ദുബൈ: യുഎഇയിലെ ഫ്രീലാൻസ് വിസകൾ കൂടുതൽ കർശനമായ അവലോകനങ്ങൾക്ക് വിധേയമാക്കാനുള്ള സർക്കാർ തീരുമാനത്തെ സ്വാ​ഗതം ചെയ്ത് ഫ്രീലാൻസർമാർ. മേഖലയുടെ വിശ്വാസ്യത ഉറപ്പാക്കാൻ അധിക മേൽനോട്ടം അനിവാര്യമാണെന്ന് ഫ്രീലാൻസർമാർ അഭിപ്രായപ്പെട്ടു. എങ്കിലും, അപേക്ഷാ പ്രക്രിയയിൽ കൂടുതൽ വ്യക്തവും സുതാര്യവുമായ മാർഗ്ഗനിർദ്ദേശങ്ങൾ ആവശ്യമാണെന്ന ആവശ്യവും ഇവർ ഉന്നയിക്കുന്നുണ്ട്.

ALSO READ: ജീവനക്കാർക്ക് റിമോട്ട് വർക്കും ഫ്ലെക്സിബിൾ വർക്ക് ഓപ്ഷനും; നിർണായക തീരുമാനവുമായി അജ്മാൻ 

കിംവദന്തികൾ തള്ളി ജിഡിആർഎഫ്എ

ഫ്രീലാൻസ് വിസകൾ (ഗ്രീൻ റെസിഡൻസി) നിർത്തിവെച്ചതായുള്ള കിംവദന്തികൾ ദുബൈയിലെ ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്‌സ് അഫയേഴ്‌സ് (ജിഡിആർഎഫ്എ) ഡയറക്ടർ ജനറൽ ലെഫ്റ്റനന്റ് ജനറൽ മുഹമ്മദ് അഹമ്മദ് അൽ മാരി തള്ളിയിരുന്നു.

വിസകൾ ഇപ്പോഴും ലഭ്യമാണെങ്കിലും, അവകാശങ്ങൾ സംരക്ഷിക്കുന്നതിനും ദുരുപയോഗം തടയുന്നതിനുമായി അവലോകന, ഓഡിറ്റിംഗ് നടപടിക്രമങ്ങൾ ശക്തിപ്പെടുത്തിയിട്ടുണ്ടെന്ന് അദ്ദേഹം അടിവരയിട്ടു. വിപണിയുടെ വളർച്ചയ്ക്ക് അനുസൃതമായി ഇത്തരം നടപടികൾ അനിവാര്യമാണെന്ന് അദ്ദേഹം കൂട്ടിച്ചേർത്തു.

'യഥാർത്ഥ ഫ്രീലാൻസർമാർക്ക് ഗുണം ചെയ്യും'

ദുബൈ ആസ്ഥാനമായുള്ള മീഡിയാ പ്രൊഫഷണലായ അഹമ്മദ് സലിം അധികൃതരുടെ പുതിയ നിർദ്ദേശത്തെ പിന്തുണച്ചു. "കർശനമായ പരിശോധനകൾ ഒരു പ്രശ്നമല്ല. യഥാർത്ഥ ഫ്രീലാൻസർമാർക്ക് ഈ സംവിധാനം ഉപകാരപ്പെടുന്നുണ്ടെന്ന് ഉറപ്പാക്കാൻ ഇത് സഹായിക്കും. എന്നാൽ അപേക്ഷകർക്ക് എന്താണ് വേണ്ടതെന്ന് അറിയാൻ കൂടുതൽ സുതാര്യത ആവശ്യമാണ്," അദ്ദേഹം പറഞ്ഞു.

വിസ കൺസൾട്ടൻ്റുമാരുടെ അഭിപ്രായത്തിൽ, ഈ സംവിധാനം പരിഷ്കരിക്കുന്നതിലെ കർശനമായ പരിശോധനകൾ സ്വാഭാവികമാണ്. വിസ കൺസൾട്ടൻ്റായ ഇഷാൻ എ പറയുന്നതനുസരിച്ച്, ചിലർ സ്ഥിരീകരിക്കാത്ത ഏജൻസികൾ വഴിയോ, വ്യാജ രേഖകൾ സമർപ്പിച്ചുകൊണ്ടോ സംവിധാനത്തെ ചൂഷണം ചെയ്യാൻ ശ്രമിച്ചതാണ് അധിക പരിശോധനകൾക്ക് കാരണം.

വ്യക്തതക്കുറവും കാലതാമസവും

ഈ പ്രക്രിയ ഇപ്പോൾ കൂടുതൽ വിശദവും ചിലപ്പോൾ മന്ദഗതിയിലുള്ളതുമായി അനുഭവപ്പെടുന്നതായി ചില ഫ്രീലാൻസർമാർ അഭിപ്രായപ്പെട്ടു. ഫ്രീലാൻസ് എഴുത്തുകാരിയായ റേച്ചൽ ആവശ്യമായ ഡോക്യുമെൻ്റേഷനെക്കുറിച്ച് വ്യക്തമായ വിവരങ്ങൾ ലഭിക്കാൻ ആഴ്ചകളെടുത്തതായി പറയുന്നു.

ALSO READ: വമ്പൻ മാറ്റങ്ങളുമായി നോൾ പേ ആപ്പ്; അറിഞ്ഞിരിക്കാം ഇക്കാര്യങ്ങൾ 

"വ്യത്യസ്ത ഏജൻസികൾ വ്യത്യസ്ത കാര്യങ്ങളാണ് ആവശ്യപ്പെടുന്നത്. ചിലർ ട്രേഡ് ലൈസൻസ് വേണമെന്ന് പറയുന്നു; മറ്റുള്ളവർ വേണ്ടെന്നും. ശരിയായ ഘട്ടങ്ങൾ പാലിക്കാൻ ഞങ്ങൾക്ക് വ്യക്തവും പുതുക്കിയതുമായ ഒരു ചെക്ക്‌ലിസ്റ്റ് മാത്രമാണ് ആവശ്യം," റേച്ചൽ പറഞ്ഞു.

അവസരങ്ങൾ നിയന്ത്രിക്കാനല്ല, മറിച്ച് സിസ്റ്റം ശക്തിപ്പെടുത്താനും പെർമിറ്റുകൾ ശരിയായി ഉപയോഗിക്കുന്നുണ്ടെന്ന് ഉറപ്പാക്കാനുമാണ് അധിക പരിശോധനകൾ എന്ന് ഉദ്യോഗസ്ഥർ ആവർത്തിച്ചു. ഒരു സ്പോൺസറുടെ സഹായമില്ലാതെ സ്വതന്ത്രമായി ജോലി ചെയ്യാനാണ് ഫ്രീലാൻസ് വിസ അനുവദിക്കുന്നത്. എന്നാൽ ജീവനക്കാരെ നിയമിക്കാനോ മറ്റുള്ളവരെ സ്പോൺസർ ചെയ്യാനോ ഫ്രീലാൻസ് വിസയ്ക്ക് അവകാശമില്ല.

the uae has introduced stricter checks for granting freelance visas, prompting freelancers to seek clear guidelines. the move aims to regulate the freelance sector while ensuring compliance with legal requirements.