തിരുവനന്തപുരം: ഏറെ വിവാദങ്ങള്‍ക്കൊടുവില്‍ വി.കെ പ്രശാന്ത് ശാസ്തമംഗലത്തെ എംഎല്‍എ ഓഫീസ് ഒഴിയുന്നു. മരുതംകുഴിയിലാണ് പുതിയ എംഎല്‍എ ഓഫീസ്. വിവാദങ്ങള്‍ ഒഴിവാക്കാനാണ് കോര്‍പറേഷന്‍ ഓഫീസ് മാറാനുള്ള നീക്കം. എംഎല്‍എ ആയ കാലം മുതല്‍ ഇവിടെയാണ് ഓഫീസ്. 300 സ്‌ക്വയര്‍ ഫീറ്റ് ഓഫീസ് കെട്ടിടത്തിന് 832 രൂപയായിരുന്നു വാടക.

തദ്ദേശ തെരഞ്ഞെടുപ്പിന് പിന്നാലെ ശാസ്തമംഗലത്തെ ബിജെപി കൗണ്‍സിലറായ ആര്‍ ശ്രീലേഖ ഓഫീസ് ഒഴിയണമെന്ന് വികെ പ്രശാന്തിനോട് ആവശ്യപ്പെട്ടത് വിവാദങ്ങള്‍ക്ക് വഴിവെച്ചിരുന്നു. അന്ന് ഓഫീസ് ഒഴിയില്ലെന്നായിരുന്നു വികെ പ്രശാന്ത് അറിയിച്ചിരുന്നത്. പ്രശാന്തിന് കെട്ടിടം വാടകയ്ക്ക് നല്‍കിയത് മുന്‍ കൗണ്‍സിലറാണ്. അടുത്ത മാര്‍ച്ച് വരെ കെട്ടിടത്തിന് വാടക കരാര്‍ കാലാവധിയുണ്ടെന്നിരിക്കെയാണ് കെട്ടിടം ഓഫീസ് ഒഴിയാന്‍ വികെ പ്രശാന്ത് തയാറായിരിക്കുന്നത്.