തിരുവനന്തപുരം: ശബരിമല വിവാദത്തില്‍ ആരോപണ വിധേയനായ ഉണ്ണികൃഷ്ണന്‍ പോറ്റി സ്വര്‍ണ്ണപ്പാളിയുമായി ചെന്നൈയില്‍ ചടങ്ങ് സംഘടിപ്പിച്ചതിന്റെ വിവരങ്ങള്‍ പുറത്ത്. 2019 ലാണ് ചടങ്ങ് സംഘടിപ്പിച്ചത്. നടന്‍ ജയറാമിനെയും ഗായകന്‍ വീരമണി രാജുവിനെയും ചടങ്ങിലേക്ക് ക്ഷണിച്ചിരുന്നു. 

ശബരിമലയിലെ ശ്രീകോവിലിന്റെ വാതില്‍ക്കട്ടിള എന്ന് അവകാശപ്പെട്ടാണ് അമ്പത്തൂരിലെ ഫാക്ടറിയില്‍ പ്രദര്‍ശനവും പൂജയും സംഘടിപ്പിച്ചത്. അമ്പട്ടൂരിലെ പൂജയ്ക്ക് ശേഷം കട്ടിളപ്പടി നടന്‍ ജയറാമിന്റെ വീട്ടിലേക്ക് കൊണ്ടുപോവുകയും പൂജാമുറിയില്‍ വച്ച് പൂജിക്കുകയും ചെയ്തു.

അതേസമയം,  ശബരിമല ദ്വാരപാലക ശില്‍പ്പത്തിന്റെ  സ്വര്‍ണപ്പാളി ബംഗളൂരുവില്‍ എത്തിച്ചിരുന്നതായി വിജിലന്‍സ് കണ്ടെത്തിയിരുന്നു. കെ. ബംഗളൂരുവിലെ ശ്രീറാംപുര അയ്യപ്പക്ഷേത്രത്തിലാണ് സ്വര്‍ണപ്പാളി എത്തിച്ചത്. 2019 ല്‍ ശബരിമല ശ്രീകോവിലിലെ പ്രധാന വാതില്‍ എന്ന പേരിലാണ് സ്വര്‍ണപ്പാളി  എത്തിച്ചത്. ഈ ക്ഷേത്രത്തിലെ മുന്‍ശാന്തിക്കാരനായിരുന്നു ഉണ്ണികൃഷ്ണന്‍ പോറ്റി. ക്ഷേത്രത്തില്‍  വച്ച് ഇത് എല്ലാവരെയും കാണിച്ചശേഷം  കൊണ്ടുപോകുകയായിരുന്നുവെന്ന് ക്ഷേത്രം മാനേജിങ് ട്രസ്റ്റി വിശ്വംഭരന്‍ സ്വകാര്യ ചാനലിനോട് പറഞ്ഞു. ഉണ്ണികൃഷ്ണന്‍ പോറ്റി മുമ്പ് ഈ ക്ഷേത്രത്തിലെ പൂജാരിയായിരുന്നു. 

ALSO READ: റിവേഴ്‌സ് ഗിയറിട്ട് സ്വര്‍ണവില ; ഇന്ന് കുറഞ്ഞത് പവന് 480 രൂപ

വ്യവസായി വിവേക് ജെയിന്‍, മറ്റൊരു വ്യവസായി, ഉണ്ണികൃഷ്ണന്‍ പോറ്റി എന്നിവര്‍ ചേര്‍ന്നാണ് സ്വര്‍ണപ്പാളി ബംഗളൂരുവില്‍ എത്തിച്ചത്. തുടര്‍ന്ന് ക്ഷേത്രത്തില്‍ പ്രത്യേക പൂജകളും നടത്തിയിരുന്നു. എന്നാല്‍ അന്ന് അറ്റകുറ്റപ്പണിക്കായി ശബരിമലയില്‍ നിന്നും കൊണ്ടുപോയ സ്വര്‍ണപ്പാളി 39 ദിവസത്തിനു ശേഷമാണ് ഹൈദരാബാദില്‍ എത്തിക്കുന്നത്. ഇതുമായി ബന്ധപ്പെട്ട് 2019 ല്‍ വിവേക് ജെയിന്‍ ഒരു മാധ്യമത്തിന് നല്‍കിയ വാര്‍ത്ത വിജിലന്‍സ് സംഘത്തിന് ലഭിച്ചിട്ടുണ്ട്. 

സ്വര്‍ണം പൂശുന്നതിനും അന്നദാനത്തിന്റെ പേരിലും ഉണ്ണികൃഷ്ണന്‍ പോറ്റി വ്യാപക പണപ്പിരിവ് നടത്തിയെന്നാണ് ദേവസ്വം വിജിലന്‍സിന്റെ കണ്ടെത്തല്‍. സ്വര്‍ണപ്പാളി ബെംഗളൂരൂവില്‍ കൊണ്ടുപോയതും പണപ്പിരിവിന്റെ ഭാഗമെന്നാണ് സംശയം. ശബരിമലയുമായി അടുത്ത ബന്ധമുണ്ടെന്ന് വരുത്തിത്തീര്‍ത്ത് കര്‍ണാടക സ്വദേശികളായ സമ്പന്നരായ അയ്യപ്പഭക്തരില്‍ നിന്നും പണപ്പിരിവ് നടത്തിയെന്ന ആരോപണം ഉണ്ണികൃഷ്ണന്‍ പോറ്റിക്കെതിരേ നേരത്തെതന്നെ ഉണ്ടായിരുന്നു. 

