കാസർകോട്: സ്‌കൂൾ കലോത്സവത്തിനിടെ വിദ്യാർഥികൾ അവതരിപ്പിച്ച ഫലസ്തീൻ ഐക്യദാർഢ്യ മൈം ഷോ അധ്യാപകർ തടഞ്ഞ സംഭവത്തിൽ ഇന്ന് കളക്ടർക്ക് പൊലിസും പൊതുവിദ്യാഭ്യാസ ഉപഡയരക്ടറും റിപ്പോർട്ട് നൽകും. അധ്യാപകരുടെ അസഹിഷ്ണുത പ്രവർത്തി വിവാദമായതോടെ അന്വേഷിച്ച് റിപ്പോർട്ട് നൽകാൻ വിദ്യാഭ്യാസ മന്ത്രി വി.ശിവൻകുട്ടിയും കലക്ടർ കെ. ഇമ്പശേഖറും നിർദേശം നൽകിയിരുന്നു. അധ്യാപകർക്കെതിരെ നടപടിയുണ്ടായേക്കും. 

മൈം തടഞ്ഞത്തിനു പിന്നാലെ നിർത്തിവെച്ച കലോത്സവം നാളെ നടക്കും. വിവാദം കണക്കിലെടുത്ത് നാളെ കലോത്സവം വീണ്ടും നടത്താൻ തീരുമാനിച്ചതായി പി.ടി.എ അറിയിച്ചു. അധ്യാപകർ തടസ്സപ്പെടുത്തിയ മൈം വീണ്ടും നാളെ അവതരിപ്പിക്കും.

കുമ്പള ഗവ. ഹയർസെക്കൻഡറി സ്‌കൂളിൽ വെള്ളിയാഴ്ചയായിരുന്നു സംഭവം. വിദ്യാർഥികൾ അവതരിപ്പിച്ച മൈമിന്റെ അവസാന ഭാഗത്ത് ഫലസ്തീൻ പതാകയും ഫോട്ടോകളും ഉയർത്തി ഐക്യദാർഢ്യം പ്രഖ്യാപിച്ചതോടെയാണ് പരിപാടി തീരുംമുമ്പ് അധ്യാപകർ ഇടപെട്ട് കർട്ടൻ താഴ്ത്തി നിർത്തിവച്ചത്. ഇതേതുടർന്ന് ഇന്നലത്തെ കലോത്സവ പരിപാടികൾ മാറ്റി വയ്ക്കുകയാണെന്നും സ്‌കൂൾ അധികൃതർ അറിയിക്കുകയായിരുന്നു. മൈമിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെയാണ് വിവാദമായത്.   

ALSO READ: ഗസ്സ പ്രമേയമാക്കി മൈം; പരിപാടിക്കിടെ കര്‍ട്ടനിടാന്‍ ആവശ്യപ്പെട്ട് അധ്യാപകന്‍; വിവാദം, ഇടപെട്ട് വിദ്യാഭ്യാസ മന്ത്രി

വിവാദമായതോടെ സംഭവത്തിൽ വിദ്യാഭ്യാസ മന്ത്രിയും കലക്ടറും അടിയന്തര റിപ്പോർട്ട് തേടി. സംഭവം ശ്രദ്ധയിൽപ്പെട്ടതായും അടിയന്തരമായി റിപ്പോർട്ട് ആവശ്യപ്പെട്ടതായും വിദ്യാഭ്യാസ മന്ത്രി വി. ശിവൻകുട്ടി അറിയിച്ചു. ഫലസ്തീൻ വിഷയത്തിൽ നിലപാട് വ്യക്തമാക്കിയ കേരളത്തിൽ ഇത്തരം സംഭവങ്ങൾ ആവർത്തിക്കരുത്. കുമ്പള സ്‌കൂളിലെ വിദ്യാർഥികൾക്ക് ഇതേ മൈം വേദിയിൽ അവതരിപ്പിക്കാൻ അവസരം നൽകുമെന്നും മന്ത്രി ശിവൻകുട്ടി പറഞ്ഞു. പ്രശ്നത്തിൽ പൊലിസിനോടും പൊതുവിദ്യാഭ്യാസ ഉപഡയരക്ടറോടും അന്വേഷിച്ച് റിപ്പോർട്ട് നൽകാൻ കലക്ടർ കെ. ഇമ്പശേഖറും നിർദേശം നൽകി. 

വിവരം പുറത്തറിഞ്ഞതിനെ തുടർന്ന് ഇന്നലെ സ്‌കൂളിലേക്കു വിവിധ വിദ്യാർഥി സംഘടനകൾ നടത്തിയ മാർച്ചിൽ സംഘർഷാവസ്ഥയുണ്ടായി. വിഷയം ചർച്ച ചെയ്യാൻ ഇന്നലെ രാവിലെ വിളിച്ച അടിയന്തര പി.ടി.എ യോഗത്തിലേക്ക് എം.എസ്.എഫ് പ്രവർത്തകർ ഇരച്ചുകയറി. ഇതോടെ യോഗം തടസപ്പെട്ടു. വിവാദം കണക്കിലെടുത്ത് നാളെ കലോത്സവം വീണ്ടും നടത്താൻ തീരുമാനിച്ചതായി പി.ടി.എ അറിയിച്ചു. അധ്യാപകരുടെ വിശദീകരണം തൃപ്തികരമല്ലെന്നും രണ്ട് അധ്യാപകർക്കെതിരേ നടപടി വേണമെന്നും പി.ടി.എ പ്രസിഡന്റ് എ.കെ. ആരിഫ് പറഞ്ഞു.

സംഭവത്തിൽ അന്വേഷണം നടത്തുമെന്ന് സ്‌കൂൾ പ്രിൻസിപ്പൽ സിന്ധു പറഞ്ഞു. എ.കെ.എം. അഷ്റഫ് എം.എൽ.എ സ്‌കൂൾ അധികൃതരുമായി ചർച്ച നടത്തി. വിദ്യാർഥികളുടെ ആവിഷ്‌കാര സ്വാതന്ത്ര്യം തടഞ്ഞത് തെറ്റാണെന്നും അധ്യാപകർക്കെതിരേ നടപടിയെടുക്കാൻ മന്ത്രിയോടും പൊതുവിദ്യാഭ്യാസ ഡയരക്ടറോടും ഡി.ഡി.ഇയോടും ആവശ്യപ്പെട്ടിട്ടുണ്ടെന്നും എം.എൽ.എ പറഞ്ഞു.