ഗുവാഹത്തി: അസമിലെ കാംരൂപ് മെട്രോ ജില്ലയില്‍ പ്രായപൂര്‍ത്തിയാകാത്ത പെണ്‍കുട്ടി ആത്മഹത്യ ചെയ്ത സംഭവത്തില്‍ പിതാവ് പിടിയില്‍. ഇയാള്‍ ദീര്‍ഘകാലമായി കുട്ടിയെ ലൈംഗികപീഡനത്തിന് ഇരയാക്കിയതായി മാതാവ് ആരോപിച്ചു. ഇവരുടെ പരാതിയിലാണ് പ്രതിക്കെതിരെ കേസ് രജിസ്റ്റര്‍ ചെയ്തത്. 

ഏപ്രില്‍ 15നാണ് പെണ്‍കുട്ടിയെ വീട്ടില്‍ മരിച്ച നിലയില്‍ കണ്ടെത്തിയത്. സംഭവ സ്ഥലത്ത് നിന്ന് ആത്മഹത്യ കുറിപ്പ് കണ്ടെടുത്തിരുന്നു. ഇതില്‍ അമ്മയുടെ ആരോപണങ്ങള്‍ ശരിവെക്കുന്ന കാര്യങ്ങള്‍ ഉള്‍പ്പെട്ടിട്ടുണ്ടെന്ന് പൊലിസ് പറഞ്ഞു. പിതാവ് കുട്ടിയെ ആത്മഹത്യക്ക് പ്രേരിപ്പിച്ചെന്നും, നിരന്തരമായി പീഡിപ്പിച്ചിരുന്നെന്നും മാതാവ് നല്‍കിയ പരാതിയില്‍ പറയുന്നു. സംഭവത്തിന് ശേഷം ഒളിവില്‍ പോയ പ്രതിയെ ഏപ്രില്‍ 17ന് പുലര്‍ച്ചെയാണ് പൊലിസ് പിന്തുടര്‍ന്ന് പിടികൂടിയത്. 

ALSO READ: ഇന്ത്യക്ക് ആശ്വാസം; റഷ്യന്‍ എണ്ണ വാങ്ങാനുള്ള ഇളവ് നീട്ടി അമേരിക്ക 

കണ്ടെടുത്ത ആത്മഹത്യ കുറിപ്പ് തെളിവായി ശേഖരിച്ചെന്നും, കുറിപ്പിലെ വിവരങ്ങള്‍ വെളിപ്പെടുത്താന്‍ കഴിയില്ലെന്നുമാണ് പൊലിസ് പറയുന്നത്. എങ്കിലും പരാതിയില്‍ പറഞ്ഞ കാര്യങ്ങളില്‍ കുറിപ്പിന് സാമ്യമുണ്ട്. കുട്ടിയുടെ മൃതദേഹം പ്രാഥമിക നടപടികള്‍ക്ക് ശേഷം പോസ്റ്റ് മോര്‍ട്ടത്തിന് അയച്ചു. 

പ്രതിയെ കോടതിയില്‍ ഹാജരാക്കിയ ശേഷം വിശദമായ ചോദ്യം ചെയ്യലിനായി മൂന്ന് ദിവസത്തെ കസ്റ്റഡിയില്‍ വിട്ടു. തനിക്കെതിരെയുള്ള എല്ലാ ആരോപണങ്ങളും പ്രതി നിഷേധിച്ചിട്ടുണ്ട്. കോടതിയിലേക്ക് കൊണ്ടുപോകവെ 'ഞാന്‍ ഒന്നും ചെയ്തിട്ടില്ല, അവള്‍ കള്ളം പറഞ്ഞതാണ്' എന്ന് പ്രതി വിളിച്ച് പറഞ്ഞിരുന്നു.