അബൂദബി: ഒമാനിൽ രണ്ട് പേരുടെ മരണത്തിന് കാരണമായ 'യുറാനസ് സ്റ്റാർ' കുപ്പിവെള്ളത്തിന്റെ ഉപഭോഗവും വിതരണവും യുഎഇയിൽ നിരോധിച്ചു. ഒക്ടോബർ 10-ന് കാലാവസ്ഥാ വ്യതിയാന പരിസ്ഥിതി മന്ത്രാലയം (MoCCAE) ട്വീറ്റ് ചെയ്ത മുന്നറിയിപ്പിൽ, ഈ ബ്രാൻഡിന്റെ കുപ്പിവെള്ളമോ മറ്റു ഉൽപ്പന്നങ്ങളോ ഇറക്കുമതി ചെയ്യുന്നതിനോ വ്യാപാരം ചെയ്യുന്നതിനോ ഔദ്യോഗിക അനുമതി നൽകിയിട്ടില്ലെന്ന് വ്യക്തമാക്കി. രാജ്യത്തെ പ്രധാന റീട്ടെയിൽ ഔട്ട്‌ലെറ്റുകളിൽ ഈ ഉൽപ്പന്നങ്ങൾ കണ്ടെത്തിയിട്ടില്ലെന്നും മന്ത്രാലയം സ്ഥിരീകരിച്ചു.

ALSO READ: സോഷ്യൽ മീഡിയയിലൂടെയുള്ള ആൾമാറാട്ടത്തിന് കടുത്ത ശിക്ഷയുമായി യുഎഇ; തട്ടിപ്പുകാരെ കാത്തിരിക്കുന്നത് 10 ലക്ഷം ദിർഹം പിഴയും ഒരു വർഷം ജയിൽശിക്ഷയും 

അയൽരാജ്യത്ത് യുറാനസ് സ്റ്റാർ കുപ്പിവെള്ളത്തിൽ മലിനീകരണം സ്ഥിരീകരിച്ച സാഹചര്യത്തിൽ, പ്രാദേശിക വിപണി സംഭവവികാസങ്ങൾ തുടർച്ചയായി നിരീക്ഷിക്കുന്നതിന്റെ ഭാഗമായാണ് അടിയന്തര നടപടിയെന്ന് മന്ത്രാലയം അറിയിച്ചു. ഓരോ എമിറേറ്റിലെയും പ്രാദേശിക ഭക്ഷ്യ സുരക്ഷാ അധികാരികളുമായി നേരിട്ടുള്ള ഏകോപനം ഈ നടപടികളുടെ ഭാഗമാണ്. ബ്രാൻഡിന്റെ കയറ്റുമതി പെർമിറ്റുകളോ അംഗീകാരങ്ങളോ നൽകിയിട്ടില്ലെന്ന് ഉറപ്പാക്കാൻ നടപടിക്രമങ്ങളും മേൽനോട്ടവും ശക്തമാക്കിയിട്ടുണ്ട്. ഉപഭോക്താക്കളുടെ ആരോഗ്യവും സുരക്ഷയും സംരക്ഷിക്കുന്നതിനുള്ള പ്രതിബദ്ധത ആവർത്തിച്ചുകൊണ്ട്, എല്ലാ ഭക്ഷ്യ ഉൽപ്പന്നങ്ങളുടെയും സുരക്ഷ ഉറപ്പാക്കുന്നതിനും അന്താരാഷ്ട്ര മാനദണ്ഡങ്ങൾ പാലിക്കുന്നതിനുമുള്ള സംയോജിത നിയന്ത്രണ സംവിധാനം പ്രവർത്തിക്കുന്നുണ്ടെന്ന് മന്ത്രാലയം വ്യക്തമാക്കി.

