കോഴിക്കോട്: ബി.ജെ.പി ദേശീയ കൗണ്‍സില്‍ നാളെ തുടങ്ങാനിരിക്കെ നഗരവും പരിസരവും കനത്ത സുരക്ഷയില്‍. ബി.ജെ.പി അധ്യക്ഷന്‍ അമിത്ഷാ അടക്കമുള്ള പല നേതാക്കളും ഇന്നു കോഴിക്കോട്ടെത്തും. അതിനാല്‍ വാഹന ഗതാഗതസ്തംഭനം ഉള്‍പ്പെടെയുള്ള പ്രയാസങ്ങള്‍ ഇന്നു മുതല്‍ നാലുദിവസം പൊതുജനം നേരിടേണ്ടിവരും.
പ്രധാനമന്ത്രി നരേന്ദ്ര മോദിയടക്കമുള്ള പാര്‍ട്ടിയുടെ ദേശീയ നേതാക്കള്‍, കേന്ദ്രമന്ത്രിമാര്‍, വിവിധ സംസ്ഥാനങ്ങളിലെ മുഖ്യമന്ത്രിമാര്‍ മൂന്നു ദിവസത്തെ കൗണ്‍സിലില്‍ സംബന്ധിക്കാനെത്തുന്നതിനാല്‍ നഗരം അതീവ സുരക്ഷയിലായിരിക്കും. കേന്ദ്രമന്ത്രിസഭയിലെ 43 പേര്‍ ഈ ദിവസങ്ങളില്‍ കോഴിക്കോട്ടുണ്ടാകും.
പ്രധാനമന്ത്രിയും കേന്ദ്രമന്ത്രിമാരില്‍ ഭൂരിഭാഗം പേരും ഇവിടെയായിരിക്കുന്നതിനാല്‍ ഫലത്തില്‍ കുറച്ചുദിവസത്തേക്കെങ്കിലും കോഴിക്കോട്ട് രാജ്യതലസ്ഥാനത്തേതിനു തുല്യമായ സുരക്ഷ ഒരുക്കേണ്ട ഗതികേടിലാണു കേന്ദ്ര, കേരള പൊലിസും മറ്റു സുരക്ഷാ വിഭാഗങ്ങളും. അതീവസുരക്ഷ വേണ്ട നിരവധി നേതാക്കള്‍ക്ക് ഉചിതമായ സുരക്ഷ ഒരുക്കി മൂന്നു ദിവസത്തെ സമ്മേളനം നടത്താന്‍ തക്ക ശേഷിയുള്ള നഗരമല്ല കോഴിക്കോട്. അതു വകവയ്ക്കാതെ സമ്മേളനം നടത്തുമ്പോള്‍ പൊതുജനങ്ങളാണു ബുദ്ധിമുട്ട് നേരിടേണ്ടിവരുന്നത്.
കൗണ്‍സിലില്‍ പങ്കെടുക്കാനെത്തുന്ന നേതാക്കള്‍ക്കും സുരക്ഷാ ഉദ്യോഗസ്ഥര്‍ക്കും ഡല്‍ഹിയില്‍ നിന്നുള്ള മാധ്യമപ്രവര്‍ത്തകര്‍ക്കും താമസിക്കാനായി കോഴിക്കോട് നഗരത്തിലെയും മലപ്പുറം, വയനാട് ജില്ലകളിലെ ചില ടൗണുകളിലെയും ഹോട്ടലുകള്‍ ബുക്ക് ചെയ്തിട്ടുണ്ട്. 24നാണു പ്രധാനമന്ത്രി എത്തുന്നത്.
നരേന്ദ്ര മോദി നഗരത്തിലൂടെ കടന്നുപോകുന്ന സമയങ്ങളില്‍ ഈ റോഡുകള്‍ വഴിയുള്ള ഗതാഗതം തടസപ്പെടും. അതീവസുരക്ഷാ കാറ്റഗറിയില്‍പെട്ട മറ്റു നേതാക്കളും കേന്ദ്രമന്ത്രിമാരുമെല്ലാം നഗരത്തിലെ ഹോട്ടലുകളില്‍ നിന്നു സമ്മേളന സ്ഥലത്തേക്കും തിരിച്ചുമൊക്കെ പോകുന്ന സന്ദര്‍ഭങ്ങളിലും വാഹനഗതാഗതത്തിനു നിയന്ത്രണം വേണ്ടിവരും.
ഇത്രയും പേര്‍ക്കു സുരക്ഷയൊരുക്കാന്‍ പറ്റിയ നഗരങ്ങള്‍ രാജ്യത്തു നിരവധിയുണ്ടെന്നിരിക്കെയാണു പരിമിതമായ സൗകര്യമുള്ള കോഴിക്കോട്ട് പരിപാടി നടത്തുന്നത്. വന്‍ തോതില്‍ പണം ധൂര്‍ത്തടിച്ചാണ് മൂന്നു ദിവസത്തെ കൗണ്‍സില്‍ നടത്തുന്നത്. നേതാക്കളുടെയും കേന്ദ്രമന്ത്രിമാരുടെയും പടം വച്ച ഫ്‌ളക്‌സുകളും കൊടികളും നഗരം നിറഞ്ഞിരിക്കുകയാണ്.