ഒട്ടാവ: വംശാവലി അനുസരിച്ച് പൗരത്വനിയമങ്ങളിൽ കാനഡ കൊണ്ടുവന്ന മാറ്റം രാജ്യത്തേക്ക് കുടിയേറ്റം ആഗ്രഹിക്കുന്ന ഇന്ത്യക്കാർക്ക് അനുകൂലം. വിദേശത്ത് ജനിച്ചതോ ദത്തെടുത്തതോ ആയ കനേഡിയൻ മാതാപിതാക്കൾക്ക് കാനഡയ്ക്ക് പുറത്ത് ജനിച്ചതോ ദത്തെടുത്തതോ ആയ കുട്ടിക്ക് പുതിയ നിയമപ്രകാരം പൗരത്വം എളുപ്പത്തിൽ ലഭിക്കും. ഇത്തരത്തിലുള്ള കുട്ടികൾക്ക് പൗരത്വം അനുവദിക്കുന്നതിലുള്ള തടസ്സം നീക്കുന്ന ഭരണഘടനാ ഭേദഗതിക്ക് രാജാവ് കഴിഞ്ഞദിവസം അംഗീകാരം നൽകി. ഭേദഗതി ബിൽ കഴിഞ്ഞയാഴ്ച പാർലമെന്റിന്റെ ഇരുസഭകളും പാസാക്കിയിരുന്നു. അതേസമയം, നിയമം പ്രാബല്യത്തിലാകുന്ന തീയതി പ്രഖ്യാപിച്ചിട്ടില്ല. അതുവരെ ഇടക്കാല നടപടികളാകാമെന്ന് ഔദ്യോഗിക വൃത്തങ്ങൾ പറഞ്ഞു. 

കാനഡയുടെ പൗരത്വ നിയമങ്ങളിലെ ദീർഘകാലമായുള്ള പ്രശ്‌നങ്ങൾ പരിഹരിക്കാൻ ഉദ്ദേശിച്ചുള്ളതാണ് ബില്ലെന്ന് കാനഡയുടെ കുടിയേറ്റകാര്യ മന്ത്രി ലെന മെറ്റ്‌ലെജ് ഡയബ് പറഞ്ഞു. വിദേശത്ത് ജനിക്കുകയോ ദത്തെടുക്കുകയോ ചെയ്ത കുട്ടികളുള്ള കുടുംബങ്ങൾക്ക് നിയമം നീതി ഉറപ്പാക്കുന്നു. നേരത്തെയുള്ള നിയമങ്ങൾമൂലം ഒഴിവാക്കപ്പെട്ട ആളുകൾക്ക് ഇതോടെ പൗരത്വം ലഭിക്കും. പുതിയ മാറ്റങ്ങൾ കനേഡിയൻ പൗരത്വത്തെ ശക്തിപ്പെടുത്തുകയും സംരക്ഷിക്കുകയും ചെയ്യുമെന്നും മന്ത്രി ട്വീറ്റ് ചെയ്തു.

ALSO READ: അബൂദബി ചര്‍ച്ച വിജയം; റഷ്യ - ഉക്രൈന്‍ യുദ്ധം തീരുന്നു; സമാധാന നിര്‍ദേശങ്ങള്‍ ഉക്രൈന്‍ അംഗീകരിച്ചതായി യു.എസ് 

കാനഡയിൽ പൗരത്വമുള്ള മാതാപിതാക്കളിലൊരാൾ വിദേശത്ത് ജനിച്ചതോ ദത്തെടുക്കപ്പെട്ടയാളോ ആണെങ്കിൽ, അവരുടെ വിദേശത്തു ജനിച്ചതോ ദത്തെടുക്കപ്പെട്ടതോ ആയ മക്കളെ സ്വയമേവ കനേഡിയൻ പൗരരായി കണക്കാക്കില്ലെന്നായിരുന്നു ഇതുവരെയുള്ള വ്യവസ്ഥ. ഇതുസംബന്ധിച്ച 2009 ലെ ഭേദഗതി ഭരണഘടനാവിരുദ്ധമാണെന്ന് 2023 ഡിസംബറിൽ ഒന്റേറിയോ സുപ്പീരിയർ കോർട്ട് ഓഫ് ജസ്റ്റിസ് വിധിച്ചു. ഈ വിധിക്കെതിരേ സർക്കാർ അപ്പീൽ നൽകിയില്ല. പകരം, വ്യവസ്ഥ കൂടുതൽ ഉദാരമാക്കി ഭരണഘടനാ ഭേദഗതി കൊണ്ടുവരികയായിരുന്നു.

canada changes citizenship laws huge opportunities for indians