കൊച്ചി: ഗവേഷക വിദ്യാര്‍ഥിനിയെ അപമാനിച്ചെന്ന കേസില്‍ റാപ്പര്‍ വേടന് മുന്‍കൂര്‍ ജാമ്യവ്യവസ്ഥയില്‍ ഇളവ്. കേരളം വിടരുതെന്ന വ്യവസ്ഥയാണ് ഹൈക്കോടതി റദ്ദാക്കിയത്. വിദേശരാജ്യങ്ങളിലേക്ക് പോകാന്‍ അനുമതി തേടിയാണ് വേടന്‍ കോടതിയെ സമീപിച്ചത്. 

രാജ്യം വിട്ടുപോകുമ്പോള്‍ പൊലീസിനെ അറിയിക്കണമെന്നും അന്വേഷണ ഉദ്യോഗസ്ഥന്‍ ആവശ്യപ്പെടുമ്പോഴെല്ലാം ഹാജരാകണമെന്നും ഉത്തരവിലുണ്ട്. 

2021ല്‍ ഗവേഷണാവശ്യത്തിന് വിവരം തേടി സമീപിച്ചപ്പോള്‍ അതിക്രമം നടത്തിയെന്നാണ് ഗവേഷക വിദ്യാര്‍ത്ഥിനിയുടെ പരാതിയില്‍ പറഞ്ഞത്. 

2021 ആഗസ്റ്റ് മുതല്‍ 2023 മാര്‍ച്ച് വരെ വിവാഹവാഗ്ദാനം നല്‍കി തന്നെ പീഡിപ്പിച്ചുവെന്ന ഡോക്ടറുടെ പരാതിയും നിലവിലുണ്ട്. 2021 ആഗസ്റ്റില്‍ ഫല്‍റ്റിലെത്തിയ വേടന്‍ ബലാല്‍സംഗം ചെയ്തെന്നും പരാതിയില്‍ പറഞ്ഞിരുന്നു. ഇതിന് ശേഷം വിവാഹം ചെയ്യാമെന്ന് വാഗ്ദാനവും ചെയ്തു. രണ്ട് വര്‍ഷത്തിനിടെ ലഹരിയടക്കം ഉപയോഗിച്ച്, ആറ് തവണ പലയിടങ്ങളില്‍വെച്ച് വേടന്‍ പീഡിപ്പിച്ചെന്നും 2023 മാര്‍ച്ചില്‍ ടോക്സിക്കെന്ന് വിശേഷിപ്പിച്ച് വേടന്‍ ബന്ധത്തില്‍ നിന്ന് പിന്‍മാറുകയും ചെയ്തുവെന്നുമായിരുന്നു ഡോക്ടറുടെ പരാതി.

എന്നാല്‍, ഉഭയ സമ്മതപ്രകാരമുള്ള ബന്ധമായിരുന്നു ഡോക്ടറുമായി ഉണ്ടായിരുന്നതെന്നും പിണങ്ങിക്കഴിഞ്ഞപ്പോള്‍ ആരോപണം ഉന്നയിക്കുകയാണെന്നുമാണ് വേടന്‍ നല്‍കിയ മുന്‍കൂര്‍ ജാമ്യ ഹരജിയില്‍ ചൂണ്ടിക്കാട്ടിയിരുന്നത്.