: 2026-ൽ അമേരിക്ക, മെക്സിക്കോ, കാനഡ എന്നിവിടങ്ങളിൽ നടക്കാനിരിക്കുന്ന ഫിഫ ലോകകപ്പിൽ ബ്രസീലിന്റെ സൂപ്പർതാരം നെയ്‌മർ ജൂനിയറിനെ ടീമിൽ ഉൾപ്പെടുത്തണമെന്ന് ഇതിഹാസ താരം റൊണാൾഡോ. ബ്രസീലിന്റെ ലോകകപ്പ് വിജയ സാധ്യതകൾ വർധിപ്പിക്കാൻ നെയ്‌മറിന്റെ സാന്നിധ്യം നിർണായകമാണെന്ന്, രണ്ട് തവണ ലോകകപ്പ് ജേതാവായ റൊണാൾഡോ, സാവോ പോളോയിൽ നടന്ന ഒരു പരിപാടിയിൽ പറഞ്ഞു.

"നെയ്‌മറെപ്പോലെ മറ്റൊരു കളിക്കാരൻ ബ്രസീലിന് ഇല്ല. അവന്റെ സാന്നിധ്യം ബ്രസീലിന്റെ വിജയ സാധ്യതകളെ മെച്ചപ്പെടുത്തും. ലോകകപ്പിൽ അവൻ കളിക്കുമെന്ന് ജനങ്ങൾ 100 ശതമാനം പ്രതീക്ഷിക്കുന്നു. നെയ്‌മർ കളത്തിലുണ്ടെങ്കിൽ, ബ്രസീലിന് മികച്ച ഫലങ്ങൾ ഉറപ്പാണ്," റൊണാൾഡോ ആത്മവിശ്വാസത്തോടെ പറഞ്ഞു.

പരിക്കും തിരിച്ചുവരവും

2023 ഒക്ടോബറിൽ ഉറുഗ്വേക്കെതിരായ മത്സരത്തിനിടെ എസിഎൽ (ആന്റീരിയർ ക്രൂഷ്യേറ്റ് ലിഗമെന്റ്) പരിക്കേറ്റതിനെ തുടർന്ന് നെയ്‌മർ ബ്രസീലിനായി കളത്തിലിറങ്ങിയിട്ടില്ല. പരിക്കിൽ നിന്ന് സുഖം പ്രാപിച്ച് സാന്റോസ് എഫ്‌സിയിലേക്ക് മടങ്ങിയെത്തിയെങ്കിലും, ഫിറ്റ്നസ് ആശങ്കകൾ കാരണം ബ്രസീൽ പരിശീലകൻ കാർലോ ആഞ്ചലോട്ടിയുടെ കീഴിലുള്ള സമീപകാല മത്സരങ്ങളിൽ നെയ്മറിന് പങ്കെടുക്കാനായില്ല.

എന്നാൽ, സാന്റോസിനായുള്ള നെയ്മറിന്റെ പ്രകടനം ശ്രദ്ധേയമാണ്. 19 മത്സരങ്ങളിൽ നിന്ന് 6 ഗോളുകളും 3 അസിസ്റ്റുകളും നെയ്‌മർ സ്വന്തമാക്കി. യുവന്റ്യൂഡിനെതിരെ 3-1ന് വിജയിച്ച മത്സരത്തിൽ ഇരട്ട ഗോളുകൾ നേടി തന്റെ ഫോം തെളിയിച്ചു.

ബ്രസീലിന്റെ റെക്കോർഡ് ഹോൾഡർ

128 മത്സരങ്ങളിൽ ബ്രസീലിനെ പ്രതിനിധീകരിച്ച നെയ്‌മർ, ഇതിഹാസ താരം കഫുവിന് പിന്നിൽ, ഏറ്റവും കൂടുതൽ മത്സരങ്ങൾ കളിച്ച രണ്ടാമത്തെ ബ്രസീലിയൻ താരമാണ്. 79 ഗോളുകളോടെ അവൻ രാജ്യത്തിന്റെ എക്കാലത്തെയും മികച്ച ഗോൾവേട്ടക്കാരനുമാണ്.

ഫിറ്റ്നസ് ആശങ്കകൾ

2026 ലോകകപ്പിൽ നെയ്‌മറിന്റെ പങ്കാളിത്തം ഫിറ്റ്നസിനെ ആശ്രയിച്ചിരിക്കുമെന്ന് പരിശീലകൻ കാർലോ ആഞ്ചലോട്ടി അടുത്തിടെ വ്യക്തമാക്കിയിരുന്നു. "തിരിച്ചുവരവ് വളരെ അടുത്താണ്, പക്ഷേ ബ്രസീലിന്റെ ജേഴ്സി ധരിക്കാൻ ഇപ്പോൾ എനിക്ക് കഴിയില്ല. റിസ്ക് എടുക്കേണ്ടതില്ല, പൂർണ ഫിറ്റ്നസോടെ മാത്രമേ ഞാൻ കളത്തിലേക്ക് മടങ്ങൂ," എന്ന് നെയ്‌മർ തന്റെ ഇൻസ്റ്റാഗ്രാം പോസ്റ്റിൽ കുറിച്ചു.

നേരത്തെ, സഊദി ഫുട്ബോൾ ക്ലബ്ബായ അൽ-ഹിലാലുമായുള്ള കരാർ നെയ്‌മർ അവസാനിപ്പിച്ചിരുന്നു. ഇപ്പോൾ സാന്റോസിനായി കളിക്കുന്ന താരം, ലോകകപ്പിന് മുന്നോടിയായി ഫോം വീണ്ടെടുക്കാൻ ശ്രമിക്കുകയാണ്. ആഞ്ചലോട്ടി, ഭാവി ടീം തിരഞ്ഞെടുപ്പിൽ നെയ്‌മറിന്റെ പങ്കാളിത്തം സംബന്ധിച്ച് നിർണായക തീരുമാനം എടുക്കേണ്ടതുണ്ട്. ആരാധകർ, നെയ്‌മറുടെ തിരിച്ചുവരവിനായി ആകാംക്ഷയോടെ കാത്തിരിക്കുകയാണ്.