ന്യൂഡൽഹി: രാജ്യത്തെ അഴിമതി രഹിതമാക്കാൻ സ്ഥാപിച്ച ലോക്പാലിന് ആഡംബരമോഹം. ഏഴ് ഹൈ-എൻഡ് ബിഎംഡബ്ല്യു 330 ലി (ലോംഗ് വീൽ ബേസ്) വാഹനങ്ങൾ വാങ്ങാൻ ലോക്പാൽ ടെൻഡർ വിളിച്ചു. ഒക്ടോബർ 16 ന് പുറത്തിറക്കിയ ടെൻഡർ പ്രകാരം വെള്ള നിറത്തിലുള്ള ഏഴ് ബിഎംഡബ്ല്യു കാറുകൾ ആണ് വാങ്ങാൻ ഉദ്ദേശിക്കുന്നത്. 70 ലക്ഷം രൂപ വിലവരുന്നതാണ് ഒരു കാർ. സംഭവം രാഷ്ട്രീയ വിവാദമായിട്ടുണ്ട്.

ലോക്പാലിന്റെ ചെയർപേഴ്‌സൺ, മുൻ സുപ്രിം കോടതി ജസ്റ്റിസ് അജയ് മണിക്‌റാവു ഖാൻവിൽക്കർ ഉൾപ്പെടെ ഓരോ അംഗത്തിനും ഒന്ന് വീതം കാറുകളാണ് വാങ്ങുന്നത്. ഓരോ കാറിനും 70 ലക്ഷം രൂപയാണ് വില. അതായത് ആകെ 7 പേർക്ക് വേണ്ടി 5 കോടിയുടെ കാറുകൾ! ഒരു ചെയർപേഴ്‌സണും മറ്റ് ആറ് അംഗങ്ങളും അടങ്ങുന്ന ഏഴംഗ അഴിമതി വിരുദ്ധ സമിതിക്കായാണ് ഏഴ് കാറുകൾ ക്ഷണിച്ചത്. 

ടെൻഡർ പ്രകാരം, രണ്ടാഴ്ചയ്ക്കുള്ളിൽ കാറുകൾ ഡെലിവർ ചെയ്യണമെന്ന് രാജ്യത്തെ അഴിമതി വിരുദ്ധ ഓംബുഡ്‌സ്മാൻ ആവശ്യപ്പെടുന്നു. ലോക്പാൽ ഓഫീസിലെ ഡ്രൈവർമാർക്കും ജീവനക്കാർക്കും കാറുകളുടെ ഇലക്ട്രോണിക് സംവിധാനങ്ങളെയും പ്രവർത്തനങ്ങളെയും കുറിച്ച് പഠിപ്പിക്കുന്നത് ഉൾപ്പെടെ ഏഴ് ദിവസത്തെ 'പരിശീലനം' നൽകാൻ കാർ നിർമ്മാതാക്കളായ ബിഎംഡബ്ല്യുവിനോട് ലോക്പാൽ ആവശ്യപ്പെടുമെന്ന് ദേശീയ മാധ്യമ റിപ്പോർട്ടുകൾ പറയുന്നു.

ടെൻഡർ വന്നതിന് പിന്നാലെ സംഭവം വിവാദമായി. ആക്ടിവിസ്റ്റും അഭിഭാഷകനുമായ പ്രശാന്ത് ഭൂഷൺ ഉൾപ്പെടെയുള്ളവർ അഴിമതി വിരുദ്ധ സംഘടനയ്‌ക്കെതിരെ വിമർശനവുമായി രംഗത്തെത്തി. രാജ്യത്തെ അഴിമതിയിൽ വിഷമിക്കാത്തവരും ആഡംബരങ്ങളിൽ സന്തുഷ്ടരുമായ ദാസന്മാരെ നിയമിച്ചുകൊണ്ട് ലോക്പാലിനെ തകർക്കാൻ സർക്കാരിന് കഴിഞ്ഞുവെന്ന് പ്രശാന്ത് ഭൂഷൺ ആരോപിച്ചു. 

2013 ലെ ലോക്പാൽ, ലോകായുക്ത നിയമപ്രകാരം ഇന്ത്യയിൽ സ്ഥാപിതമായ ഇത്തരത്തിലുള്ള ആദ്യത്തെ സ്ഥാപനമാണ് ലോക്പാൽ ഓഫ് ഇന്ത്യ. ഉദ്യോഗസ്ഥർക്കെതിരായ അഴിമതി ആരോപണങ്ങൾ അന്വേഷിക്കുന്നതിനാണ് ലോക്പാൽ സ്ഥാപിതമായത്. എന്നാൽ മോദി സർക്കാർ ഇതിനെ നിർജീവമാക്കിവെച്ചിരിക്കുകയാണ് എന്നാണ് ആരോപണം