മുംബൈ: യു.എസില്‍ വെടിയേറ്റ് മരിച്ച പ്രസിഡന്റ് ഡൊണാള്‍ഡ് ട്രംപിന്റെ അടുപ്പക്കാരനായ തീവ്രവലതുപക്ഷവാദി ചാര്‍ളി കിര്‍ക്കിനെ വിശുദ്ധ വ്യക്തിയായി അവതരിപ്പിച്ച കവര്‍ ചിത്രം വിവാദമായതോടെ മാപ്പുപറഞ്ഞ് ഇന്ത്യന്‍ കത്തോലിക്കാ മാഗസിന്‍. സെപ്റ്റംബര്‍ 20 - 26 പതിപ്പിന്റെ പുറംചട്ടയില്‍ 'സ്‌നേഹത്തിന്റെയും നേതൃത്വത്തിന്റെയും പ്രകാശങ്ങളില്‍' എന്ന തലക്കെട്ടോടെ പ്രത്യക്ഷപ്പെട്ട കവര്‍ ആണ് വിവാദമായത്. മദര്‍ തെരേസ, മനുഷ്യാവകാശപ്രവര്‍ത്തകനും വൈദികനുമായ ഫാദര്‍ സ്റ്റാന്‍ സ്വാമി തുടങ്ങിയ കത്തോലിക്കാ പ്രമുഖര്‍ക്കൊപ്പമാണ് കിര്‍ക്കിന്റെ ചിത്രവും, ബോംബെ അതിരൂപതയുടെ 175 വര്‍ഷം പഴക്കമുള്ള പ്രതിവാര പ്രസിദ്ധീകരണമായ ദി എക്‌സാമിനര്‍ ഉള്‍പ്പെടുത്തിയത്.

തീവ്രവലതുപക്ഷ ആശയങ്ങള്‍ക്ക് പേരുകേട്ട, കടുത്ത ഇന്ത്യാവിരുദ്ധ നിലപാടുകള്‍ സ്വീകരിക്കുകയും ചെയ്ത കിര്‍ക്കിനെ മഹത്വവല്‍കരിക്കുന്ന കവര്‍ ചിത്രത്തിനെതിരേ സഭയ്ക്കുള്ളിലും പുറത്തും ഒരുപോലെ വിമര്‍ശനം ഉയര്‍ന്നതോടെയാണ് മാഗസിന്‍ മാപ്പ് പറഞ്ഞത്. സെപ്റ്റംബര്‍ 28 - ഒക്ടോബര്‍ 3 പതിപ്പില്‍ ആണ് ക്ഷമാപണം പ്രസിദ്ധീകരിച്ചത്. ചാര്‍ലി കിര്‍ക്കിന്റെ ചിത്രം ഉള്‍പ്പെടുത്തിയതില്‍ പ്രതിഷേധിച്ച് നിരവധി കത്തുകള്‍ ലഭിച്ചിട്ടുണ്ടെന്നും വായനക്കാരുടെ കാഴ്ചപ്പാടിനോട് ഞങ്ങള്‍ യോജിക്കുന്നുവെന്നും ചിത്രം ഉള്‍പ്പെടുത്തിയതില്‍ ക്ഷമ ചോദിക്കുന്നുവെന്നും എഡിറ്റര്‍ ഫാദര്‍ ജോഷന്‍ ലെസ്ലി റോഡ്രിഗസ് പറഞ്ഞു.