അറ്റ്‌ലാന്റ: ജോര്‍ജിയയില്‍ ചെറുവിമാനങ്ങള്‍ കൂട്ടിമുട്ടി മൂന്നുപേര്‍ മരിച്ചു. പടിഞ്ഞാറന്‍ ജോര്‍ജിയയിലെ റീജ്യണല്‍ വിമാനത്താവളത്തില്‍ കഴിഞ്ഞ ദിവസമായിരുന്നു സംഭവം. അപകടത്തില്‍ ഒരു ഫ്‌ളൈറ്റ് ഇന്‍സ്ട്രക്ടറും വിദ്യാര്‍ഥിയും മറ്റൊരാളുമാണ് മരിച്ചത്.
വിമാനങ്ങള്‍ ഒരേ സ്ഥലത്തു ഒരേ സമയത്തു ലാന്‍ഡ് ചെയ്യാന്‍ ശ്രമിച്ചതാണ് അപകടകാരണമെന്നാണ് നിഗമനം. റണ്‍വേയിലെത്തും മുന്‍പേ അന്തരീക്ഷത്തില്‍വച്ച് ഇവ കൂട്ടിമുട്ടുകയായിരുന്നു.
ഫ്‌ളൈറ്റ് ഇന്‍സ്ട്രക്ടറും വിദ്യാര്‍ഥിയുമായിരുന്നു ഒരു വിമാനത്തിലുണ്ടായിരുന്നത്. മറ്റേതില്‍ ഒരാള്‍ തനിച്ചായിരുന്നു. രണ്ടു വിമാനങ്ങളും ഒരു എന്‍ജിനുള്ളവയായിരുന്നു. സംഭവത്തില്‍ അന്വേഷണം പ്രഖ്യാപിച്ചിട്ടുണ്ട്.