കൊളംബോ: വനിതാ ഏകദിന ലോകകപ്പ് മത്സരത്തിൽ ഇന്ത്യൻ വനിതകൾ ഇന്ന് പാകിസ്ഥാനെ നേരിടുന്നു. ആദ്യ മത്സരത്തിൽ ടൂർണമെന്റിലെ ആതിഥേയരായ ശ്രീലങ്കയെ 59 റൺസിന് തോൽപ്പിച്ചതിന്റെ ആത്മവിശ്വാസത്തിലാണ് ഹർമൻപ്രീത് കൗറും സംഘവും കളത്തിലിറങ്ങുന്നത്. ആദ്യ മത്സരത്തിൽ ബംഗ്ലാദേശിനോട് ഏഴു വിക്കറ്റിന്റെ തോൽവി ഏറ്റുവാങ്ങിയാണ് പാകിസ്ഥാൻ എത്തുന്നത്. 

എന്നാൽ മത്സരത്തേക്കാൾ ഇരു ടീമുകളും തമ്മിലുള്ള ഇടപെടൽ എങ്ങനെയാകുമെന്നാണ് ക്രിക്കറ്റ് ലോകം ഇന്ന് ചർച്ചചെയ്യുന്നത്. പുരുഷന്മാരുടെ ഏഷ്യ കപ്പ് മത്സരത്തിൽ ഇന്ത്യൻ ടീമും പാകിസ്ഥാൻ ടീമും മൂന്ന് തവണ ഏറ്റുമുട്ടിയപ്പോഴും പരസ്പരം ഹസ്തദാനം പോലും ചെയ്തിരുന്നില്ല. ഫൈനലിലെ ഇന്ത്യൻ വിജയത്തിന് പിന്നാലെ കപ്പ് സ്വീകരിക്കാതിരുന്നതും പാക് ക്യാപ്റ്റൻ ചെക്ക് വലിച്ചെറിഞ്ഞതും ഉൾപ്പെടെയുള്ള വിവാദങ്ങൾ ആണ് കളിയേക്കാൾ ചർച്ചയായത്.

ALSO READ: ഏഷ്യ കപ്പ് ട്രോഫി വേണമെങ്കിൽ ഇന്ത്യ സ്വന്തം ചിലവിൽ പരുപാടി സംഘടിപ്പിക്കണം; പുതിയ ഉപാധികളുമായി മൊഹ്‌സിൻ നഖ്‍ വി

ഇന്ത്യൻ വനിതാ സംഘവും പുരുഷ സംഘത്തിന്റെ നിലപാട് തന്നെയാകുമോ തുടരുക എന്നാണ് ചർച്ചയാകുന്നത്. അങ്ങനെ ഉണ്ടായാൽ ക്രിക്കറ്റ് കളം അതിർത്തി പോലെ സംഘർഷഭരിതമാകും. അവസാനമായി ഇരു ടീമുകളും കഴിഞ്ഞ ഏകദിന ലോകകപ്പിൽ മത്സരിച്ചതിന് പിന്നാലെ ഇന്ത്യൻ താരങ്ങൾ പാകിസ്ഥാന്റെ അന്നത്തെ ക്യാപ്റ്റൻ ബിസ്മ മറൂഫിന്റെ ആറ് മാസം പ്രായമുള്ള മകൾക്കൊപ്പം കളിക്കുന്നതും കുഞ്ഞിനെ എടുക്കുന്നതും കുഞ്ഞിനൊപ്പം സെൽഫി എടുക്കുന്നത് ഉൾപ്പടെയുള്ള മനോഹരമായ കാഴ്ചകൾ ലോകം കണ്ടിരുന്നു. 

ALSO READ: വനിതാ ഏകദിന ലോകകപ്പ് ഇന്ന് മുതൽ; ആദ്യ മത്സരത്തിൽ ഇന്ത്യ ശ്രീലങ്കയെ നേരിടും

എന്നാൽ മാറിയ രാഷ്ട്രീയ സാഹചര്യത്തിൽ രാഷ്ട്രീയം കളിക്കളത്തിലേക്ക് എത്തുമോ എന്നാണ് എല്ലാവരും ഉറ്റുനോക്കുന്നത്. ക്രിക്കറ്റിനെ മത്സരം മാത്രമായി കാണണമെന്നാണ് ക്രിക്കറ്റിനെ സ്നേഹിക്കുന്നവർ എല്ലാം ആഗ്രഹിക്കുന്നത്. നാളിതുവരെയുള്ള ചരിത്രത്തിലെ മത്സരത്തിലെ വീറും വാശിയും നിലനിർത്തുന്നതോടൊപ്പം, ഇന്ത്യ - പാക് താരങ്ങളുടെ സൗഹൃദമായിരുന്നു കളിക്കളത്തിൽ കണ്ടിരുന്നത്.