തൃശൂര്‍: തൃശൂരിലെ മാടക്കത്തറയില്‍ യുവാവ് കുത്തേറ്റ് മരിച്ച സംഭവത്തില്‍ അയല്‍വാസികളായ അച്ഛനെയും രണ്ട് മക്കളെയും അറസ്റ്റ് ചെയ്തു. ലഹരി ഇടപാടുമായി ബന്ധപ്പെട്ട തര്‍ക്കവും മുന്‍ വൈരാഗ്യവുമാണ് കൊലപാതകത്തില്‍ കലാശിച്ചത്. നാല് സെന്റ് ഉന്നതി സ്വദേശി നിഖില്‍ (22) ആണ് കൊല്ലപ്പെട്ടത്. സംഭവത്തില്‍ പ്രതിയായ ജിന്റോ, സഹോദരന്‍ ജെയ്‌സണ്‍, അച്ഛന്‍ ഔസേപ്പ് എന്നിവരെയാണ് പൊലിസ് കസ്റ്റഡിയിലെടുത്തിരിക്കുന്നത്.

നിഖിലിന്റെ സുഹൃത്തായ ഷാമോനും ആക്രമണത്തില്‍ പരിക്കേറ്റിട്ടുണ്ട്. ഷാമോനും പ്രതി ജിന്റോയും തമ്മില്‍ നേരത്തെ തന്നെ ശത്രുത നിലനിന്നിരുന്നു. നിഖിലും ഷാമോനും ലഹരി ഉപയോഗിക്കുന്ന വിവരം ജിന്റോ പൊലിസിനെ അറിയിച്ചതാണ് വൈരാഗ്യത്തിന്റെ പ്രധാന കാരണം.

കഴിഞ്ഞ ദിവസം രാത്രി നിഖിലും ഷാമോനും ജിന്റോയുടെ വീട്ടിലെത്തി വാക്കേറ്റമുണ്ടാക്കിയിരുന്നു. തര്‍ക്കം രൂക്ഷമായതോടെ ജിന്റോ നിഖിലിനെ കത്തി കൊണ്ട് കുത്തുകയായിരുന്നു. തോളില്‍ ആഴത്തില്‍ മുറിവേറ്റ നിഖില്‍ സംഭവസ്ഥലത്ത് വച്ച് തന്നെ മരിക്കുകയും ചെയ്തു. കൈയ്ക്കും മുഖത്തും പരിക്കേറ്റ ഷാമോന്‍ നിലവില്‍ ചികിത്സയിലാണ്. ഇയാള്‍ അപകടനില തരണം ചെയ്തതായി ആശുപത്രി അധികൃതര്‍ അറിയിച്ചു. പൊലിസ് കേസെടുത്ത് അന്വേഷണം ഊര്‍ജ്ജിതമാക്കിയിട്ടുണ്ട്.

A 22-year-old youth was stabbed to death in Thrissur's Madakkathara following a dispute over drug-related issues, leading to the arrest of three neighbors.