പീഡനമനുഭവിക്കുന്ന ഫലസ്തീന്‍ ജനതയുടെ മോചനത്തിന് വേണ്ടി നിലകൊള്ളുന്നതിന് പകരം സമാധാനത്തിന് വേണ്ടി പ്രവര്‍ത്തിക്കേണ്ട ലോകരാജ്യങ്ങള്‍ ഇസ്‌റാഈല്‍ ക്രൂരതക്കെതിരെ കണ്ണടക്കുന്നതും, ക്രൂരതയുടെ പക്ഷം ചേരുന്നതും ശരിയല്ലെന്ന് എസ്.കെ.എസ്.എസ്.എഫ് സംസ്ഥാന പ്രസിഡന്റ് പാണക്കാട് സയ്യിദ് ഹമീദലി ശിഹാബ് തങ്ങള്‍. മലപ്പുറത്ത് എസ്.കെ.എസ്.എസ്.എഫ് സംസ്ഥാന കമ്മിറ്റി നടത്തിയ ഫലസ്തീന്‍ ഐക്യദാര്‍ഢ്യ-പ്രാര്‍ഥനാ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. ഫലസ്തീന്‍ ജനതയുടെ മോചനത്തിന് വേണ്ടി പല രാഷ്ട്രങ്ങളും മുന്നോട്ടുവന്നത് ശ്രദ്ധേയമാണ്. എന്നാല്‍ ഇതിനെ മറികടന്ന് ഇസ്‌റാഈലിന് പിന്തുണക്കുന്ന നിലപാടാണ് അമേരിക്കയുടേത്. ആശുപത്രികള്‍ ബോംബിട്ട് തകര്‍ക്കുകയും പ്രായമായവരും സ്ത്രീകളും കുട്ടികളും കിരാത നടപടിക്കിരയാവുകയാണ്. അഭയം നല്‍കിയ ഫലസ്തീനികളെ ആട്ടിയോടിക്കുന്ന നിലപാടാണ് ഇസ്‌റാഈലിന്റേത്. ഫലസ്തീന്‍ ജനതക്കൊപ്പം നിന്ന പാരമ്പര്യമാണ് ഇന്ത്യയുടേത്. ഇതിനപവാദമായി ഇസ്‌റാഈലിനെ പിന്തുണച്ചുകൂടാ. മസ്ജിദുല്‍ അഖ്‌സായുടേയും, ഫലസ്തീന്‍ ജനതയുടെ മോചനത്തിനും വേണ്ടി മനസുരികിയ പ്രാര്‍ഥന നടത്തണമെന്ന് തങ്ങള്‍ ഉദ്‌ബോധിപ്പിച്ചു. പ്രാര്‍ഥനാ സദസിന് ഹമീദലി തങ്ങള്‍ നേതൃത്വം നല്‍കി.

ഫലസ്തീനിലെ ഗസ്സയില്‍ പീഡനമനുഭവിക്കുന്ന ജനതക്ക് ഐക്യദാര്‍ഢ്യം നേര്‍ന്നും, അവരുടെ മോചനത്തിനായി പ്രാര്‍ഥിച്ചും മലപ്പുറം വാരിയംകുന്നത്ത് ടൗണ്‍ഹാളില്‍ നടന്ന പരിപാടിയില്‍ നൂറുകണക്കിനാളുകളാണ് സംഗമിച്ചത്. സംസ്ഥാന വൈസ് പ്രസിഡന്റ് സയ്യിദ് ഫഖ്‌റുദ്ദീന്‍ ഹസനി തങ്ങള്‍ കണ്ണന്തളി അധ്യക്ഷനായി. പ്രാരംഭമായി നടന്ന മുഹ് യിദ്ദീന്‍ മൗലിദ് മജ്‌ലിസിന് പാണക്കാട് സയ്യിദ് ഹാശിറലി ശിഹാബ് തങ്ങള്‍ നേതൃത്വം നല്‍കി. സമസ്ത കേന്ദ്ര മുശാവറ അംഗങ്ങളായ വാക്കോട് മൊയ്തീന്‍ കുട്ടി ഫൈസി, അസ്ഗറലി ഫൈസി പട്ടിക്കാട, ഡോ. സി.കെ അബ്ദുറഹ്മാന്‍ ഫൈസി അരിപ്ര ഉദ്‌ബോധന പ്രസംഗം നടത്തി.

ബഷീര്‍ ഫൈസി ദേശമംഗലം മുഖ്യപ്രഭാഷണം നടത്തി. പ്രാർഥന സദസില്‍ സയ്യിദ് നിയാസലി ശിഹാബ് തങ്ങള്‍, പാണക്കാട് സയ്യിദ് അബ്ദുറഷീദലി ശിഹാബ് തങ്ങള്‍, പാണക്കാട് സയ്യിദ് സാബിഖലി ശിഹാബ് തങ്ങള്‍, സയ്യിദ് ഒ.എം സൈനുല്‍ആബിദ് തങ്ങള്‍ മേലാറ്റൂര്‍, സയ്യിദ് ഹബീബ് കോയ തങ്ങള്‍ താഴക്കോട്, സയ്യിദ് ഫൈസല്‍ തങ്ങള്‍ ജീലാനി, അബ്ദുറഹ്മാന്‍ ഫൈസി കടുങ്ങല്ലൂര്‍, അന്‍വര്‍ സ്വാദിഖ് ഫൈസി മണ്ണാര്‍ക്കാട്, അയ്യൂബ് മാസ്റ്റര്‍ മുട്ടില്‍, ആശിഖ് കുഴിപ്പുറം, അനീസ് ഫൈസി മാവണ്ടിയൂര്‍, സി.ടി ജലീല്‍ പട്ടര്‍കുളം, ഫാറൂഖ് ഫൈസി മണിമൂളി, ഇസ്മാഈല്‍ യമാനി മംഗലാപുരം, അലി അക്ബര്‍ മുക്കം, നൂറുദ്ദീന്‍ ഫൈസി മുണ്ടുപാറ, സുറൂര്‍ പാപ്പിനിശ്ശേരി, മുഹമ്മദലി മുസ് ലിയാര്‍ കൊല്ലം, ശാഫി ഇരിങ്ങാവൂര്‍, അബ്ദുല്‍ കരീം ബാഖവി പൊന്‍മള, യൂനുസ് ഫൈസി വെട്ടുപാറ, നൗഷാദ് ചെട്ടിപ്പടി, ബാപ്പു ഹാജി, സത്താര്‍ ദാരിമി തൃശൂര്‍, എം.പി കടുങ്ങല്ലൂര്‍, ശഹീര്‍ അന്‍വരി പുറങ്ങ്, കെ.എം കുട്ടി എടക്കുളം, ഡോ.അബ്ദുല്‍ ഖയ്യൂം, മുഹ് യിദ്ദീന്‍ കുട്ടി യമാനി, സി.കെ.മൊയ്തീന്‍ ഫൈസി സംബന്ധിച്ചു. ജനറല്‍ സെക്രട്ടറി ഒ.പി.എം. അഷ്‌റഫ് സ്വാഗതവും സെക്രട്ടറി ശമീര്‍ ഫൈസി ഒടമല നന്ദിയും പറഞ്ഞു.