പൊന്നാനി: വീടിനുള്ളിൽ രഹസ്യമായി കഞ്ചാവ് ചെടികൾ വളർത്തി വിൽപന നടത്തിവന്ന യുവാവിനെ പൊന്നാനി പൊലിസ് പിടികൂടി. പുതുപൊന്നാനി സ്വദേശി പൊന്നാക്കാരൻ ഹക്കീമിനെയാണ് (30) പൊലിസ് സംഘം അറസ്റ്റ് ചെയ്തത്. വീടിനുള്ളിലെ ശുചിമുറി കേന്ദ്രീകരിച്ചായിരുന്നു ഇയാൾ കൃഷി നടത്തിയിരുന്നത്.

ശുചിമുറിക്കുള്ളിൽ ചട്ടികളിലായി വളർത്തിയിരുന്ന 25 കഞ്ചാവ് തൈകൾ പൊലിസ് കണ്ടെടുത്തു.കൂടാതെ തൈകൾക്ക് പുറമെ കഞ്ചാവ് വിത്തുകളും ഇയാളുടെ പക്കൽ നിന്നും പൊലിസ് കണ്ടെടുത്തിട്ടുണ്ട്.പൊന്നാനി എസ്.ഐ ആന്റോയുടെ നേതൃത്വത്തിലുള്ള പോലീസ് സംഘമാണ് പ്രതിയെ പിടികൂടിയത്.പിടിയിലായ ഹക്കീം ഭിന്നശേഷിക്കാരനാണെന്ന് പൊലിസ് അറിയിച്ചു.

ലഹരി വിൽപനയ്ക്കായി വീട്ടിൽ തന്നെ ചെടികൾ വളർത്തുന്നുണ്ടെന്ന രഹസ്യ വിവരത്തിന്റെ അടിസ്ഥാനത്തിലായിരുന്നു പൊലിസ് പരിശോധന. സംഭവത്തിൽ കൂടുതൽ അന്വേഷണം നടന്നുവരികയാണ്.