ഓസ്ട്രേലിയക്കെതിരായ യൂത്ത് ടെസ്റ്റിൽ തകർപ്പൻ സെഞ്ച്വറി നേടി ഇന്ത്യൻ യുവതാരം വൈഭവ് സൂര്യവംശി. കങ്കാരു പടയ്ക്കെതിരെ 86 പന്തിൽ നിന്നും 113 റൺസ് നേടിയാണ് താരം തിളങ്ങിയത്. എട്ട് ഫോറുകളും ഏഴ് കൂറ്റൻ സിക്സുകളും അടങ്ങുന്നതായിരുന്നു രാജസ്ഥാൻ റോയൽസ് താരത്തിന്റെ തകർപ്പൻ ഇന്നിങ്‌സ്.

മത്സരത്തിൽ 78 പന്തിൽ നിന്നുമാണ് വൈഭവ് സെഞ്ച്വറി പൂർത്തിയാക്കിയത്. ഇതോടെ ഒരുപിടി റെക്കോർഡുകളാണ് വൈഭവ് സൂര്യവംശി തന്റെ പേരിലാക്കി മാറ്റിയത്. ഓസ്ട്രേലിയൻ മണ്ണിൽ യൂത്ത് ടെസ്റ്റിൽ ഏറ്റവും വേഗതയേറിയ സെഞ്ച്വറി നേടുന്ന താരമായാണ് വൈഭവ് മാറിയത്. ഈ നേട്ടം സ്വന്തമാക്കുന്ന ഏറ്റവും പ്രായം കുറഞ്ഞ താരം കൂടിയാണ് വൈഭവ്.

2025 ഐപിഎല്ലിൽ  രാജസ്ഥാൻ റോയൽസിനായി നടത്തിയ മിന്നും പ്രകടനങ്ങൾക്ക് പിന്നാലെ ക്രിക്കറ്റ് ലോകത്തിൽ ഏറ്റവും ചർച്ചയായ പേരാണ് വൈഭവ് സൂര്യവംശി. 2025 ഐപിഎല്ലിലെ സൂപ്പർ സ്ട്രൈക്കർ അവാർഡ് സ്വന്തമാക്കിയത് വൈഭവ് സൂര്യവംശിയായിരുന്നു. രാജസ്ഥനായി ഏഴ് മത്സരങ്ങളിൽ നിന്നും ഒരു സെഞ്ച്വറിയും ഒരു അർദ്ധ സെഞ്ച്വറിയും ഉൾപ്പെടെ 252 റൺസാണ് നേടിയത്.

ഐപിഎൽ കഴിഞ്ഞു നടന്ന ഇംഗ്ലണ്ടിനെതിരായ പരമ്പരയിലും വൈഭവ് മികച്ച പ്രകടനമാണ് നടത്തിയത്. യൂത്ത് ടെസ്റ്റിൽ നാല് ഇന്നിംഗ്‌സുകളിൽ നിന്ന് 340 റൺസ് ആണ് ആയുഷ് നേടിയിരുന്നത്. രണ്ട് സെഞ്ച്വറിയും ഒരു അർദ്ധസെഞ്ച്വറിയും ആണ് പരമ്പരയിൽ താരം സ്വന്തമാക്കിയത്. ഏകദിന പരമ്പരയിൽ അഞ്ചു മത്സരങ്ങളിൽ നിന്നും 355 റൺസാണ് വൈഭവ് നേടിയത്. ഒരു സെഞ്ച്വറിയും അർദ്ധ സെഞ്ച്വറിയും ആണ് താരം പരമ്പരയിൽ നേടിയത്. 71 എന്ന മികച്ച ആവറേജിലും 174.01 സ്ട്രൈക്ക് റേറ്റിലും ആണ് വൈഭവ് സൂര്യവംശി ബാറ്റ് വീശിയത്.

അതേസമയം മത്സരത്തിൽ ആദ്യ ഇന്നിങ്സിൽ ഇന്ത്യ 428 റൺസ് ആണ് ഓസ്ട്രേലിയക്കെതിരെ അടിച്ചെടുത്തത്. മത്സരത്തിൽ വൈഭവിനു പുറമേ വേദാന്ത ത്രിവേദിയും ഇന്ത്യക്കായി സെഞ്ച്വറി നേടി തിളങ്ങി 192 പന്തിൽ 19 ഫോറടക്കം 140 റൺസ് ആണ് താരം നേടിയത്. ഖിലാൻ പട്ടേൽ 49 പന്തിൽ നിന്നും 49 റൺസും നേടി ഇന്ത്യക്ക് മികച്ച ടോട്ടൽ പടുത്തുയർത്തുന്നതിൽ നിർണായകമായി. 

ഓസ്ട്രേലിയൻ ബൗളിങ്ങിൽ ജോൺ ജയിംസ്, ഹെയ്ഡൻ ഷില്ലർ എന്നിവർ മൂന്നു വീതം വിക്കറ്റുകൾ നേടി മികച്ച പ്രകടനം കാഴ്ചവെച്ചു. രണ്ടാം ദിവസം കളി നിർത്തുമ്പോൾ ഓസ്ട്രേലിയ ഒരു വിക്കറ്റ് നഷ്ടത്തിൽ എട്ട് റൺസ് എന്ന നിലയിലാണ് ഉള്ളത്.

Young Indian batsman Vaibhav Suryavanshi scored a brilliant century in the Youth Test against Australia. He scored 113 runs off 86 balls against the Kangaroo team. The Rajasthan Royals star's brilliant innings included eight fours and seven huge sixes.