ആലുവ: പ്രായപൂര്‍ത്തിയാകാത്ത പെണ്‍കുട്ടിയുമായി കേരളത്തില്‍ സുരക്ഷിതമായി കഴിയാമെന്ന മോഹവുമായി അസമില്‍ നിന്നെത്തിയ യുവാവും സംഘവും റെയില്‍വേ പൊലിസിന്റെ വലയിലായി. അസം നാഗോണ്‍ സ്വദേശിയായ സദ്ദാം ഹുസൈന്‍, ഇയാളുടെ ബന്ധു ഹബീബുല്‍ റഹ്മാന്‍, ഭാര്യ അഫ്‌സാന ബീഗം എന്നിവരെയാണ് ആലുവയില്‍ വെച്ച് ആര്‍.പി.എഫ് കസ്റ്റഡിയിലെടുത്തത്.

ഡിബ്രുഗഡ്  കന്യാകുമാരി എക്‌സ്പ്രസില്‍ കേരളത്തിലെത്തിയ സംഘം ഞായറാഴ്ച വൈകുന്നേരമാണ് ആലുവ റെയില്‍വേ സ്റ്റേഷനില്‍ ഇറങ്ങിയത്. ബന്ധുവായ യുവതിയുടെ കൈക്കുഞ്ഞും ഇവര്‍ക്കൊപ്പമുണ്ടായിരുന്നു. പെണ്‍കുട്ടിയെ കാണാതായതിനെ തുടര്‍ന്ന് വീട്ടുകാര്‍ അസമിലെ സദര്‍ പൊലിസ് സ്റ്റേഷനില്‍ പരാതി നല്‍കിയിരുന്നു.

മൊബൈല്‍ ലൊക്കേഷന്‍ കേന്ദ്രീകരിച്ച് നടത്തിയ അന്വേഷണത്തില്‍ സംഘം കേരളത്തിലേക്ക് കടന്നതായി അസം പൊലിസ് കണ്ടെത്തുകയും ഉടന്‍ തന്നെ കേരള റെയില്‍വേ പൊലിസിനെ വിവരമറിയിക്കുകയും ചെയ്തു. ട്രെയിന്‍ ആലുവയില്‍ എത്തിയ ഉടന്‍ തന്നെ ആര്‍.പി.എഫ് സംഘം ഇവരെ തിരിച്ചറിഞ്ഞ് തടഞ്ഞുവെക്കുകയായിരുന്നു.

ALSO READ: സ്ഥാനാര്‍ഥികളുടെ മരണം; മൂന്ന് തദ്ദേശ വാര്‍ഡുകളിലേക്ക് നടന്ന തെരഞ്ഞെടുപ്പ് ഫലം ഇന്ന് 

നിയമനടപടികള്‍:
പ്രതികള്‍ക്കെതിരെ അസമില്‍ പോക്‌സോ നിയമപ്രകാരവും തട്ടിക്കൊണ്ടുപോകലിനുമാണ് കേസെടുത്തിരിക്കുന്നത്. പ്രതികള്‍ മുന്‍പ് പെരുമ്പാവൂര്‍ മേഖലയില്‍ ജോലി ചെയ്തിട്ടുള്ളവരാണ്. അതുകൊണ്ടാണ് ഒളിച്ചുതാമസിക്കാന്‍ കൊച്ചി തിരഞ്ഞെടുത്തതെന്ന് കരുതുന്നു. നിലവില്‍ പെണ്‍കുട്ടിയെയും യുവതിയെയും കുഞ്ഞിനെയും സംരക്ഷണ കേന്ദ്രത്തിലേക്ക് മാറ്റിയിട്ടുണ്ട്. മറ്റു രണ്ട് പ്രതികള്‍ പൊലിസ് കസ്റ്റഡിയിലാണ്. ചൊവ്വാഴ്ച അസം പൊലിസ് സംഘം കേരളത്തിലെത്തിയ ശേഷം പ്രതികളെയും പെണ്‍കുട്ടിയെയും അസമിലേക്ക് കൊണ്ടുപോകും.

Railway Police arrested an Assam youth and two relatives in Aluva after tracking them down for abducting a minor girl and attempting to hide in Kerala, with cases registered under the POCSO Act and kidnapping charges in Assam.