നിലമ്പൂര്‍: വിദ്യാര്‍ഥികളില്‍ റോഡ് സുരക്ഷാ അവബോധം വളര്‍ത്തുന്നതിനായി നിലമ്പൂര്‍ ജനമൈത്രി പൊലിസ് പൂക്കളമത്സരം നടത്തി. പൊലിസ് സ്‌റ്റേഷന്‍ കോംപൗണ്ടില്‍ നടന്ന മത്സരത്തില്‍ നിലമ്പൂര്‍ നഗരസഭ പരിധിയിലെ ഏഴ് സ്‌കൂളുകളിലെ സ്റ്റുഡന്റ്‌സ് പ്രൊട്ടക്ഷന്‍ ഗ്രൂപ്പുകള്‍ പങ്കെടുത്തു. വെളിയംതോട് ഇന്ദിരാഗാന്ധി മെമ്മോറിയല്‍ മോഡല്‍ റെസിഡന്‍ഷ്യല്‍ സ്‌കൂള്‍ ഒന്നാം സ്ഥാനം നേടി. അധ്യാപകനായ കിഷോര്‍ കുമാറിന്റെ നേതൃത്വത്തില്‍ എട്ട് വിദ്യാര്‍ഥികള്‍ ചേര്‍ന്ന് ഒരുക്കിയ റോഡ് സുരക്ഷാ പൂക്കളം ഏവരുടെയും ശ്രദ്ധ പിടിച്ചുപറ്റി.
മത്സരങ്ങള്‍ രാവിലെ മലപ്പുറം ചൈല്‍ഡ് വെല്‍ഫെയര്‍ കമ്മിറ്റി ചെയര്‍മാന്‍ അഡ്വ. ഷെരീഫ് ഉള്ളത്ത് ഉദ്ഘാടനം ചെയ്തു. പെരിന്തല്‍മണ്ണ ഡി.വൈ.എസ്.പി എം.പി മോഹനചന്ദ്രന്‍ സമ്മാനങ്ങള്‍ വിതരണം ചെയ്തു. നിലമ്പൂര്‍ സി.ഐ. കെ.എം ദേവസ്യ അധ്യക്ഷനായി. എസ്.ഐ മനോജ് പറയറ്റ, അഡീഷണല്‍ എസ്.ഐമാരായ അബൂബക്കര്‍, പി.കെ അജിത്, എസ്.സി.പിഒമാരായ എം.ആര്‍ സജി, എന്‍ രവീന്ദ്രന്‍, പി മോഹന്‍ദാസ് നേതൃത്വം നല്‍കി.
പൊലിസ് സ്‌റ്റേഷനില്‍ ഭയം കൂടാതെ ആര്‍ക്കും കടന്നുവരുവാനും പരാതികളടക്കമുള്ള വിഷയങ്ങള്‍ ബോധിപ്പിക്കുവാനുമുള്ള സൗഹൃദ അന്തരീക്ഷമാണ് നിലവിലുള്ളതെന്ന് പൊതുജനങ്ങളെ ബോധ്യപ്പെടുത്തുന്നതിനുമായാണ് പൂക്കളമത്സരം സംഘടിപ്പിച്ചത്.