ബെംഗളൂരു: തെരുവ് നായയെ കൂട്ടബലാത്സംഗം ചെയ്ത പ്രതികള്‍ക്കായി തിരച്ചില്‍ ഊര്‍ജിതം. കര്‍ണാടകയിലെ ചിക്കനായകഹള്ളിയിലാണ് കേസിനാസ്പദമായ സംഭവം. റസിഡന്‍ഷ്യല്‍ അപ്പാര്‍ട്ട്‌മെന്റിനോട് ചേര്‍ന്നുള്ള ലേബര്‍ ഷെഡില്‍ നായക്കെതിരെ ലൈംഗികാതിക്രമം നടന്നെന്നാണ് പരാതി. മൃഗസംരക്ഷണ പ്രവര്‍ത്തകരാണ് പരാതി നല്‍കിയത്. 

കഴിഞ്ഞ ദിവസമാണ് ബെല്ലന്തൂര്‍ കേന്ദ്രീകരിച്ച് പ്രവര്‍ത്തിക്കുന്ന മൃഗസംരക്ഷണ പ്രവര്‍ത്തക പൊലിസില്‍ പരാതിയുമായി എത്തിയത്. താന്‍ സ്ഥിരമായി ഭക്ഷണം നല്‍കുന്ന മിലി എന്ന തെരുവുനായയെ ഒക്ടോബര്‍ 13ന് ഒരു കൂട്ടം പുരുഷന്‍മാര്‍ ചേര്‍ന്ന് ലേബര്‍ ഷെഡില്‍ കൂട്ടബലാത്സംഗം ചെയ്‌തെന്നാണ് പരാതി. സംഭവത്തിന് താന്‍ ദൃക്‌സാക്ഷിയാണെന്നും യുവതി പരാതിയില്‍ പറയുന്നു. 

ALSO READ: വർക്കലയിൽ ട്രെയിനിൽ നിന്ന് യുവതിയെ ട്രാക്കിലേക്ക് തള്ളിയിട്ടു; യുവതി അതീവ ഗുരുതരാവസ്ഥയിൽ 

പരാതി ലഭിച്ച പൊലിസ് കേസ് രജിസ്റ്റര്‍ ചെയ്തു. മൃഗങ്ങള്‍ക്കെതിരായ ക്രൂരത തയല്‍ നിയമം, ജീവികള്‍ക്കെതിരായ അതിക്രമം തുടങ്ങിയ വകുപ്പുകള്‍ ചുമത്തിയാണ് ബെല്ലന്തൂര്‍ പൊലിസ് കേസ് എടുത്തത്. സ്ഥലത്തെ സിസിടിവി ദൃശ്യങ്ങള്‍ പരിശോധിച്ച് പ്രതികളിലേക്കെത്താനാണ് പൊലിസ് നീക്കം. നായയുടെ ലൈംഗികാവയവത്തില്‍ മുറിവുണ്ടെന്നാണ് റിപ്പോര്‍ട്ട്. സ്രവങ്ങള്‍ പരിശോധനക്കായി അയച്ചിട്ടുണ്ട്. മെഡിക്കല്‍ പരിശോധന ഫലം ലഭിച്ചതിന് പിന്നാലെ തുടര്‍നടപടികള്‍ സ്വീകരിക്കുമെന്ന് പൊലിസ് പറഞ്ഞു.