കൊച്ചി: നടിയെ ആക്രമിച്ച കേസില്‍  ഡിസംബര്‍ എട്ടിന് കോടതി വിധി പറയും. എറണാകുളം പ്രിന്‍സിപ്പല്‍ സെഷന്‍സ് കോടതി ജഡ്ജിയാണ് കേസില്‍ വിധി പറയുന്നത്. പള്‍സര്‍ സുനി ഒന്നാം പ്രതിയായ കേസില്‍, നടന്‍ ദിലീപ് എട്ടാം പ്രതിയുമാണ്.

2017 ഫെബ്രുവരി 17നാണ് ഓടിക്കൊണ്ടിരിക്കുന്ന വാഹനത്തില്‍ വച്ച് നടി ആക്രമത്തിന് ഇരായയത്. നടന്‍ ദിലീപിനെ തെളിവുകളുടെ അടിസ്ഥാനത്തില്‍ ജൂലൈ 10 ന് അറസ്റ്റ് ചെയ്തു. നടന്‍ ദിലീപടക്കം കേസില്‍ 9 പ്രതികളാണ് ഉള്ളത്. 

2025 ഏപ്രിലിലാണ് കേസിന്റെ അന്തിമവാദം പൂര്‍ത്തിയായത്. കുറ്റകൃത്യം നടന്ന് ഏഴ് വര്‍ഷത്തിന് ശേഷമാണ് വിധി വരുന്നത്.

ദിലീപ് ഉള്‍പ്പെടെ എല്ലാ പ്രതികളും ഡിസംബര്‍ എട്ടിന് വിചാരണകോടതിയില്‍ ഹാജരാവണം. അനുബന്ധ കുറ്റപത്രം അനുസരിച്ച് ബലാത്സംഗ ഗൂഡാലോചന കേസിലാണ് ദിലീപിനെ പ്രതിചേര്‍ത്തത്.  അക്രമിക്കപ്പെട്ട നടിയോടുള്ള വ്യക്തിവൈരാഗ്യം തീര്‍ക്കാന്‍ ഒന്നാം പ്രതിയായ പള്‍സര്‍ സുനിയ്ക്ക് ക്വട്ടേഷന്‍ നല്‍കിയത് ദിലീപാണെന്നാണ് കുറ്റപത്രത്തില്‍ പറയുന്നത്. 

2018 മാര്‍ച്ച് എട്ടിനാണ് കേസില്‍ വിചാരണ തുടങ്ങിയത്. പ്രോസിക്യൂഷനും പ്രതിഭാഗവും സാക്ഷിവിസ്താരത്തിനിടെ പലതവണ മേല്‍ക്കോടതികളില്‍ ഹരജികള്‍ നല്‍കിയിരുന്നു. 261 സാക്ഷികളെ വിസ്തരിച്ച കോടതി 1700 രേഖകളും പരിഗണിച്ചു.

The Ernakulam Principal Sessions Court will deliver its verdict in the actress assault case on December 8. Pulsar Suni is the prime accused, while actor Dileep is the eighth accused in the case.