അതേസമയം, ആരാണ് ഉണ്ണികൃഷ്ണന്‍ പോറ്റിയെന്ന ഹൈക്കോടതിയുടെ  ചോദ്യത്തിന് ദേവസ്വം ബോര്‍ഡിന് ഉത്തരമില്ല. 

അതിനിടെ  ശബരിമല വിവാദം രാഷ്ട്രീയ ആയുധമാക്കാനാണ് യു.ഡി.എഫ് നീക്കം. സ്പോണ്‍സറെ പഴിചാരി വിവാദങ്ങളില്‍ നിന്ന് രക്ഷപ്പെടാന്‍ ദേവസ്വം ബോര്‍ഡിന് ആവില്ലെന്നും അയ്യപ്പന്റെ പണം എടുത്തവര്‍ ഒരുകാലത്തും ഗതി പിടിക്കില്ലെന്നും കെ.പി.സി.സി മുന്‍ പ്രസിഡന്റ് കെ.മുരളീധരനും സംഭവത്തില്‍ സി.ബി.ഐ അന്വേഷണം വേണമെന്ന് യു.ഡി.എഫ് കണ്‍വീനര്‍ അടൂര്‍ പ്രകാശും ആവശ്യപ്പെട്ടു. 
ഇതിനിടെ, ഉണ്ണികൃഷ്ണന്‍ പോറ്റിയെ നാളെ ചോദ്യം ചെയ്യും. ചോദ്യം ചെയ്യലിന് തിരുവനന്തപുരത്ത് എത്താനുള്ള വിജിലന്‍സ് നിര്‍ദേശത്തെ തുടര്‍ന്ന് ഉണ്ണികൃഷ്ണന്‍ പോറ്റി ഇന്നലെ കാരേറ്റിലെ വീട്ടിലെത്തി. 

ALSO READ: സലീമിൻ്റെ കൈവശമുണ്ട്....ഗാന്ധിജിയെക്കുറിച്ചുള്ള ഐൻസ്റ്റീൻ്റെ ആ വാചകങ്ങൾ അടങ്ങിയ അപൂർവ പുസ്തകം

ഉണ്ണികൃഷ്ണന്‍ പോറ്റിക്ക് കുരുക്ക് മുറുകുന്നു

ശബരിമല സ്വര്‍ണപ്പാളി വിവാദത്തില്‍ കേരളത്തിന് പുറത്തുള്ള ധനികരായ അയ്യപ്പഭക്തരെ ചൂഷണം ചെയ്തതായി വിജിലന്‍സിന് വിവരം ലഭിച്ച സാഹചര്യത്തില്‍, ദ്വാരപാലക ശില്‍പത്തിന്റെ സ്വര്‍ണം പൂശുന്ന കരാര്‍ ഏറ്റെടുത്ത സ്പോണ്‍സര്‍ ഉണ്ണികൃഷ്ണന്‍ പോറ്റിക്ക് കുരുക്ക് മുറുകുന്നു.  അഞ്ചോളം പേരില്‍ നിന്ന് ഇയാള്‍ പണം വാങ്ങിയിരുന്നതായാണ് സൂചന. 

ഈ  പണം ഇയാള്‍ ബ്ലേഡ് പലിശയ്ക്ക് നല്‍കിയിരുന്നതായും വിജിലന്‍സിന് വിവരം ലഭിച്ചു. കര്‍ണ്ണാടക, തമിഴ്നാട്, തെലങ്കാന, ആന്ധ്രാപ്രദേശ് എന്നിവിടങ്ങളില്‍ നിന്നുള്ള ധനികരായ അയ്യപ്പഭക്തരാണ് ഉണ്ണികൃഷ്ണന്‍ പോറ്റിയുടെ ഇര. 

ഒരു സമര്‍പ്പണത്തിനായി ഇയാള്‍ പലരില്‍ നിന്ന് പണം വാങ്ങുകയും അതില്‍ ഓരോ ആളുകളുടെയും പണം ഉപയോഗിച്ചാണ് സമര്‍പ്പണം നടത്തിയതെന്ന് പറഞ്ഞ് വിശ്വസിപ്പിക്കുകയും ചെയ്യും. 

English Summary: New revelations have emerged about a 2019 religious ceremony in Chennai involving Unnikrishnan Potty, who is currently under scrutiny in the Sabarimala gold plate controversy. According to reports, the ceremony featured the Sabarimala gold plate and was organized by Potty himself. Prominent personalities including actor Jayaram and singer Veeramani Raju were invited and took part in the event.