2026 ഐസിസി അണ്ടർ 19 ലോകകപ്പിൽ ഇന്ത്യക്ക് വിജയത്തുടക്കം. ആദ്യ മത്സരത്തിൽ യുഎസ്എയെ ആറ് വിക്കറ്റുകൾക്കാണ് ഇന്ത്യൻ കൗമാരപട തകർത്തത്. ബുലവായോയിലെ ക്വീൻസ് സ്പോർട്സ് ക്ലബ്ബിൽ നടന്ന മത്സരത്തിൽ ആദ്യം ബാറ്റ് ചെയ്ത യുഎസ്എ 35.2 ഓവറിൽ 107 റൺസിന്‌ പുറത്തായി. മഴക്ക് പിന്നാലെ ഡക്ക് വർത്ത് ലൂയിസ് നിയമപ്രകാരം മത്സരം 37 ഓവറിൽ 96 റൺസാക്കി ചുരുക്കി. ഈ ലക്ഷ്യത്തിലേക്ക് ബാറ്റെടുത്ത ഇന്ത്യ 17.2 ഓവറിൽ നാല് വിക്കറ്റ് നഷ്ടത്തിൽ ലക്ഷ്യം മറികടന്നു. 

മത്സരത്തിൽ 41 പന്തിൽ പുറത്താവാതെ 43 റൺസ് നേടി അഭിഗ്യാൻ കുണ്ടു ഇന്ത്യൻ നിരയിൽ തിളങ്ങി. അഞ്ചു ഫോറുകളും ഒരു സിക്‌സും അടങ്ങുന്നതാണ് താരത്തിന്റെ പ്രകടനം. ക്യാപ്റ്റൻ ആയുഷ് മാത്രേ 19 റൺസും വിഹാർ മൽഹോത്ര 18 റൺസും സ്വന്തമാക്കി. വൈഭവ് സൂര്യവംശി നിരാശപ്പെടുത്തി. നാല് പന്തിൽ രണ്ട് റൺസ് നേടിയാണ് വൈഭവ് മടങ്ങിയത്. 

ഇന്ത്യൻ ബൗളിങ്ങിൽ അഞ്ചു വിക്കറ്റുകൾ വീഴ്ത്തി ഹെനിൻ പട്ടേൽ മിന്നും പ്രകടനമാണ് നടത്തിയത്. ഏഴ് ഓവറിൽ ഒരു മെയ്ഡൻ അടക്കം 16 റൺസ് വിട്ടുനൽകിയാണ് താരം അമേരിക്കയുടെ അഞ്ചു വിക്കറ്റുകൾ സ്വന്തമാക്കിയത്. 

ജയത്തോടെ ഗ്രൂപ്പ് എയിൽ ഒന്നാം സ്ഥാനത്തെത്താനും ഇന്ത്യക്ക് സാധിച്ചു. ജനുവരി 17ന് ബംഗ്ലാദേശിനെതിരെയാണ് ഇന്ത്യയുടെ അടുത്ത മത്സരം. 

India secured victory in the 2026 ICC Under-19 World Cup. The Indian youth team defeated the USA by six wickets in the first match. Abhigyan Kundu shone for the Indian team by scoring an unbeaten 43 runs off 41 balls. The player's performance included five fours and a six.