തിരുവനന്തപുരം: പത്മനാഭസ്വാമി ക്ഷേത്രത്തില്‍ നിന്ന് സ്വര്‍ണം കാണാതായ സംഭവത്തില്‍ നിര്‍ണായക ഉത്തരവുമായ കോടതി. ക്ഷേത്രത്തിലെ ആറ് ജീവനക്കാരുടെ നുണപരിശോധന നടത്താന്‍ കോടതി ഉത്തരവിട്ടു. ഫോര്‍ട്ട് പൊലിസ് നല്‍കിയ അപേക്ഷയിലാണ്  തിരുവനന്തപുരം ജുഡീഷ്യല്‍ മജിസ്‌ട്രേറ്റ് കോടതിയുടെ സുപ്രധാന ഉത്തരവ്. നുണ പരിശോധനയ്ക്ക് മുന്‍പ് അനുമതിപത്രം വാങ്ങണമെന്നും കോടതി വ്യക്തമാക്കിയിട്ടുണ്ട്. 

ശ്രീകോവിലിന്റെ വാതില്‍ സ്വര്‍ണം പൂശാന്‍ സ്‌ട്രോങ്ങ് റൂമില്‍ നിന്ന് എടുത്ത സ്വര്‍ണത്തില്‍ നിന്നാണ് 13 പവന്‍ കാണാതായത്. പൊലിസ് അന്വേഷണം തുടങ്ങിയപ്പോള്‍ മണലില്‍ പൊതിഞ്ഞ നിലയില്‍ സ്വര്‍ണ്ണം കണ്ടെത്തിയിരുന്നു. ക്ഷേത്രത്തിന്റെ അതീവ സുരക്ഷാ മേഖലയില്‍ നിന്നാണ് സ്വര്‍ണം തിരികെ ലഭിച്ചത്. 

ALSO READ: ദുർമന്ത്രവാദം: യുവതിയെ മദ്യം നൽകി പീഡിപ്പിച്ചു, വായിൽ ഭസ്മം കുത്തിനിറച്ചു; ഭർത്താവും പിതാവുമടക്കം മൂന്ന് പേർ അറസ്റ്റിൽ

ബോംബ് സ്‌ക്വാഡിന്റെയും പൊലിസിന്റെയും സംയുക്ത പരിശോധനയിലാണ് ക്ഷേത്ര മണല്‍പ്പരപ്പില്‍ നിന്ന് സ്വര്‍ണം കണ്ടെടുത്തത്. ഇക്കഴിഞ്ഞ മെയ് ഏഴിനും 10നും ഇടയിലാണ് സ്വര്‍ണം കാണാതായത്. ക്ഷേത്രം മാനേജര്‍ ആണ് പൊലിസില്‍ പരാതി നല്‍കിയത്. 

ഉദ്യോഗസ്ഥരുടെ സാന്നിധ്യത്തില്‍ സ്വര്‍ണം തൂക്കി രേഖപ്പെടുത്തുന്ന രീതി കൃത്യമായി പാലിച്ചിരുന്നോ എന്നും ഏതെങ്കിലും വിഭാഗീയ പ്രവര്‍ത്തനത്തിന്റെ ഭാഗമായി സ്വര്‍ണം മാറ്റിവെച്ചതാണോ എന്നും പൊലിസ് സംശയിക്കുന്നുണ്ട്.

English Summary: In the case involving missing gold from the Sree Padmanabhaswamy Temple in Thiruvananthapuram the court has issued a crucial order permitting lie detector polygraph tests on six temple employees The directive was issued by the Thiruvananthapuram Judicial Magistrate Court based on a petition filed by the Fort Police The court also stated that prior written consent must be obtained before conducting the tests