തളിക്കുളം: തളിക്കുളം ഗ്രാമ പഞ്ചായത്തിലെ മൂന്നാം വാർഡിൽ നടന്ന തദ്ദേശ തെരഞ്ഞെടുപ്പിൽ കള്ളവോട്ട് നടന്നതായി പരാതി. യഥാർത്ഥ വോട്ടറായ മൊഹ്സിന എന്നയാൾ വോട്ട് ചെയ്യാനെത്തിയപ്പോഴാണ് തൻ്റെ വോട്ട് മറ്റൊരാൾ നേരത്തേ ചെയ്തതായി അറിയുന്നത്. പോളിങ് ഉദ്യോഗസ്ഥരുടെയും സ്ഥാനാർഥികളുടെ ഏജൻ്റുമാരുടെയും ഭാഗത്ത് ഗുരുതരമായ വീഴ്ച സംഭവിച്ചതായി ആരോപണമുയർന്നിട്ടുണ്ട്.

ബൂത്ത് നമ്പർ 2-ലാണ് സംഭവം. അറക്കവീട്ടിൽ സക്കീറിൻ്റെ ഭാര്യയായ മൊഹ്‌സിന രാവിലെ എട്ടരയോടെ വോട്ട് ചെയ്യാനായി പോളിങ് ബൂത്തിലെത്തി. എന്നാൽ, അതിന് മുമ്പ് തന്നെ ഇവരുടെ വോട്ട് മറ്റൊരു വ്യക്തി ചെയ്ത് മടങ്ങിയെന്ന് ഉദ്യോഗസ്ഥർ അറിയിച്ചു. കള്ളവോട്ട് ചെയ്ത വ്യക്തിയെ പിടികൂടാൻ ഇതുവരെ സാധിച്ചില്ല.

സംഭവത്തെ തുടർന്ന് ബൂത്തിൽ ഏറെനേരം അനിശ്ചിതത്വം നിലനിന്നു. വോട്ടർമാരെ തിരിച്ചറിയാൻ കഴിവുള്ളവരല്ല സ്ഥാനാർഥികളുടെ പോളിങ് ഏജൻ്റുമാരായി ഉണ്ടായിരുന്നതെന്നാണ് ഈ സംഭവം സൂചിപ്പിക്കുന്നത്. കൂടാതെ, പോളിങ് ഉദ്യോഗസ്ഥർ തിരിച്ചറിയൽ രേഖകൾ പരിശോധിക്കുന്നതിൽ കുറ്റകരമായ അനാസ്ഥ വരുത്തിയെന്നും ആരോപണമുണ്ട്.

നീണ്ട നേരത്തെ വാദപ്രതിവാദങ്ങൾക്കും ചർച്ചകൾക്കുമൊടുവിൽ യഥാർത്ഥ വോട്ടറായ മൊഹ്‌സിനക്ക് ബാലറ്റ് പേപ്പർ നൽകി 'ടെൻഡേർഡ് വോട്ട്' രേഖപ്പെടുത്താൻ അവസരം നൽകി. ഈ വോട്ട് പ്രത്യേകം കവറിലാക്കി സൂക്ഷിച്ചിരിക്കുകയാണ്. കൂടുതൽ വോട്ട് ലഭിച്ച രണ്ട് സ്ഥാനാർഥികൾക്ക് തുല്യ വോട്ടുകൾ ലഭിക്കുകയാണെങ്കിൽ മാത്രമേ ഈ കവറിലുള്ള വോട്ട് എണ്ണുകയുള്ളൂ.

തദ്ദേശ തെരഞ്ഞെടുപ്പിൽ തളിക്കുളം മേഖലയിൽ കള്ളവോട്ട് സംഭവം ആവർത്തിക്കുകയാണ്. 2020-ലെ തെരഞ്ഞെടുപ്പിൽ തളിക്കുളം 13-ാം വാർഡിലും സമാനമായ രീതിയിൽ കള്ളവോട്ട് നടന്നിരുന്നു. സംഭവത്തിൽ തിരഞ്ഞെടുപ്പ് കമ്മിഷൻ തുടർ നടപടികൾ സ്വീകരിക്കുമോ എന്ന കാത്തിരിപ്പിലാണ് രാഷ്ട്രീയ പാർട്ടികളും വോട്ടർമാരും.

A woman named Mohsina arrived at Booth No. 2 in Ward 3 of Thalikkulam Grama Panchayat to cast her vote, only to discover that another person had already voted using her ballot. This indicates a case of bogus voting (kallavottu). The incident suggests serious negligence on the part of polling officials in verifying identity documents, and also highlights that the polling agents present were unfamiliar with the local voters. Mohsina was eventually allowed to cast a tendered vote, which was sealed separately and will only be counted if there is a tie between the top two candidates. A similar incident was reported in Thalikkulam in the 2020 local body elections.