അബൂദബി: മിഡില്‍ ഈസ്റ്റ് ആന്റ് നോര്‍ത്ത് ആഫ്രിക്ക (മെന) മേഖലയിലെ പ്രമുഖ ആരോഗ്യ സേവന ദാതാക്കളായ ബുര്‍ജീല്‍ ഹോള്‍ഡിങ്‌സ് 2024 സാമ്പത്തിക വര്‍ഷത്തില്‍ മികച്ച വളര്‍ച്ച രേഖപ്പെടുത്തി. ഡിസംബര്‍ 31ന് അവസാനിച്ച 12 മാസത്തെ പ്രാഥമിക സാമ്പത്തിക ഫലങ്ങള്‍ പ്രകാരം ഗ്രൂപ്പിന്റെ അറ്റാദായം 39.5 ശതമാനം വര്‍ധിച്ച് 503 മില്യണ്‍ ദിര്‍ഹത്തില്‍ (ഏകദേശം 1,240 കോടി രൂപ) എത്തി.
ഗ്രൂപ്പിന്റെ ആകെ വരുമാനം മുന്‍വര്‍ഷത്തെ അപേക്ഷിച്ച് 9.8 ശതമാനം വര്‍ധിച്ച് 5,501 മില്യണ്‍ ദിര്‍ഹമായി. രോഗീ സന്ദര്‍ശനങ്ങളുടെ എണ്ണത്തിലും വന്‍ വര്‍ധനവുണ്ടായിട്ടുണ്ട്. 8.4 ശതമാനം വളര്‍ച്ചയോടെ ആകെ സന്ദര്‍ശകരുടെ എണ്ണം 7 മില്യണ്‍ കവിഞ്ഞു. ഇബിറ്റഡ (EBITDA) 19.9 ശതമാനം ഉയര്‍ന്ന് 1,089 മില്യണ്‍ ദിര്‍ഹമായി മാറി.
ഗ്രൂപ്പിന് കീഴിലുള്ള പ്രമുഖ ആശുപത്രികളായ ബുര്‍ജീല്‍ മെഡിക്കല്‍ സിറ്റി, മെഡിയോര്‍ ഹോസ്പിറ്റല്‍ അബൂദബി, ബുര്‍ജീല്‍ ഹോസ്പിറ്റല്‍ അബൂദബി, ലൈഫ് കെയര്‍ ഹോസ്പിറ്റല്‍ മുസഫ എന്നിവയിലൂടെ 89,700ലധികം ശസ്ത്രക്രിയകളാണ് കഴിഞ്ഞ വര്‍ഷം നടന്നത്. നാലാം പാദത്തില്‍ മാത്രം അറ്റാദായത്തില്‍ 159.9 ശതമാനത്തിന്റെ അവിശ്വസനീയമായ വളര്‍ച്ചയാണ് കമ്പനി കൈവരിച്ചത്.
ആരോഗ്യ മേഖലയിലെ അത്യാധുനിക നിക്ഷേപങ്ങളും സങ്കീര്‍ണ്ണമായ ചികിത്സാ രീതികള്‍ക്ക് ലഭിക്കുന്ന വന്‍ സ്വീകാര്യതയുമാണ് ഈ വിജയത്തിന് പിന്നിലെന്നും ഓഹരിയുടമകള്‍ക്ക് ദീര്‍ഘകാല മൂല്യം ഉറപ്പാക്കാനും ഉയര്‍ന്ന നിലവാരമുള്ള സേവനം നല്‍കാനും ഞങ്ങള്‍ പ്രതിജ്ഞാബദ്ധരാണെന്നും ബുര്‍ജീല്‍ ഹോള്‍ഡിങ്‌സ് ചെയര്‍മാന്‍ & സി.ഇ.ഒ ഡോ. ഷംഷീര്‍ വയലില്‍ പറഞ്ഞു.
മേഖലയിലെ മാറുന്ന വിപണി സാഹചര്യങ്ങള്‍ക്കനുസരിച്ചുള്ള തന്ത്രപരമായ ഇടപെടലുകളും വിപുലീകരണ പ്രവര്‍ത്തനങ്ങളുമാണ് ബുര്‍ജീല്‍ ഹോള്‍ഡിങ്‌സിനെ ഈ വലിയ നേട്ടത്തിലേക്ക് നയിച്ചത്.

ALSO READ: സഅദിയാത്ത് ഐലന്‍ഡിലെ അഡ്‌നോക് ഹബ്ബില്‍ 'ലുലു ഡെയ്‌ലി' തുറന്നു

English Summary: Burjeel Holdings, a leading healthcare provider in the MENA region, has announced impressive financial results for the fiscal year ending December 31, 2024. Dr. Shamsheer Vayalil, Chairman and CEO, attributed this success to the group's tsrategic investments in complex care and its alignment with national healthcare priorities.