ന്യൂഡല്‍ഹി: സുപ്രിം കോടതിയില്‍ ചീഫ് ജസ്റ്റിസ് ബി.ആര്‍. ഗവായിക്ക് നേരെ നടന്ന അതിക്രമത്തില്‍ മൗനം പാലിക്കുന്ന കേന്ദ്രസര്‍ക്കാര്‍ നിലപാടിനെതിരെ രൂക്ഷ വിമര്‍ശനവുമായി അദ്ദേഹത്തിന്റെ സഹോദരി കീര്‍ത്തി ആര്‍. അര്‍ജുന്‍.

തിങ്കളാഴ്ച രാവിലെ ചീഫ് ജസ്റ്റിസ് കേസ് പരിഗണിക്കുന്നതിനിടെയാണ് അഭിഭാഷകനായ രാകേഷ് കിഷോര്‍ ഷൂ എറിയാന്‍ ശ്രമിച്ചത്.

'അതിക്രമം ഒരു വ്യക്തിക്ക് നേരെയല്ല, മറിച്ച് പരമോന്നത കോടതിയുടെ പ്രതിനിധിക്ക് ഭരണഘടനാ പദവിയിലിരിക്കുന്നയാള്‍ക്ക് നേരെ.  എന്നിട്ടും, സര്‍ക്കാറില്‍നിന്ന് ഒരു പ്രതികരണവും ഉണ്ടായില്ല. ഇത് അസ്വസ്ഥതപ്പെടുത്തുന്നതാണ്' -ദ വയറിന് നല്‍കിയ പ്രതികരണത്തില്‍ കീര്‍ത്തി ചൂണ്ടിക്കാട്ടി. 

വിദ്യാഭ്യാസ വിദഗ്ധയും ശ്രീ ദാദാസാഹേബ് ഗവായി ചാരിറ്റബ്ള്‍ ട്രസ്റ്റ് പ്രസിഡന്റുമാണ് കീര്‍ത്തി. ചീഫ് ജസ്റ്റിസിന്റെ സഹോദരി ആയതുകൊണ്ടല്ല, യുവ മനസ്സുകളുടെ ഭാവി രൂപപ്പെടുത്തുന്നതില്‍ ഉത്തരവാദിയായ ഒരാള്‍ എന്ന നിലയില്‍ കൂടിയാണ് തന്റെ ഈ പ്രതികരണമെന്നും അവര്‍ വ്യക്തമാക്കി. 

ALSO READ: ചീഫ് ജസ്റ്റിസിനുനേരെ ഷൂ എറിഞ്ഞത് ദൈവിക പ്രേരണയാലെന്ന് പ്രതിയായ അഭിഭാഷകന്‍, ജയില്‍ ശിക്ഷ അനുഭവിക്കാന്‍ തയ്യാറെന്ന് 

ഇന്ത്യന്‍ ഭരണഘടനയെ അപമാനിക്കാനുള്ള ശ്രമമായിരുന്നു ഈ അക്രമം. ഏറ്റവും അപലപനീയമായ പ്രവൃത്തിയാണിത്, അത്തരമൊരു നിന്ദ്യമായ പ്രവൃത്തിക്കെതിരെ പ്രതിഷേധം രേഖപ്പെടുത്തേണ്ടതുണ്ട്-  കീര്‍ത്തി ചൂണ്ടിക്കാട്ടി.

അതിക്രമത്തെ പ്രധാനമന്ത്രി നരേന്ദ്ര മോദിയും കേന്ദ്ര നിയമമന്ത്രി അര്‍ജുന്‍ രാം മേഘ്വാളും അപലപിച്ചെങ്കിലും മറ്റു കേന്ദ്ര മന്ത്രിമാരൊന്നും പ്രതികരിച്ചിരുന്നില്ല. അതേസമയം, ചീഫ് ജസ്റ്റിസിനെതിരേ കോടതി മുറിയില്‍ ഷൂ എറിയാന്‍ ശ്രമിച്ചതില്‍ ഒരു കുറ്റബോധവുമില്ലെന്നാണ് കഴിഞ്ഞ ദിവസം അഭിഭാഷകന്‍ രാകേഷ് കിഷോര്‍ പ്രതികരിച്ചത്. ദൈവമാണ് തന്നോട് ഇത്തരമൊരു കാര്യം ചെയ്യാന്‍ നിര്‍ദേശിച്ചത്. സുപ്രിംകോടതി ഹിന്ദുവിരുദ്ധമാണെന്നും മയൂര്‍ വിഹാറിലെ വീട്ടില്‍ മാധ്യമങ്ങളോട് സംസാരിക്കവെ 71കാരനായ രാകേഷ് കിഷോര്‍ പറഞ്ഞു.

ഖജുരാഹോ കേസില്‍ അനുകൂലമായി വിധി കൊടുത്തില്ലെന്ന് മാത്രമല്ല, ഹരജിക്കാരനെ ചീഫ് ജസ്റ്റിസ് പരിഹസിക്കുകയും ചെയ്തത് തന്നെ വേദനിപ്പിച്ചു. ദലിതാണെന്ന ആനുകൂല്യം നേടാന്‍ ശ്രമിക്കുകയാണ് ചീഫ് ജസ്റ്റിസ്. അദ്ദേഹം ദലിതല്ല, ബുദ്ധമതക്കാരനാണ്. താന്‍ പി.എച്ച്.ഡി, എല്‍.എല്‍.ബി ഒക്കെയുള്ള ആളാണ്. സ്വര്‍ണ മെഡല്‍ ജേതാവാണ്. എന്നെ ആരും പ്രകോപിപ്പിച്ച് വിട്ടതല്ല. തന്റെ നിരാശ ഈ രീതിയില്‍ പ്രകടിപ്പിക്കാനേ തനിക്ക് പറ്റിയുള്ളൂവെന്നും അഭിഭാഷകന്‍ പറഞ്ഞു.

ഇന്നലെ അഭിഭാഷകന്റെ വീടിന് മുന്നില്‍ ആംആദ്മി പാര്‍ട്ടി പ്രതിഷേധം നടത്തി. പൊലിസ് ബാരിക്കേഡിട്ട് വീടിന് സുരക്ഷയൊരുക്കിയിട്ടുണ്ട്.

in a strong statement, the sister of india’s chief justice said the ongoing violations are a direct attack on the constitution, and the central government’s silence is deeply disturbing.