ഒമാനിലെ മരണങ്ങൾ

ഇറാനിൽ നിന്നുള്ള 'യുറാനസ് സ്റ്റാർ' കുപ്പിവെള്ളം കുടിച്ച് ഒമാനിൽ രണ്ട് പേർ അടുത്തിടെയാണ് മരിച്ചത്. ഇതാണ് നിലവിലെ നടപടിക്ക് കാരണമെന്നാണ് നി​ഗമനം. സെപ്റ്റംബർ 29-ന് സുവൈഖിലെ വിലായത്തിൽ ഒരു പ്രവാസി സ്ത്രീ യുറാനസ് സ്റ്റാർ കുപ്പിവെള്ളം കുടിച്ച് ഗുരുതരാവസ്ഥയിൽ ആശുപത്രിയിൽ പ്രവേശിപ്പിക്കപ്പെട്ടിരുന്നു. ഇവർ പിന്നീട് മരിച്ചു. ഒക്ടോബർ 1-ന് അതേ ബ്രാൻഡിന്റെ കുപ്പിവെള്ളം കുടിച്ച ഒരു ഒമാനി സ്ത്രീയും കുടുംബത്തോടൊപ്പം ചികിത്സ തേടിയതിന് ശേഷം മരണപ്പെട്ടിരുന്നു. റോയൽ ഒമാൻ പൊലിസ് (ROP) പറയുന്നതനുസരിച്ച്, ഇരുവരും ഇറാനിൽ നിന്നുള്ള 'യുറാനസ് സ്റ്റാർ' ബ്രാൻഡ് കുപ്പിവെള്ളം കുടിച്ചിരുന്നു. മരണപ്പെട്ട ഒമാനി സ്ത്രീയുടെ കുടുംബത്തിലെ മറ്റൊരു സ്ത്രീ ചികിത്സയ്ക്ക് ശേഷം സുഖം പ്രാപിച്ചു.

വിഷബാധ സംശയത്തോടെ ആരോഗ്യ-സുരക്ഷാ അധികൃതർ സാമ്പിളുകൾ ശേഖരിച്ച് പരിശോധിച്ചു. ലബോറട്ടറി ഫലങ്ങൾ ഉൽപ്പന്നത്തിൽ "ആംഫെറ്റാമൈൻ" പോലുള്ള മായം മനഃപൂർവം കലർത്തിയതായി സ്ഥിരീകരിച്ചു. പൊതുജനാരോഗ്യം സംരക്ഷിക്കാൻ ഒമാനിലുടനീളം 'യുറാനസ് സ്റ്റാർ' കുപ്പികൾ പിൻവലിച്ചു. ഇറാനിൽ നിന്നുള്ള എല്ലാ കുപ്പിവെള്ള ഇറക്കുമതിയും താൽക്കാലികമായി നിർത്തിവച്ചിരുന്നു. പൊതുജനങ്ങളോട് ഈ ഉൽപ്പന്നം ഉപയോ​ഗിക്കുന്നത് ഒഴിവാക്കാൻ റോയൽ ഒമാൻ പൊലിസ് മുന്നറിയിപ്പ് നൽകിയിരുന്നു.

ALSO READ: ഈദുൽ ഇത്തിഹാദ് അവധി ഒമ്പത് ദിവസം വരെ നീട്ടാം, എങ്ങനെയെന്നല്ലേ? 

യുഎഇയുടെ നടപടികൾ: ഉപഭോക്തൃ സുരക്ഷ പ്രധാനം

യുഎഇയിലും ഈ ബ്രാൻഡിന്റെ ഉൽപ്പന്നങ്ങൾ ഉപേക്ഷിക്കാൻ മന്ത്രാലയം ആവശ്യപ്പെട്ടു. ഉപഭോക്താക്കളുടെ ആരോഗ്യം സംരക്ഷിക്കുന്നതിനുള്ള ഈ നടപടികൾ, പ്രാദേശിക ഭക്ഷ്യ സുരക്ഷാ അധികാരികളുമായുള്ള സഹകരണത്തോടെ നടപ്പാക്കുന്നുണ്ട്. കുവൈത്തിലും സമാന നിരോധനങ്ങൾ ഏർപ്പെടുത്തിയിട്ടുണ്ട്. യുഎഇയിലെ ജനങ്ങൾക്ക് ഭക്ഷ്യ ഉൽപ്പന്നങ്ങളുടെ സുരക്ഷ ഉറപ്പാക്കാൻ സംയോജിത നിയന്ത്രണ സംവിധാനം തുടർച്ചയായി പ്രവർത്തിക്കുന്നുണ്ടെന്ന് MoCCAE വീണ്ടും ഓർമിപ്പിച്ചു.

uae authorities issue urgent alert against consuming or distributing 'uranus star' bottled water due to no import permits and contamination linked to two fatal cases in oman—residents advised to discard stocks immediately for health safety in 2025.