ഖത്തര്‍: ഖത്തറിലെ പ്രമുഖ പൊതു ഗവേശണ സര്‍വകലാശാലയായ ഖത്തര്‍ യൂണിവേഴ്‌സിറ്റി 2026 അധ്യായനവര്‍ശത്തിലേക്കുളള സൗജന്യ സ്‌കോളര്‍ശിപ്പ് പ്രഖ്യാപിച്ചു. ഇന്ത്യ ഉള്‍പ്പെടെ ലോകത്തിന്റെ വിവിധ രാജ്യങ്ങളില്‍ നിന്നുളള വിദ്യാര്‍ത്ഥികള്‍ക്ക് ഈ അവസരം ലഭിക്കും. മാസ്റ്റേഴ്‌സ്, പി.എച്ച്.ഡി., ഫാര്‍മസി പോലുള്ള ബിരുദാനന്തര കോഴ്‌സുകളിലേക്കാണ് സ്‌കോളര്‍ഷിപ്പ് അനുവദിക്കുന്നത്.

പഠനച്ചെലവിന്റെ ഭാരമില്ലാതെ വിദ്യാര്‍ത്ഥികള്‍ക്ക് പഠനം തുടരാന്‍ സഹായിക്കുന്നതാണ് ഈ പദ്ധതി. സ്‌കോളകര്‍ശിപ്പ് അര്‍ഹരായി തിരഞ്ഞെടുക്കപ്പെടുന്ന വിദ്യാര്‍ത്ഥികള്‍ക്ക് ട്യൂഷന്‍ ഫീസ് മുഴുവനായും ഒഴിവാക്കും. സര്‍വകലാശാല ഹോസ്റ്റലില്‍ സൗജന്യ താമസ സൗകര്യവും നല്‍കും. പാഠപുസ്തകങ്ങള്‍ക്കുള്ള ചെലവുകളും മറ്റും ഖത്തര്‍ യൂണിവേഴ്‌സിറ്റി തന്നെ വഹിക്കും. വിദേശ വിദ്യാര്‍ത്ഥികള്‍ക്ക് വര്‍ഷത്തില്‍ ഒരിക്കല്‍ തിരിച്ചും മടങ്ങിവരുവാനുമുളള വിമാന ടിക്കറ്റും സ്‌കോളര്‍ശിപ്പിന്റെ ഭാഗമായി നല്‍കും. ഇതോടെ സാമ്പത്തിക കാരണങ്ങളാല്‍ പഠനം ഉപേക്ഷിക്കേണ്ടിവരുന്ന സാഹചര്യം ഒഴിവാക്കാനാകും.

എല്ലാ രാജ്യങ്ങളിലെയും വിദ്യാര്‍ത്ഥികള്‍ക്ക് അപേക്ഷിക്കാം. മാസ്റ്റേഴ്‌സ് കോഴ്‌സുകള്‍ക്ക് അപേക്ഷിക്കുന്നവര്‍ക്ക് അംഗീകൃത സര്‍വകലാശാലയില്‍ നിന്നുള്ള ബിരുദം നിര്‍ബന്ധമാണ്. പി.എച്ച്.ഡി. പ്രോഗ്രാമുകള്‍ക്ക് മാസ്റ്റേഴ്‌സ് ബിരുദവും മികച്ച അക്കാദമിക് റെക്കോഡും വേണം. ചില വിഷയങ്ങളില്‍ പ്രവേശന പരീക്ഷാഫലങ്ങളും ആവശ്യമായി വന്നേക്കും. പഠനം മുഴുവനായും ഇംഗ്ലീഷ് ഭാഷയിലാണ് നടക്കുന്നത്.

ബിസിനസ്, എഞ്ചിനീയറിംഗ്, മെഡിസിന്‍, പബ്ലിക് ഹെല്‍ത്ത്, നിയമം, വിദ്യാഭ്യാസം, എന്‍വയോണ്‍മെന്റല്‍ സയന്‍സ്, ഫാര്‍മസി, ഇസ്ലാമിക് സ്റ്റഡീസ് തുടങ്ങിയ മേഖലകളിലാണ് കോഴ്‌സുകള്‍ ലഭ്യമാകുന്നത്. അന്താരാഷ്ട്ര നിലവാരത്തിലുള്ള പഠനവും ഗവേഷണ സൗകര്യങ്ങളും ഖത്തര്‍ യൂണിവേഴ്‌സിറ്റിയുടെ പ്രത്യേകതയായി കണക്കാക്കപ്പെടുന്നു.

ഓണ്‍ലൈനായാണ് അപേക്ഷ സമര്‍പ്പിക്കേണ്ടത്. ഖത്തര്‍ യൂണിവേഴ്‌സിറ്റിയുടെ ഔദ്യോഗിക അഡ്മിഷന്‍ പോര്‍ട്ടലില്‍ ആവശ്യമായ രേഖകള്‍ അപ്‌ലോഡ് ചെയ്ത ശേഷം അപേക്ഷ നല്‍കാം. വിദ്യാഭ്യാസ സര്‍ട്ടിഫിക്കറ്റുകള്‍, മാര്‍ക്ക് ലിസ്റ്റുകള്‍, ശുപാര്‍ശ കത്തുകള്‍ തുടങ്ങിയവ നിര്‍ബന്ധമാണ്. അപേക്ഷ നല്‍കാനുള്ള അവസാന തീയതി 2026 ഫെബ്രുവരി 25 ആണ്.

സാമ്പത്തിക പരിമിതികള്‍ കാരണം വിദേശ വിദ്യാഭ്യാസ സ്വപ്നങ്ങള്‍ മാറ്റിവയ്‌ക്കേണ്ടിവന്ന വിദ്യാര്‍ത്ഥികള്‍ക്ക് ഈ സ്‌കോളര്‍ഷിപ്പ് വലിയ ആശ്വാസമാകുമെന്നാണ് വിദ്യാഭ്യാസ വിദഗ്ധരുടെ അഭിപ്രായം. അന്താരാഷ്ട്ര സര്‍വകലാശാലയില്‍ പഠിക്കാന്‍ ആഗ്രഹമുള്ളവര്‍ക്ക് ഈ അവസരം പരമാവധി പ്രയോജനപ്പെടുത്തണമെന്നതാണ് നിര്‍ദേശം.

Qatar University has announced a free scholarship for the 2026 academic year, offering full study support to students from various countries for postgraduate and doctoral programmes.