പൂക്കോട്ടൂർ: പോളിങ് ബൂത്ത് വരി മാറിനിന്നു. വോട്ട് ചെയ്യാനായി ബൂത്തിനുള്ളിൽ കയറി. കൈയിൽ മഷിയും പുരട്ടി, പക്ഷേ അവിടെ വോട്ട് ചെയ്യാനായില്ല.മൂന്ന് പോളിങ്ങ് ബൂത്തുകൾ പ്രവർത്തിക്കുന്ന പൂക്കോട്ടൂർ മുതിരിപ്പറമ്പ് ജി.യു.പി സ്‌കൂളിലാണ് വോട്ടർ ബൂത്ത് മാറി വരി നിന്നത്. 80ാം നമ്പർ ബൂത്തിലെ വോട്ടർ തൊട്ടടുത്ത മുറിയിലുള്ള 79ാം ബൂത്തിലാണ് വോട്ട് ചെയ്യാനെത്തിയത്. ഇദ്ദേഹം ബൂത്തിനുള്ളിൽ പ്രവേശിച്ച് കൈയിൽ മഷിയും പുരട്ടിയ ശേഷമാണ് പോളിങ് ഉദ്യോഗസ്ഥർക്ക് അബദ്ധം മനസിലായത്. വോട്ട് ചെയ്യാൻ സാധിക്കില്ലെന്നു പറഞ്ഞ് വോട്ടറെ മടക്കി അയച്ചെങ്കിലും കൈയിൽ മഷി പുരട്ടിയതിനാൽ 80ാം ബൂത്തിലും വോട്ട് ചെയ്യാനായില്ല. 

തർക്കമായതോടെ 79ാം ബൂത്തിലെ പ്രിസൈഡിങ് ഓഫിസർ 80ാം ബൂത്തിലെ പ്രിസൈഡിങ് ഓഫിസറെ കാര്യം ബോധ്യപ്പെടുത്തിയ ശേഷമാണ് ഇദ്ദേഹത്തിന് വോട്ട് ചെയ്യാനായത്. ഇതേ ബൂത്തിലെ ഒരേ പേരിലുള്ള രണ്ട് വോട്ടർമാരിലൊരാൾ അപരന്റെ വോട്ട് മാറി ചെയ്തതും തർക്കത്തിനിടയാക്കി. ഒടുവിൽ യഥാർഥ വോട്ടർക്ക് ടെൻഡർ വോട്ട് ചെയ്യാൻ അവസരം നൽകിയാണ് പ്രശ്നം പരിഹരിച്ചത്.