കണ്ണൂര്‍: അഞ്ചരക്കണ്ടിയില്‍ ബിഡിഎസ് വിദ്യാര്‍ഥി നിതിന്‍ രാജിന്റെ ആത്മഹത്യയില്‍ പ്രതികളുടെ ജാമ്യഹരജിയില്‍ വിധി ഇന്ന്. വകുപ്പ് മേധാവി ഡോ റാം, സംഗീത നമ്പ്യാര്‍ എന്നിവരുടെ ജാമ്യാപേക്ഷയാണ് തലശേരി സെഷന്‍സ് കോടതി ഇന്ന് പരിഗണിക്കുക. ഇന്നലെ നിതിന്‍ രാജിന്റെ അച്ഛന്‍ കേസില്‍ കക്ഷി ചേര്‍ന്നിരുന്നു. ഇവരുടെ വാദം കോടതി കേള്‍ക്കും. 

നിതിന്‍ ആത്മഹത്യ ചെയ്തത് ലോണ്‍ ആപ്പുമായി ബന്ധപ്പെട്ട തര്‍ക്കത്തിന്റെ പേരിലാണെന്നാണ് പ്രതികളുടെ വാദം. നിതിന്‍ ആശുപത്രി കെട്ടിടത്തിന്റെ മുകളില്‍ നിന്ന് ചാടിയ ദിവസം പ്രിന്‍സിപ്പലിന്റെ മുറിയില്‍ നടന്ന വിചാരണയില്‍ ഡോക്ടര്‍ റാമും, സംഗീതയും ഉണ്ടായിരുന്നില്ല. മരണത്തിന് പിന്നില്‍ ലോണ്‍ ആപ്പാണെന്ന ആരോപണം കോളജ് മാനേജ്‌മെന്റും മുന്നോട്ട് വെക്കുന്നു. ഈ വാദമാണ് പ്രതികളുടെ അഭിഭാഷകന്‍ കോടതിയെ അറിയിച്ചത്. 

അതേസമയം ജാതി അധിക്ഷേപവും, മാനസിക പീഡനവും പ്രതികളായ അധ്യാപകരുടെ ഭാഗത്തുനിന്ന് നിരന്തരം ഉണ്ടായതായി പ്രോസിക്യൂഷന്‍ വാദിച്ചു.