തിരുവനന്തപുരം: മോട്ടോര്‍ വാഹനവകുപ്പിന്റെ പുതിയ വാഹനങ്ങളുടെ ഫ്‌ളാഗ് ഓഫ് ചടങ്ങിലെ സംഘാടനത്തില്‍ വീഴ്ച്ച വരുത്തിയെന്നാരോപിച്ച് എം.വി.ഡി ഉദ്യോദസ്ഥന് വകുപ്പ് മന്ത്രിയുടെ കാരണം കാണിക്കല്‍ നോട്ടിസ്. പരിപാടിയുടെ സംഘാടന ചുമതലയുണ്ടായിരുന്ന അസി. ട്രാന്‍സ്‌പോര്‍ട്ട് കമ്മിഷണര്‍ ജോയിക്കാണ് മന്ത്രി കെ.ബി ഗണേഷ്‌കുമാര്‍ കാരണം കാണിക്കല്‍ നോട്ടിസ് നല്‍കിയത്. 

കഴിഞ്ഞ ദിവസമാണ് മോട്ടോര്‍ വാഹന വകുപ്പിലേക്ക് സംസ്ഥാന സര്‍ക്കാര്‍ വാങ്ങിയ വാഹനങ്ങളുടെ ഉദ്ഘാടനം ഗതാഗത മന്ത്രി കെ.ബി ഗണേഷ്‌കുമാര്‍ റദ്ദാക്കിയത് . മോട്ടാര്‍ വാഹനവകുപ്പിലെ പ്രധാനപ്പെട്ട ഉദ്യോഗസ്ഥര്‍ പോലും പരിപാടിക്ക് എത്താത്തതും വാഹനങ്ങള്‍ കൃത്യമായി ഇടാത്തതുമാണ് മന്ത്രിയെ ചൊടിപ്പിച്ചത്.

52 എംവിഡി വാഹനങ്ങളാണ് ഉദ്ഘാടനം ചെയ്ത് കൈമാറേണ്ടിയിരുന്നത്. കനകക്കുന്നില്‍ സംഘടിപ്പിച്ച പരിപാടി എന്നാല്‍ ആളില്ലാത്ത അവസ്ഥയിലായതോടെ മന്ത്രി പരിപാടി റദ്ദാക്കുകയാണെന്ന് മൈക്കിലൂടെ അറിയിക്കുകയായിരുന്നു.

വലിയ പരിപാടി ആയിട്ടും ചടങ്ങിലേക്ക് എത്തിയത് കേരള കോണ്‍ഗ്രസ് ബിയിലെ ഏതാനും പാര്‍ട്ടി പ്രവര്‍ത്തകരും മന്ത്രിയുടെ പേഴ്‌സണല്‍ സ്റ്റാഫ് അംഗങ്ങളും കെ.എസ്.ആര്‍.ടി.സിയിലെ കുറച്ച് ഉദ്യോഗസ്ഥരും മാത്രമായിരുന്നു. പരിപാടി സംഘടിപ്പിക്കുന്ന മോട്ടോര്‍ വാഹന വകുപ്പിലെ ഉന്നത ഉദ്യോഗസ്ഥര്‍ ഉള്‍പ്പെടെ ആരും തന്നെ പരിപാടിയ്ക്ക് എത്തിയില്ല. പരിപാടിയുടെ ചുമതല ഉണ്ടായിരുന്ന ഉദ്യോഗസ്ഥന്‍ പരിപാടിക്ക് വേണ്ടി ഒന്നും ചെയ്തില്ലെന്ന് പറഞ്ഞ മന്ത്രി ഉദ്യോഗസ്ഥനെതിരെ നടപടിയെടുക്കുമെന്നും ഇന്നലെ തന്നെ അറിയിച്ചിരുന്നു.

ALSO READ: ഒക്ടോബര്‍ മാസത്തിലും വൈദ്യുതി ബില്‍ കൂടും; യൂണിറ്റിന് സര്‍ചാര്‍ജ് പത്തു പൈസ

ആകെ 52 വാഹനങ്ങളാണ് ഉദ്ഘാടനത്തിനായി കനകക്കുന്നില്‍ എത്തിച്ചിരുന്നത്. എന്നാല്‍ ഉദ്ഘാടനത്തിനായി വാഹനങ്ങള്‍ ക്രമീകരിച്ചതിലും മന്ത്രി ഗണേഷ് കുമാര്‍ അതൃപ്തി അറിയിച്ചു. പരിപാടി നടക്കുന്ന കനകക്കുന്നിലെ മുറ്റത്ത് വാഹനം കയറ്റിയിട്ടാല്‍ മുറ്റത്ത് പാകിയ ടൈല്‍സ് പൊട്ടുമെന്ന് ഒരു ഉദ്യോഗസ്ഥന്‍ പറഞ്ഞു. വാഹനം കയറ്റിയിട്ടാല്‍ പൊട്ടുന്ന ടൈല്‍സ് ആണ് ഇവിടെ ഇട്ടിട്ടുള്ളത് എങ്കില്‍ ആ ഉദ്യോഗസ്ഥന്‍ ആരാണെന്ന് അറിയാന്‍ ബന്ധപ്പെട്ട വകുപ്പിന് കത്ത് നല്‍കുമെന്നും മന്ത്രി വ്യക്തമാക്കി.

ക്ഷമിക്കണം എന്ന മുഖവുരയോടെ ഈ പരിപാടി ഇവിടെ റദ്ദാക്കുകയാണെന്നും മന്ത്രി അറിയിച്ചത്. പിന്നാലെ ഉദ്ഘാടനം മറ്റൊരു ദിവസത്തേക്ക് മാറ്റാന്‍ മന്ത്രി നിര്‍ദേശിച്ചു.

English Summary: Kerala Transport Minister K.B. Ganesh Kumar has issued a show-cause notice to Assistant Transport Commissioner Joey for alleged mismanagement of a Motor Vehicles Department (MVD) event. The event was intended to mark the flag-off of 52 newly procured MVD vehicles, but was cancelled on the spot by the minister due to poor attendance and disorganized arrangements.