കോട്ടയം: കോട്ടയം കുറവിലങ്ങാട് നിന്നു കാണാതായിരുന്ന വീട്ടമ്മയെ കൊന്ന് കൊക്കയില്‍ തള്ളിയതായി കണ്ടെത്തി. ഇടുക്കി കരിമണ്ണൂര്‍ ചെപ്പുകുളത്ത് ഉപേക്ഷിച്ച നിലയിലാണ് മൃതദേഹം കണ്ടത്. മരിച്ച ജെസിയുടെ ഭര്‍ത്താവ് സാം കെ ജോര്‍ജിനെ കുറവിലങ്ങാട് പൊലിസ് അറസ്റ്റ് ചെയ്തു.

ഇയാളുടെ പരസ്ത്രീ ബന്ധത്തെ കുറിച്ചു ജെസി ചോദ്യം ചെയ്തതാണ് കൊലപാതകത്തിന് കാരണമായതെന്നാണ് പൊലിസ് പറയുന്നത്. സെപ്റ്റംബര്‍ 26നാണ് അന്‍പതുകാരിയായ ജെസി സാമിനെ കാണാതാകുന്നത്. വിദേശത്തുള്ള മക്കള്‍ 26ന് ഇവരുമായി ഫോണില്‍ സംസാരിച്ചിരുന്നു. പിന്നീട് അമ്മയെ ബന്ധപ്പെടാന്‍ കഴിയാതെ വന്നപ്പോള്‍ 29ന് മക്കള്‍ ജെസിയുടെ സുഹൃത്തുക്കളെ വിവരമറിയിച്ചതിനെ തുടര്‍ന്നാണ് അവര്‍ പൊലിസില്‍ പരാതി നല്‍കിയത്. പൊലിസ് നടത്തിയ അന്വേഷണത്തില്‍ ഭര്‍ത്താവ് സാമിനെ പറ്റി ചില സംശയങ്ങള്‍ തോന്നിയിരുന്നു. തുടര്‍ന്ന് ഇയാളെ കസ്റ്റഡിയില്‍ എടുത്ത് ചോദ്യം ചെയ്തു.

ബെംഗളൂരുവിലായിരുന്ന സാമിനെ നാട്ടിലെത്തിച്ചപ്പോഴാണ് കൊലപാതകത്തിന്റെ ചുരുളഴിഞ്ഞത്. സെപ്റ്റംബര്‍ 26ന് സാം ജോര്‍ജ് ജെസിയെ കാണക്കാരിയിലെ വീട്ടില്‍ വച്ച് ശ്വാസം മുട്ടിച്ച് കൊന്നതിനു ശേഷം മൃതദേഹം കാറിലാക്കി തൊടുപുഴക്കടുത്തുള്ള ചെപ്പുകുളം കൊക്കയില്‍ തള്ളുകയായിരുന്നു.

 ALSO READ: വിശക്കുമ്പോള്‍ കടലാസ് കീറിയെടുത്ത് തിന്നും ; ഭക്ഷണം വേണ്ട, വിചിത്ര രോഗാവസ്ഥയുമായി യുവതി

ഇയാളുടെ മൊഴി അനുസരിച്ച് ഇന്ന് പൊലീസ് നടത്തിയ പരിശോധനയിലാണ് 30 അടിയോളം താഴ്ചയുള്ള സ്ഥലത്ത് നിന്ന് മൃതദേഹം കണ്ടെത്തിയത്. 2005 മുതല്‍ ഇരുവരും തമ്മില്‍ കുടുംബ പ്രശ്‌നങ്ങള്‍ ഉണ്ടായിരുന്നു. വിവാഹമോചന കേസ് പാലാ കോടതിയില്‍ നടന്നുവരുകയുമായിരുന്നു.  

കേസ് നടക്കുന്നുണ്ടെങ്കിലും ഇരുവരും വീടിന്റെ രണ്ടു നിലയിലായിരുന്നു താമസിച്ചിരുന്നത്. സാമിന് വിദേശികളും സ്വദേശികളുമായുള്ള പല സ്ത്രീകളുമായും ബന്ധമുണ്ടെന്നായിരുന്നു ജെസിയുടെ ആക്ഷേപം. വൈക്കം ഡിവൈഎസ്പിയുടെ നേതൃത്വത്തിലുള്ള പൊലീസ് സംഘം വൈകിട്ടോടെ കസ്റ്റഡിയിലുള്ള സാമുമായി ഇടുക്കി കരിമണ്ണൂര്‍ ചെപ്പുകുളത്ത് എത്തി.

ഒന്നരമണിക്കൂര്‍ നീണ്ട പരിശ്രമത്തിനൊടുവില്‍ കൊക്കയില്‍ നിന്നാണ് തൊടുപുഴ അഗ്‌നിരക്ഷാ സേനാ മൃതദേഹം പുറത്തെടുത്തത്. ഇന്‍ക്വസ്റ്റ് നടപടികള്‍ക്ക് ശേഷം മൃതദേഹം പോസ്റ്റുമോര്‍ട്ടത്തിനായി കൊണ്ടുപോയി.

A shocking murder case has unfolded in Kottayam, Kerala, where a missing woman named Jessy was found murdered and dumped in a gorge near Cheppukulam, Karimannur, Idukki. Her husband, Sam K. George, has been arrested by the Kuravilangad Police in connection with the crime.