കുണിയ: ലി കുല്ലി ദാഇൻ ദവാഅ്... (എല്ലാ രോഗത്തിനും പ്രതിവിധിയുണ്ട്). പ്രവാചക വൈദ്യത്തെ പരിചയപ്പെടുത്തി പ്രൊഫറ്റിക് ഹോസ്പിറ്റൽ ഒരുക്കി വെങ്ങപ്പള്ളി ശംസുൽ ഉലമ ഇസ്ലാമിക് അക്കാദമി. സമസ്ത ഗ്ലോബൽ എക്‌സ്‌പോയിലാണ് പ്രവാചകൻ (സ്വ) പരിചയപ്പെടുത്തിയ ജീവിത ചിട്ടകളും നമുക്ക് മുന്നിൽ വിളഞ്ഞ് നിൽക്കുന്ന ഔഷധങ്ങളെക്കുറിച്ചും വിവരിക്കുന്നത്.

അജ് വ ഈത്തപ്പഴം, സന മക്കി, കരിഞ്ജീരകം, തൽബീന, സഫർജൽ, തേൻ, അത്തിപ്പഴം, ആനക്കൂവ, സൈത്തൂൻ, ഇഞ്ചി എന്നിങ്ങനെ ഒട്ടനവധി ഒറ്റമൂലികളും അവയുടെ ഉപയോഗങ്ങളും അതുവഴി ലഭിക്കുന്ന ആശ്വാസങ്ങളും പരിചയപ്പെടുത്തുന്നത്. സ്ഥാപനത്തിലെ വിദ്യാർഥികൾ തന്നെ ഒരുക്കിയ ആർട്ട് വർക്കുകളും ഹോളോഗ്രാമും രോഗങ്ങൾക്ക് ഉടനടി പരിഹാരം പറയുന്ന എ.ഐ റോബോട്ടും ചാറ്റ്‌ബോട്ടും പ്രധാന ആകർഷണങ്ങളാണ്.

യുദ്ധവേളയിലെ അത്യാവശ്യ വൈദ്യസഹായം നൽകിയിരുന്ന ഖൈമ, ബീമാരിസ്ഥാൻ എന്നിങ്ങനെ തുടങ്ങി അത്യാധുനിക ആശുപത്രികളിലെത്തുന്ന വൈദ്യശാലകളുടെ വളർച്ചയും പ്രവാചക വൈദ്യത്തിൽ പ്രാചീന കാലം മുതൽ ഉപയോഗിച്ചു വന്നിരുന്ന ശസ്ത്രക്രിയ ഉപകരണങ്ങളുടെ മാതൃകകളും ശ്രദ്ധേയമാണ്. ഡോ. ഹംസക്കുട്ടി ബാഖവിയുടെ റിസർച്ച് ഗ്രന്ഥമായ ദി പ്രൊഫറ്റിക് മെഡിസിൻ ഇൻ ഓണോമാസ്റ്റിക്‌സ് എന്ന ഗ്രന്ഥത്തെ പ്രധാന റഫറൻസ് ആക്കി ഒരുക്കിയ പ്രദർശനത്തിൽ റാസി ഇമാം, സഹ്‌റാവി ഇമാം തുടങ്ങി പ്രവാചക വൈദ്യത്തിൽ ടോപ് ടെൻ മാസ്റ്റേഴ്‌സ് എന്നറിയപ്പെടുന്ന പണ്ഡിതരെ പരിചയപ്പുടുത്തുന്നുമുണ്ട്.