ന്യൂഡല്‍ഹി: ഡല്‍ഹി സര്‍വകലാശാലയില്‍ വിദ്യാര്‍ഥി സംഘടനകള്‍ തമ്മില്‍ സംഘര്‍ഷം. ജെ.എന്‍.യു പൂര്‍വ വിദ്യാര്‍ഥികളും ഡല്‍ഹി കലാപക്കേസില്‍ തടവില്‍ കഴിയുന്നവരുമായ ഉമര്‍ ഖാലിദ്, ഷര്‍ജീല്‍ ഇമാം എന്നിവരെ രാവണനാക്കി ചിത്രീകരിച്ച് എ.ബി.വി.പി നടത്തിയ ഘോഷയാത്രയ്ക്ക് പിന്നാലെയാണ് സംഘര്‍ഷമുണ്ടായത്. ജെ.എന്‍.യുവിലെ സബര്‍മതി ടീ പോയിന്റില്‍ വച്ച് ഇന്നലെ രാത്രിയാണ് സംഭവമുണ്ടായത്. 

വിജയദശമി ആഘോഷങ്ങളുടെ ഭാഗമായി രാവണദഹനം പരിപാടിയില്‍ ഉമര്‍ ഖാലിദിനെയും ഷര്‍ജീല്‍ ഇമാമിനെയും രാവണനായി ചിത്രീകരിക്കുകയും രൂപം ഹോസ്റ്റല്‍ പരിസരത്ത് വച്ച് കത്തിക്കുകയും ചെയ്തതാണ് പ്രകോപനമുണ്ടാക്കിയത്. ഓള്‍ ഇന്ത്യ സ്റ്റുഡന്റ്‌സ് അസോസിയേഷന്‍ (എഐഎസ്എ), സ്റ്റുഡന്റ്‌സ് ഫെഡറേഷന്‍ ഓഫ് ഇന്ത്യ (എസ്എഫ്‌ഐ), ഡെമോക്രാറ്റിക് സ്റ്റുഡന്റ്‌സ് ഫെഡറേഷന്‍ (ഡി.എസ്.എഫ്) എന്നീ സംഘടനകളിലെ അംഗങ്ങള്‍ ഘോഷയാത്ര തടസപ്പെടുത്തുകയായിരുന്നുവെന്ന് എ.ബി.വി.പി ആരോപിച്ചു. തങ്ങള്‍ മാവോയിസം, ദേശവിരുദ്ധ പ്രവര്‍ത്തനങ്ങള്‍ എന്നിവയ്‌ക്കെതിരെ പ്രതിഷേധം തീര്‍ക്കുകയാണ് ചെയ്തതെന്നാണ് എ.ബി.വി.പി പ്രവര്‍ത്തകരുടെ വാദം. 

ALSO READ: ഐ ലവ് മുഹമ്മദ് കാംപയിന്‍:  മുസ്‌ലിംവേട്ട തുടര്‍ന്ന് യു.പി പൊലിസ്, വ്യാപക അറസ്റ്റും ബുള്‍ഡോസര്‍ രാജും 

അതേസമയം, മഹാത്മാ ഗാന്ധിയുടെ ജന്മദിനത്തില്‍ ഇത്തരമൊരു പരിപാടി സംഘടിപ്പിച്ചത് എന്തിനായിരുന്നെന്നും രാജ്യത്തെക്കുറിച്ച് ആധിയുണ്ടായിരുന്നുവെങ്കില്‍ ഗോഡ്‌സെയുടെ ചിത്രമായിരുന്നു കത്തിക്കേണ്ടിയിരുന്നതെന്നും ഇടത് വിദ്യാര്‍ഥി സംഘടനകള്‍ കുറ്റപ്പെടുത്തി. എ.ബി.വി.പി മതാചാരങ്ങളെ രാഷ്ട്രീയ അജണ്ടയുടെ ഭാഗമായി ഉപയോഗിക്കുകയാണെന്നും വിദ്വേഷത്തിന്റെയും ഇസ് ലാമോഫോബിയയുടെയും രാഷ്ട്രീയത്തെ ജെ.എന്‍.യു തള്ളിക്കളയുമെന്നും ഐസ പ്രസ്താവനയില്‍ പറഞ്ഞു. 

English Summary: A clash erupted at Jawaharlal Nehru University (JNU) following a controversial effigy-burning event organized by the ABVP as part of Dussehra celebrations. The right-wing student group portrayed jailed activists Umar Khalid and Sharjeel Imam as Ravana, sparking outrage among Left-leaning student unions like AISA, SFI, and DSF. The effigy was set ablaze near the Sabarmati T-Point, prompting protests and strong criticism.